Buk me Aryo pa Moses ma Gilwoŋo Nia 7 - Acoli Baibul

¹ Rwot owaco bot Moses ni, “Nen aketi macalo Lubaŋa bot Parao, ki omeru Aron bibedo lanebini.

² In ibiloko lok ducu ma aciko boti; ci omeru Aron bitito bot Parao pi weko jo Icrael gua woko ki i lobone.

³ Ento abijiŋo cwiny Parao doko nwaŋ, abimedo lwak lanyut ki taŋo i lobo Ejipt.

⁴ Parao pe biwinyo lokki; abiketo ciŋa i kom Ejipt, ci abikwanyo monnya, jona, ma gin aye likwayo pa Icrael, ki i Ejipt, pi kop madito ma abiŋolo i wiye.

⁵ Jo Ejipt gibiŋeyo ni an a Rwot, ka abiryeyo ciŋa i kom lobo Ejipt pi kwanyo jo Icrael woko ki i kingi.”

⁶ Moses ki Aron gutimo kit ma Rwot ocikogi.

⁷ Moses onoŋo mwaka me ditte romo pyeraboro, ki pa Aron pyeraboro wiye adek, i kare ma gubedo ka lok ki Parao-ni.

Odoo pa Aron

⁸ Rwot dok oloko ki Moses ki Aron ni,

⁹ “Ka Parao owaco botwu ni, ‘Wunyut ada mewu pi tiyo taŋo,’ ci ibiwaco ki Aron ni, ‘Kwany odooni, ibol piny i nyim Parao, wek olokke odok twol.’”

¹⁰ Kit meno Moses ki Aron gucito bot Parao gutiyo kit ma Rwot ocikogi kwede; Aron obolo odoone piny i nyim Parao ki luticce, ci olokke odoko twol.

¹¹ Ci Parao olwoŋo jo ma luryeko ki lutal, ma gin lutyet ma i Ejipt, gin bene gutimo ma rom meno ki ryekogi.

¹² Pien ŋat acel acel obolo odoone piny, ci gulokke gudoko twol, ento odoo pa Aron omwonyogi woko ducu.

¹³ Ento cwiny Parao pud obedo tek aye, pe omedo ki winyogi kit ma Rwot owaco-ni,

Gemo-me remo

¹⁴ Rwot dok owaco bot Moses ni, “Cwiny Parao odoko nwaŋ, okwero weko dano ocito.

¹⁵ Cit odiko bot Parao macalo en cito i dog kulu-ni; cit ikur en i ŋet kulu, mak odoo i ciŋi, ma yam olokke odoko twol-li.

¹⁶ Ci ibiwacce ni, ‘Rwot Lubaŋa pa jo Ibru ocwala boti, kun waco ni, Wek jona guciti, wek guti bota i tim, dok nen, in peya iworo doga.

¹⁷ Ci Rwot doŋ owaco kuman ni, Pi lok man bimiyo iŋeyo ni an a Rwot: nen, abigoyo pii ma tye i kulu Nail ki odoo ma tye i ciŋa-ni, ci pii bilokke doko remo,

¹⁸ ci rec ma i Nail gibikato woko, kulu Nail bilokke doko ma ŋwe coo, dok jo Ejipt cwinygi bikwero mato pii ma i kulu Nail woko.’’’

¹⁹ Rwot owaco bot Moses ni, “Wac ki Aron ni ‘Kwany odooni ci irye ciŋi i wi pii me Ejipt, i wi kulugi, i wi kulu akwinyagi, i wi kabedo ducu ka ma pii opoŋ iye, wek gulokke gudok remo; wek remo orom i lobo Ejipt ducu ki atabo weer ducu, ki i agulu godi ducu.’ ”

²⁰ Moses ki Aron gutimo macalo Rwot ocikogi. Aron otiŋo odoone malo ki i nyim Parao ki luticce; ci ogoyo ki pii ma i kulu Nail, ci pii ducu ma i kulu Nail olokke odoko remo.

²¹ Rec ma i kulu Nail gucako to woko, ci kulu Nail odoko ŋwe coo; pienno jo Ejipt pe doŋ gitwero mato pii ma i kulu Nail; dok remo oromo i lobo Ejipt ducu.

²² Ento lutyet me Ejipt bene gutimo ma rom meno ki ryekogi; omiyo cwiny Parao odoko nwaŋ aye, okwero winyogi woko, kit ma Rwot owaco-ni.

²³ Parao olokke odok i ode, kun pe cwinye paro kadi pi man.

²⁴ Jo Ejipt ducu gubedo ka kwinyo pii me amata i ŋet kulu Nail, pien pe doŋ gitwero mato pii ma i kulu Nail.

Gemo ogwal

²⁵ Ka nino okato abiro nia ma Rwot ogoyo kulu Nail.