Icaya 1 - Acoli Baibul

Rok ma lubalo

¹ Man aye lok ma Lubaŋa onyuto bot Icaya wod pa Amoj mukemo Juda ki Jerucalem i kare pa Ujia, Yocam, Akaj ki Kejekia ma gubedo luker me Juda.

² Koŋ iwiny, in polo, ter iti in lobo; pien Rwot doŋ oloko ni, “Apito litino awobe, amiyo gudoŋo, ento doŋ gujemo woko i koma,

³ Twon ŋeyo rwode, kana ŋeyo ka ma rwode miye iye cam’ ento Icrael pe ŋeyo, lwakka pe giniaŋ.”

⁴ Oii, rok ma lubalo, gubedo jo ma bal onurogi woko, likwayo pa lutim tim maraco, litino ma kitgi doŋ oballe woko! Doŋ gubwoto Rwot woko, gicayo ŋat Maleŋ me Icrael bene, gupokke kweda woko, gudok cen matek.

⁵ Piŋo pud dok wumito gimedde ki goyowu? Dok wumedde ameda ki jemo piŋo? Wunen bur doŋ oromo wiwu woko ducu, cwinywu bene doŋ odoko nyap.

⁶ Cakke ki i tyenwu piny o kwede wa i wiwu malo, ka mo maber pe kadi ki acel; ret ki bur dwoŋ iye ata, ma waŋ ret mogo bene remone pud tye ka cwer acwera; pe gibiyo tut ki iye, dok bene pe gitweyo waŋ rette, pe gibido bene ki moo.

⁷ Lobowu odoŋ nono, gaŋiwu ducu doŋ giwaŋo woko ki mac: lurok gumayo lobowu woko ma wun bene wuneno, lobowu odoŋ nono, rom ki lobo ma lurok guyako.

⁸ Guweko gaŋ me Cion odoŋ calo bolo ma giweko i poto olok, dok calo ka gony ma giweko i poto okono, calo gaŋ ma lumony doŋ gutyeko rumone woko.

⁹ Kono nene Rwot me mony pe oweko dano mogo gudoŋ, kono wabedo calo Codom, kono doŋ wadoko calo Gomora.

Jo Icrael myero doŋ guŋut woko i balgi

¹⁰ Wuwiny lok pa Rwot, wun luloc me Codom! Wuter itwu wuwiny pwony pa Lubaŋawa, wun jo Gomora!

¹¹ Gitumwu ma wutyero mapol kit meno-ni kono, konnye ŋo ki bota? Man Rwot aye owaco; nyogi romiwu ma wutyero me gitum awaŋa-ni doŋ oroma woko, kacel ki moo dwolo me limwu makwo ma gucwene; cwinya pe mito remo twoni, kadi remo nyogi romi nyo remo nyogi dyegi.

¹² Ka wubino i nyima, aŋa muwaco botwu kono ni wunyon dyekalla?

¹³ Pe wumedde ki kela gitum ma konnye pe bota, yito odok eceta ma ŋwece kur odoko gin me kwer mada ki tuŋ bota. Por dwe, cabit, ki lwoŋo dano i cokke, pe atwero ciro balwu i cokkewu madito me wora.

¹⁴ Por dwe mewu ki ninowu madito ma yam giciko pigi, gin ducu cwinya dagi; gudoko ter mapek twatwal bota, aol woko doŋ ki tinogi.

¹⁵ Ka wutaŋo ciŋwu, abiumo waŋa woko pe anenowu: kadi bed wulega tyen mapol ata, pe abiwinyo legawu wacel; pien ciŋwu obedo remo keken.

¹⁶ Koŋ wulwokke woko, wubed maleŋ, wubol timwu maraco woko cen ka mabor wek pe dok obed ka nen i nyima; wuwek doŋ timo gin marac,

¹⁷ wupwonnye me timo gin maber. Wulub ŋolo kop atir, wukony jo ma giunogi; wular litino ma wongi pe, dok wupid pi mon ma coggi oto.

¹⁸ “Wubin koŋ kombeddi, wek walar lok kacel, Rwot ma owaco; kadi bed doŋ balwu kwar ma rom mene, bidoko matar calo pee; kadi bed kwar calo pala, bidoko calo yer romo matar.

¹⁹ Ka ce wuye lok, ma wutye ki winy, ci wubicamo gin mabeco ma ocek i lobo.

²⁰ Ento ka wukwero kun wujemo woko, pala lucwan bityekowu woko; pien man Rwot kikome aye ma owaco.”

Ŋolo kop i kom Cion, ki koko jone

²¹ Gaŋ ma yam genne doŋ odoko malaya adada, gaŋ ma yam ŋolo kop ma atir tye iye-ni! Kit ma atir bene onoŋo tye iye, ento kombeddi doŋ opoŋ ki nek keken.

²² Ryalwu doŋ rom aroma ki cette, koŋo vinowu doŋ orubbe woko ki pii.

²³ Rwodiwu ducu doŋ gudoko lujemo, gudoko bene lurem lukwo. Dano acel acel i kingi maro lim me wil i muŋ, cwinygi tye mere me noŋo mot keken. Pe giparo pi litino kic ma wongi pe, pido pa mon ma coggi oto pe o i nyimgi.

²⁴ Meno omiyo Rwot, ma en Rwot me mony, Rwot ma en Won Twer me Icrael, owaco ni, “Oromo doŋ, cwinya doŋ bikwe i kom jo ma daga, abiculo kwor i kom lukworra.

²⁵ Abilokke dok alwenyo i komgi; abitwako cet ryalwu ducu, abiliyo woko, abigwaro kit rac mo woko liweŋ ki i komwu.

²⁶ Abidwoko luŋolkopwu gibedo kit macalo yam tye con, ki jo ma miyo tam botwu bene bedo kit macalo yam tye wi ati. Lacen gibilwoni ni in gaŋ ma kite atir, gaŋ ma genne.”

²⁷ Gibikoko Cion ki ŋolo kop atir, jo ma bedo iye ma giŋut gibikokogi pi kit ma atir.

²⁸ Ento jo ma lujemo ki lubalo gibinekogi woko kacel, ki jo ‘ma bwoto Rwot woko, gibityekogi woko liweŋ.

²⁹ Pien lewic bimakowu pi yadi kworo, ma cwinywu yom iye-ni: alee bitwodowu pi potti ma yam wuyerogi.

³⁰ Pien wubidoko macalo kworo ma pote oner woko, dok bene macalo poto ma pii pe iye.

³¹ Dano matek bidoko calo lum mutwo ka mac ogudo, ki ticce bene bibedo cal ki mac ma mwoc kirre malo; gin aryo ducu gibiwan kacel, kun noŋo pe dok tye ŋat mo ma neko mac ki i komgi.