Buk me Aryo pa Moses ma Gilwoŋo Nia 6 - Acoli Baibul

¹ Ento Rwot owaco bot Moses ni, “Tin doŋ ibineno gin ma abitimo i kom Parao; en bicwalogi woko ki bade matek, ci ryemogi woko ki i lobone ki tek.”

Lubaŋa onwoyo lwoŋo Moses

² Lubaŋa owaco bot Moses ni, “An a Rwot.

³ Yam anen bot Abraim, bot Icaka ki bot Yakobo, kun giŋeyo ni an Lubaŋa Matwero-ducu, ento pe amiyo guŋeyo ni nyiŋa aye Rwot.

⁴ An yam amoko gicikkena kwedgi bene, pi miyo botgi lobo Kanaan, en aye lobo ma yam gubedo iye lubedo-ni.

⁵ Dok bene atyeko winyo cur pa jo Icrael ma jo Ejipt olokogi gudoko opii-ni, an bene doŋ atyeko po gicikkena.

⁶ Wac bot jo Icrael ni, an a Rwot, abikwanyowu woko ki i peko ma jo Ejipt keto i komwu, abilarowu ki i opii megi, abikokowu woko ki ciŋa ma aryeyo, ki pi kop madito ma abiŋolo i wigi.

⁷ Abiterowu me bedo jona, dok an abibedo Lubaŋawu; wun wubiŋeyo ni an a Rwot Lubaŋawu, ma akwanyowu ki i kom peko ma jo Ejipt giketo i komwu.

⁸ Ci abikelowu i lobo ma yam akwoŋo pire ni abimiyo bot Abraim, ki Icaka ki Yakobo, abimiyo botwu obed lobowu; an a Rwot.”

⁹ Moses oloko kit meno bot jo Icrael; ento pe guwinyo lok pa Moses, pien cwinygi oballe woko pi tic me opii mukato kare.

¹⁰ Rwot owaco bot Moses ni,

¹¹ “Cit idony bot Parao, kabaka me Ejipt, ci ititte ni owek jo Icrael gua woko ki i lobone.”

¹² Ento Moses owaco bot Rwot ni, “Nen, jo Icrael pe guwinyo lokka, ci Parao biwinyo lokka niŋniŋ, ma an a dano ma dogga pe leŋ-ŋi?”

¹³ Ento Rwot oloko ki Moses ki Aron, ocikogi bot jo Icrael, ki bot Parao, kabaka me Ejipt pi kwanyo jo Icrael woko ki i lobo Ejipt.

Tekwaro pa Moses ki Aron

¹⁴ Man aye ludito wi kaka i odi pa kwarogi: litino awobe pa Reuben, latin kayo pa Icrael gin ene: Kanok, Pallu, Kejeron ki Karmi; meno aye doggola pa Reuben.

¹⁵ Litino awobe pa Cimeon gin ene: Jemuel, Jamin, ŋkad, Jakin, Jokar ki Caul, awobi pa dako Lakanaan; meno aye doggola pa Cimeon.

¹⁶ Man aye nyiŋ litino awo be pa Levi, kun lubo yalwakgi: Gercon, Kokat ki Merari; wel mwaka me kwo pa Levi oromo miya acel ki pyeradek wiye abiro.

¹⁷ Litino awobe pa Gercon gin ene: Libni ki Cimei, macalo doggolagi tye kwede.

¹⁸ Litino awobe pa Kokat gin ene: Amram, Ijar, Kebron ki Ujiel; wei mwaka me kwo pa Kokat oromo miya acel ki pyeradek wiye adek.

¹⁹ Litino awobe pa Merari gin ene: Makali ki Muci. Meno aye doggola pa Lulevi, kun lubo yalwakgi.

²⁰ Amram onyomo Yokobedi lamiŋ wonne, ci onywalo Aron ki Moses; wel mwaka me kwo pa Amram oromo miya acel ki pyeradek wiye abiro.

²¹ Litino awobe pa Ijar gin ene: Kora, Nepeg ki Jikri.

²² Litino awobe pa Ujiel gin ene: Micael, Elijapan ki Citri.

²³ Aron onyomo Eliceba nya pa Aminadab, lamin Nakucon, ci onywalo Nadab, Abiu, Eleajar ki Itamar.

²⁴ Litino awobe pa Kora gin ene: Elkana ki Abiacap; meno aye doggola pa jo pa Kora.

²⁵ Eleajar, wod pa Aron, onyomo dako ma i kin anyira pa Putiel, ci onywalo Finekaci. Meno aye ludito wi kaka ma i odi pa Lulevi, macalo doggolagi tye kwede.

²⁶ Man gin aye Aron ki Moses ma Lubaŋa owaco botgi ni, “Wukwany jo Icrael woko ki i lobo Ejipt ki bucagi.”

²⁷ Gin aye yam guloko ki Parao kabaka me Ejipt pi kwanyo jo Icrael woko ki ‘i lobo Ejipt; man aye Moses ki Aron meno.

Cik pa Rwot bot Moses ki Aron

²⁸ I kom nino ma Rwot oloko iye ki Moses i lobo Ejipt,

²⁹ Rwot owaco bot Moses ni, “An a Rwot; tit bot Parao kabaka me Ejipt lok ducu ma awaccini.”

³⁰ Ento Moses owaco bot Rwot ni, “Nen, doga pe leŋ; Parao biwinya niŋni,ŋ?”