Icaya 16 - Acoli Baibul

¹ Gucwalo litino romi bot luloc me lobo meno, gucwalo ki i Cela, obino owok ki i tim aroo, gitero i wi got Cion.

² Gibedo calo winyo ma teŋo bwomgi, dok girom ki litino winyo ma gikeyogi woko atata ki i odigi, jo Moab gitye kit meno, gikuro piny i waŋ wat me kulu Amon.

³ “Mi tamwu i kom lok man, dok bene wuŋol kop kakare; wuwek tipowu obed calo dyewor i cwiny dyeceŋ malyet kilkil; wukan jo ma giryemogi woko iye, pe wudot jo ma doŋ guriŋo lweny.

⁴ Wuwek jo Moab ma giryemogi woko-ni gubed i kinwu; doŋ wubed macalo kalarregi kii ciŋ jo ma doŋ otimogi malit-ti. I kare ma noŋo jo ma yam unogi doŋ gipe, ki nek ki uno’ dano bene noŋo doŋ ogik wako, ki ŋat ma nyonogi diyogi piny doŋ orwenyo wokoki i lobo,

⁵ i kare meno aye gibicibo iye komker i kom mar ma pe lokke, dano ma gene aye bibedo i wiye i kema pa Daudi, ŋat ma ŋolo kop dok ma mito ŋolo kop kakare, ŋat ma kome mit ka tiyo gin ma tye atir.”

⁶ Wan wawinyo pi wakke pa Moab, kit ma onoŋo giwakke kwede; wakkegi, lyerregi ki ŋalagi, nyattegi-nu ducu meno obedo goba keken.

⁷ Pi meno wekjo Moab gukoki, dano ducu myero gukok pi lobo Moab, Myero gukok matek pi poki olok mutwo me Kir-karecet ma yam gubedo ka camone-ni.

⁸ Potti ma i Kecbon ducu doŋ guballe woko, ki olok me Cibma; olok ma yam kono vinone mero rwodi me rok mapatpat-ti doŋ giretogi woko piny. Jaŋe yam ojany oo wa i Jajer: olak oo wa i tim; jaŋe matocone yam ojany matek, okato oŋolo dye nam woko ari,

⁹ Meno aye gin mumiyo atye ka kok pi olok me Cibma, kit macalo akok kwede pi gaŋ Jajer; pig waŋa cwer i komwu, in Kecbon ki Eleale; pien dano tye ka wo ki woo me lweny i kom olokwu ma yam wupwono-ni.

¹⁰ Yomic ki yomcwiny madwoŋ doŋ gikwanyo woko ki i potti ma yam olok nyak iye matek ca, dok bene pe doŋ giwero wer i potti olok, woo mo bene pe dok winnye iye, nyono olok i bur me biyo koŋo vino bene doŋ ogik; woo ma yam dano giwo kwede ka gipwono olok-ki doŋ pe.

¹¹ Meno omiyo cwinya tugge twatwal me loko lok i kom Moab calo naŋa ma kok, cwinya tugge bene me loko lok i kom Kir-kerec.

¹² Kadi bed mine kene me olo kome nonono me cito i waŋ jogi ma tye malo i wi godi ka woro lubaŋane i kabedo maleŋ, pe bitwero wacel.

¹³ Man aye lok ma yam Rwot oloko con i kom Moab.

¹⁴ Ento kombeddi Rwot owacci, “I mwaka adek ma obedo calo mwaka pa lapakaca-ni, deyo pa Moab bidoko gmacaya kadi bed en tye ki lwak jo mapol at; jo ma bidoŋ gibibedo nok twatwal, dok bene noŋo dok gin jo ma goro keken.”