Icaya 13 - Acoli Baibul

Lok ma gitito i kom Babilon

¹ Man lok ma pire tek ma Lubaŋa owaco bot Icaya wod pa Amoj i kom Babilon,

² Wutiŋ bendera malo ka maleŋ, wulwongi ki dwan maloŋo, wuyeŋ ciŋwu wek gudony, i dogcel pa ludito me awora,

³ An Rwot kikoma doŋ aciko lwakka woko pi lweny, doŋ alwoŋo co ma gin oteka lwenynya, me miyo kinigana ocob ticce, lwakka ma giwakke kun giŋatte aŋata.

⁴ Koŋ wuwiny woo ma tye malo i wi godi calo woo pa lwak dano ma gucokke lipim! Koŋ wuwiny kit ma jo me ker ducu, ki jo me rok mapatpat gitye ka kok kun gicokke kacel! Rwot me mony tye ka ywayo monnye pi lweny.

⁵ Gua ki i lobo ma tye ka mabor twatwal, gibino kun gia ki i agikki me te polo; Rwot tye ki akemo, oebino ki jami lwennye me tyeko lobo woko ducu.

⁶ Wukok, pien nino pa Rwot doŋ tye cok; bibino calo to-piny ma oa ki bot Won Twer Ducu!

⁷ Meno bimiyo ciŋ jo mapol doko goro, dok dano acel acel cwinye bionyo koyo,

⁸ cwinygi biballe woko. Arem madit me lworo ki me kumo me can bimakogi matek; gibitwennye calo dako ma tye ka rem ki nywal. Gibinenne kekengi kun komgi myel; waŋgi bibokke woko calo mac.

⁹ Wunen, nino pa Rwot tye ka bino. En ger, dok akemo ki kiniga mo mager omake, ma bimiyo lobo doŋ obur, tyeko lubalo woko ducu ki iye.

¹⁰ Pien lakalatwe me polo ki kulgi mapatpat pe gibiryeny; ceŋ bicido woko macollicuc ma pud noŋo tuc atuca ki tuŋ wokceŋ, dwe bene pe biryeny,

¹¹ Abiketo can i kom lobo pi timme marac, ki i kom jo maraco pi balgi; abigiko wakke pa jo ma ginyatte abimiyo jo ma lyerre ma pe gin lukica kwe woko.

¹² Abimiyo co bedo me wei twatwal, makato jabu ma giliyo maberre; dano bene bibedo me wel twatwal, makato jabu me Opir woko.

¹³ Pi meno abimiyo polo yenne, lobo bene biyeŋŋe ki i kabedone, pi akemo pa Rwot me mony, i nino me kinigane mager twatwalli.

¹⁴ Macalo ruda ma giryemo, nyo romi ma ŋat mo pe ma cokogi, dano acel acel bidok bot lutugi, ŋat acel acel biriŋo dok i lobo tugi kikome.

¹⁵ Ŋat ma gibinoŋo, gibicobo iye gituco woko pil, ŋat ma gimako, gibineko woko ki pala lucwan.

¹⁶ Gibinyoto litino lukeregi woko ma noŋo gin bene gineno ki waŋgi; gibiyako odigi woko bene, dok gibimako mongi gibuto kwedgi tektek.

¹⁷ Nen, doŋ atugo jo Medi woko me bino ka lweny i komgi; gin jo ma pe paro pi lim, dok bene pe gibedo ki yomcwiny pi lonyo jabu.

¹⁸ Gibicelo awobe ki aterogi gineko woko; kica pe bimakogi i kom latin mo wacel; pe bene gibiparo pi litino ki cwiny me kica.

¹⁹ Doŋ Babilon ma deyone dit kato deyo pa luker mukene ducu, gaŋ maber ma jo Kaldaya giwakke iye twatwal-li, bibedo calo Codom ki Gomora i kare ma yam Lubaŋa oretogi woko.

²⁰ Dano pe dok bibedo iye, dano mo me Arab pe biguro kemane kunnu, pe tye lukwat bene ma gibimiyo romigi buto piny kunnu.

²¹ Ento lee me tim aye bibuto kunnu, gin makwo ma kok bipoŋ woko i odigi; udu bene bibedo kunnu, kun jogi noŋo myelo amyela macalo dyegi.

²² Lanudi bikok i odigi ma ocudo malo likuŋ, ki too bene bikok i odigi mabeco me ker; Babilon doŋ pe biri, karene doŋ cok twatwal.