Icaya 2 - Acoli Baibul

Rwot biloyo lobo ducu ki kuc

¹ Man aye lok ma, Lubaŋa onyuto bot Icaya wod pa Amoj mukemo Juda ki Jerucalem.

² Man bitimme i kare ma pud tye anyim: got me ot pa Rwot bicuŋ macalo got mabor makato godi ducu, borre bikato cere ducu; rok ducu gibimol gicito iye,

³ dok lwak lurok mapol gibibino gibiwacci, “Wubin, waitu i wi got pa Rwot, i ot pa Lubaŋa pa Yakobo; wek en opwonywa kit mere, ka wek walub yo mere.” Pien cik bia ki i Cion, lok pa Rwot bia ki i Jerucalem.

⁴ En biŋolo kop i kin rok mapol, dok biŋolo kop pa lwak rok mapol; gibiteto pala lucwangi doko lak kweri dyaŋ, ki toŋigi doko pala me ŋolo jaŋ olok; rok mo pe bitiŋo pala lucwan i kom rok wadigi, pe doŋ gibimedde ki pwonyo lweny.

Rwot biŋolo kop i kom jo ma wakke

⁵ Wun jo me ot pa Yakobo wubin wacitu kun ceŋ pa Rwot ryeny menyowa.

⁶ Pien in Rwot iweko lwakki woko ata, ibwoto jo me ot pa Yakobo, pien lutyet ma gua tuŋ wokceŋ gupoŋ iye mada, ki lutak dano macalo jo Piliciti, gitye ka yoko ciŋgi ki lurok.

⁷ Lobogi opoŋ ki ryal ki jabu, lonyogi pe twero tum; aguragura bene dwoŋ twatwal i lobogi, gadigadi lwenygi bene pe twero tum.

⁸ Cal jogi dwoŋ i lobogi twatwal, giworo tic ma gutiyo ki ciŋgi, gin ma gutiyo pigi kengi ki ciŋgi,

⁹ Meno omiyo doŋ gikwanyo dit pa dano woko, co doŋ gudoko jo ma rwomgi piny adada; pe itim kica botgi pi bal man!

¹⁰ Dony i i got, kanne woko i i apwa, pi twon lworo madit i kom Rwot ki pi riŋo deyo me ditte.

¹¹ Gibijuko bwono pa dano woko, wakke pa co bikwe woko. Gibipako Rwot keken i nino meno.

¹² Pien Rwot me mony tye ki ninone, pi gin ducu ma wakke ki ma lyerre, pi gin ducu ma tye malo, ma oille malo;

¹³ pi yadi cedar ducu me Lebanon, maboco ki ma tye malo; ki pi kworo ducu me Bacan;

¹⁴ pi godi ducu ma gucuŋ likuŋ wa malo ki pi lobo ducumubedo cere,

¹⁵ pi gedo ducu mabocoboco, ki pi cel me gaŋ ducu ma gigero matek;

¹⁶ pi mel ducu me Tarcic, ki pi yeya ducu ma giber me anena.

¹⁷ Gibijuko bwono pa dano woko, wakke pa co bikwe woko. Gibipako Rwot keken i nino meno.

¹⁸ Cal jogi ducu gibijwero woko.

¹⁹ Dano bidonyo i boro got, ki i bur ma gikwinyo i ŋom, pi twon lworo madit i kom Rwot ki pi riŋo deyo me ditte, ka en bia malo ka ryano kom jo ma bedo i lobo.

²⁰ Inino meno cal jogt me ryal ki me jabu, ma dano gutiyo me aworagi, gibibolo woko bot buyu ki bot olik,

²¹ ci gibidonyo ii got ma obar, ki i kin got ma okak atata, pi twon lworo madit i kom Rwot, ki pi riŋo deyo me ditte, ka en bia malo ka ryano kom jo ma bedo i lobo.

²² Wek dano ma yweyo tye i ume-ni obedi: dano kono konyo aŋo?