Icaya 21 - Acoli Baibul

Lok ma gitito i kom poto pa Babilon

¹ Man lok ma pire tek ma gitito i kom Babilon, ma en aye lobo ma tye i dog namo Kit macalo yamo lapiru kodo kwede i Negeb, tye can mo ma bino kit meno kun a ki yo tuŋ i tim, kun a ki i lobo ma dano lworo twatwal.

² Lubaŋa onyuto bota lok mapek mada; layak gire yako jami pa dano ayaka, ŋat ma balo lobo bene neko dano woko liweŋ ki i lobo. In Elam, cit malo i lweny, ki in Media, doŋ irum gaŋ woko! Kit can ducu ma Babilon okelo abityeko woko, abimiyo gik woko licwic.

³ Pi meno omiyo arem madwoŋ oketo pyera woko, omiyo koma ducu rem mwodde atata, calo dako ma rem ki nywal; odiya woko doŋ piny ma pe miyo aromo winyo kit gin mo; poyo koma apoya, ma pe doŋ aromo neno gin mo.

⁴ Tam doŋ oloya woko, lworo madit adada doŋ obalo wiya woko; ma abedo ka paro piny macol ma piny doŋ ribiribi-ni; meno dok okelo myelkom bota mada.

⁵ Doŋ giyubo meja woko gipeto mukeka bene doŋ woko, gitye doŋ ka cam kun gimato mat bene; Wun rwodi wua malo, wuwir kom kwot ki moo.

⁶ Pien Rwot owaco bota kuman ni, “Cit ikel lakur-piny, myero otit gin ma en tye ka nenone.

⁷ Ka en bineno wegi aguragura ma giriŋo aryo aryo, jo ma i wi kana ki jo ma i wi kinaga, myero en ocik ite matek, dok onengi maber twatwal.”

⁸ Ŋat ma oneno odaŋŋe ni “Ai Rwot, acuŋ i wi Lubele malo dyeceŋ jwi, acuŋ i kabedona bene dyewor benebene.

⁹ Nen wegi aguragura gitye ka riŋo ki aryo aryo.” Cutcut gugamo doge ni, “Babilon doŋ opoto, opoto gire woko; cal jogi apaya-gu ducu gininyogi woko piny.”

¹⁰ Wun jona, ma gidinowu woko ka gipyetowu woko calo kal, gin ma awinyo ki bot Rwot me mony, ma en Lubaŋa me Icrael en aye atito botwu.

Lok ma gitito i kom Duma

¹¹ Man lok ma pire tek ma gitito i kom Duma: ŋat mo tye ka lwoŋa ki i Ceir, kun penya ni, “Lakur-piny, dyewor obedo niŋniŋ? Lakur-piny, dyewor obedo niŋniŋ?”

¹² Lakur-piny ogamo ni, “Piny doŋ oru woko, dyewor dok bidwogo. Ka ce wumito penya pire, ci wutwero dwogo dok ka penya; wutwero dwogo cen kany gire pi tyen me aryo.” Lok ma gitito i kom lobo pa jo Arab

¹³ Man lok ma pire tek ma gitito i kom lobo pa jo Arab: Wun jo Dedan ma wutye ka mol ki kinagawu-ni, wubibuto i dye okuto mutwe ma tye i lobo pa jo Arab.

¹⁴ Wumi pii amata bot jo ma orwo pii onekogi, wumi bene cam bot jo murino lweny, wun jo ma wubedo i lobo Tema.

¹⁵ Pien guriŋo pala lucwan, pala doŋ giwoto woko ki i i akura, ki atum ma giketo iye atero ma doŋ gitelo woko, ki can mogo ma lweny kelo.

¹⁶ Pien man aye lok ma Rwot owacca, ni, “Doŋ odoŋ mwaka acel keken, calo mwaka me tiyo pakaca, pi meno deyo me Kedar ducu bidoko ginacaya;

¹⁷ dok jo me Kedar ma gin oteka ma gibidoŋ ki i kin jo ma celo atero, welgi bibedo nok; pien Rwot ma en Lubaŋa pa jo Icrael doŋ oloko man.”