Icaya 15 - Acoli Baibul

Lok ma gitito i kom lobo Moab

¹ Man aye lok ma pire tek ma gitito i kom Moab. Pien Ar doŋ gijwero woko i dyewor acel keken omiyo Moab doŋ ogik woko; pien Kir bene gijwero woko i dyewor acel keken, omiyo Moab doŋ ogik woko.,

² Jo Dibon doŋ gucito malo i wan jogigi ka koko kunnu; jo Moab tye ka kok pi Nebo ki pi Medeba, Wi dano ducu doŋ otal woko, yer tik-gu ducu bene doŋ gilyelo woko.

³ Dano giruko boŋo cola i dye gudo; ki i wi odigi kadi wa i dye gaŋgi jo ducu noŋo kok ma pig wangi mol amola i korgi.

⁴ Jo Kecbon kacel ki jo Eleale bene gitye ka koko, dwangi winnye ka mabor wa i Jakaj; meno omiyo lulweny me Moab gudoko lwor mada; cwinygi doŋ onabbe anaba,

⁵ Cwinya rem twatwal pi Moab; jo ma lurin-lweny ma yam gibedo iye doŋ guriŋo woko i Joar, guriŋo bene wa i Eglat-celicia, Guito cere me Lukit, gicito malo kun gikok ki pig waŋgi; ki i yo ma cito piny i Koronaim gukok pi neno kit macalo lobo doŋ gibalo kwede woko.

⁶ Pii ma i Nimrim doŋ otwo woko liweŋ; lum oner woko pe doŋ lot, gin mo ma twi bene doŋ pe matwal.

⁷ Meno omiyo jami mabup ma yam onoŋo ginoŋo, kacel ki jami ma yam gikano, gin ducu doŋ giyakogi gitero woko loka kulu Arabim.

⁸ Pien koko doŋ dwoŋ twatwal, doŋ owoto oromo i lobo Moab woko ducu; nen koko pa dano doŋ winnye wa i Elam, dok bene doŋ owinnye wa i Beerelim.

⁹ Pii me Dibon doŋ odoko remo keken; kadi bed kumene pud dok abimedo can mukene i kom Dibon, abikelo labwor kikome doŋ i kom jo Moab ma gubwot ma guriŋo woko, ki i kom jo ma gudoŋ i lobo meno.