Icaya 14 - Acoli Baibul

Rwot bidwoko jo Icrael i lobogi

¹ Rwot bitimo kica ki Yakobo, biyero jo Icrael doki, ci dwokogi i lobogi kikome, rok mukene biribbe kwedgi, ci doŋ gimoko matwal i kom ot pa Yakobo.

² Rok mapol bilwoko jo Icrael tero i kabedogi, ka doŋ jo Icrael lokogi woko gidoko opiigi ki aŋecagi i lobo pa Rwot; gibimako jo ma yam omakogi giloko gidoko opiigi, dok gibiloyo jo ma yam ounogi.

Ginywaro kabaka me Babilon

³ Kare ma Rwot bimiyowu iye yweyo i kom can mewu, ki i kom myelcwiny ma wubedo kwede ki tic mapek ma wubedo ka tiyone,

⁴ wubicako nywaro kabaka me Babilon ki wer kuman ni, “Koŋ inen kit ma ŋat ma uno dano doŋ okwe kwede, kit ma kolo mager pa won pala doŋ okwe kwede mot!

⁵ Rwot doŋ oturo odoo pa jo maraco woko, kacel ki odoo ker pa luloc,

⁶ jo ma gubedo ka goyo lurok kun gitye ki akemo madit adada, ma pe gujuko ciŋgi i komgi; jo ma gubedo ka loyo lobo ki kiniga, ma pe giweko keto ayela i komgi.

⁷ Lobo doŋ oywe, tye ma okwe mot, jo ma bedo iye doŋ gimoro wer keken.

⁸ Yadi ciprec cwinygi yom piri, ki yadi cedar me Lebanon giwaco ni, ‘Cakke i kare ma gidwoki kwede piny, ŋat mo ma obino ka toŋowa pe.’

⁹ Lyel bene otugge woko ki piny kuca, me rwatte kwedi ka ibino, tye ka coyo tipo pa jo muto me bino ka moti, jo ducu ma yam gubedo lutel i wi lobo; luker ducu ma yam guloyo rok mapatpat omiyogi ducu gua woko ki i wi komkergi.

¹⁰ Gin ducu gibilok, kun giwaco boti ni, ‘In bene doŋ idoko goro calo wan! Idoko doŋ calo wan!’

¹¹ Deyoni doŋ giketo woko piny i lyel, kacel ki koko naŋani; kwidi doŋ gudokokitanda ma ibuto i wiye, ki kwidi ma camo kom dano-ni doŋ gudoko giummi.

¹² Kit ma imwomme ki i polo ipoto kwede piny, in lakalatwe me dyeceŋ, wod pa Ru-piny! Kit ma gitoni kwede woko piny, in ma ireto rok mapatpat-gu!

¹³ Iwaco ki i cwinyi ni, ‘Abiito acito malo i polo; abicibo komkerra malo i wi lakalatwe pa Lubaŋa; abibedo i wi got me cokke ka mabor yo tuŋ acam;

¹⁴ abiito malo twatwal i wi pol, doŋ abikette kena me bedo macalo ŋat Mamalo Twal.’

¹⁵ Ento in doŋ gikeli giketi wo ko piny i lyel, i te bur ka matut adada.

¹⁶ Jo ma neni gibiciko waŋgi i komi, kun gilwodo lok i komi ni, ‘Man pe en ŋat ma nene omiyo kom lobo omyel twatwal-li, ma bene omiyo ker mapol oyeŋŋe?

¹⁷ Pe en aye ma yam omiyo lobo odoko calo tim aroo, ma obedo ka reto gaŋi ma iye woko liweŋ, ma pe oye ni mabucce gucit paco?’

¹⁸ Luker me rok mapatpat gibuto gigi piny i deyo, ŋat acel acel buto i lyelle ma giyike iye;

¹⁹ ento in doŋ giboli woko cen, ka mabor mada ki lyelli, calo latin ma gibwogo abwoga ma dano gukwero, giumo komi ki kom dano ma gineko, jo ma gicobogi ki pala lucwan, jo ma donyo piny i gweŋ ma tye i te bur matut piny, macalo kom dano muto ma ginyono piny.

²⁰ In pe ibiribbe kwedgi ka giyiki, pien in doŋ ibalo loboni woko, dok ineko lutuwu woko. “Likwayo pa lutim maraco pe myero doŋ gicak nyiŋgi matwal!

²¹ Wuyub ka neko litinone pi bal alii pa kwarogi, wek pe dok gua gulo lobo, guger gaŋigi onya obed madwoŋ ata i wi lobo.”

Lubaŋa bityeko jo Babilon woko

²² “Abia ka lweny i kom jo Babilon,” man lok pa Rwot me mony, “abimiyo nyiu dano rwenyo woko ki i Babilon, jo mo pe bidoŋ iye, kadi litino matino nyo likwayo,” Rwot ma owaco.

²³ “Abimiyo coo leyo lobogi, dok bene ka ma pii poŋ gurre iye bibedo pol ata, abiyweyo woko maleŋ calo dako ma oyweyo ode maleŋ kun pe oweko gin mo iye.”

Gibityeko jo Aciria woko

²⁴ Rwot me mony doŋ okwoŋo kwoŋ ni, “Kit ma doŋ atyeko yubone kwede con, bitimme bene kit meno, kit macalo atamo kwede bitimme bene doŋ kumeno.

²⁵ Abituro jo Aciria ki i lobona woko, abinyonogi woko piny i wi gotta; okolle biluny woko bene ki i tyen jona, ki ter bene kumeno ki i wi gwokgi.”

²⁶ Man aye doŋ gin ma ayubo mukemo lobo ducu; dok man en-ni ciŋa ma doŋ atyeko ryeyone woko i wi rok ducu.

²⁷ Pien Rwot me mony doŋ otyeko yubo yubbe woko, aŋa mo no ma dok bibalone? Doŋ bene oryeyo ciŋe woko, aŋa kono ma dok bidolone?

Lok ma gitito i kom jo Piliciti

²⁸ Lok man yam obino oa ki bot Lubaŋa i mwaka ma kabaka Akaj oto iye, kun waco ni,

²⁹ “Wun jo Piliciti ducu, cwinywu pe obed yom ni pien odoo ma yam gibedo ka goyowu kwede-ni doŋ otur woko, pien ororo bia ki i kin likwayo twol, tone bidoko twol ma tuk cito malo.

³⁰ Rwot bikwayo jo ma lucan i kin lwakke, bimiyo jo ma piny obwoyogi buto piny ki kuc; ento in, abimiyo kec neko likwayi woko, joni mogo ma gudoŋŋe bene abinekogi woko.

³¹ Doŋ oduru, in dogcel, in gaŋ bene ikok ba; wun jo Piliciti ducu, wumi lworo ocak onyo koyo i komwu! Pien lukwor tye ka bino ki yo tuŋ acam, pe tye dano mo ma i kingi ma opokke kene.”

³² Wubiwaco gin aŋo, bot lukwena pa rok meno? Wubiwaco ni. “Rwot omiyo Cion ocuŋ matek, jone ma giuno doŋ giuno gularre iye.”