Buk me Aryo pa Moses ma Gilwoŋo Nia 5 - Acoli Baibul

Moses ki Aron i nyim Parao

¹ Lacen Moses ki Aron gucito bot Parao, guwacce ni, “Rwot Lubaŋa pa Icrael owaco kit man ni, ‘Wek jona guciti, wek gukwer nino madit i tim.’ ”

² Ento Parao ogamoni “Rwot en aŋa, ma myero awiny doge ci awek Icrael owot-ti? An pe aŋeyo Rwot meno, dok bene pe abiweko jo Icrael woto!”

³ Gin dok guwacce ni “Lubaŋa pa jo Ibru oromo kwedwai walegi ni iwek wan waciti, wawot wot me nino adek, ka tyero gitum bot Rwot Lubaŋawa, wek pe en opt i komwa ki two gemo marac nyo pala lucwan.”

⁴ Ento Parao ma kabaka me Ejipt owaco botgi ni, “Moses wun ki Aron, piŋo wukwanyo dano woko ki i dog ticgi? Wun wudok i dog tic

⁵ Ka dok owacci, “Nen, dano odoko dwoŋ woko i lobo, wun kono umiyo giywe i dog ticgi.”

⁶ I nino meno ociko ludito ma loyo tic pa lwak, ki lunyampara, ni,

⁷ “Pe dok wumedde kelogi lum ocwici me goyo matafali kit macon, wek gin aye gucit ka tweyone.

⁸ Ento wel matafali ma yam gigoyo-ni wuwek gumedde kwede, pe wudwok welle piny; pien gin luwackom, mumiyo gikok ni, ‘Wek wacit i tim ka tyero gitum bot Lubaŋawa.’

⁹ Wumi tic mapek wek co gubed i dog tic pe guket cwinygi i lok goba.”

¹⁰ Kit meno ludito ma loyo lunyampara pa lwak gucito guwaco bot dano ni, “Parao owaco kit man ni, ‘Wan pe dok wabikelliwu lum ocwici.

¹¹ Wun doŋ wucit kikomwu, wuyeny ka ma wutwero noŋo lum ocwici; ento ticwu pe gibidwoko welle piny.”’

¹² Kit meno dano guket i lobo Ejipt ducu ka coko reŋ kal me ocwici.

¹³ Ludito ma loyo tic giruyogi kun giwacci, “Wucob ticwu, kit me nino ducu, kit macalo yam lum ocwici tye-ni.’,

¹⁴ Ki lunyampara pa jo Icrael, ma ludito ma loyo tic pa Parao oketogi me neno tic-ci, gubedo ka pwodogi kun gipenyogi ni, “Piŋo pe wucobo tic me goyo matafali tin, kit macon?”

¹⁵ Ka lunyampara pa jo Icrael gucito gukok bot Parao ni, “Piŋo itimowa kit man, ladit?

¹⁶ Pe doŋ gikelo lum ocwici botwa, ento giwacowa ni, ‘Wugo matafali!’ Nen, ka gipwodowa, ladit; ento bal tye i kom lwakki!”

¹⁷ Ento en ogamo ni, “Wun luwackom, wun luwackom; en mumiyo wuwaco ni, ‘Wuwek wacit ka tyero gitum bot Rwot.’

¹⁸ Wucit kombeddi ka tic. Pe gibimiyowu lum ocwici mo, dok bene wubigoyo matafali ma rom ki wel macon.”

¹⁹ Lunyampara pa jo Icrael guneno ni doŋ gitye marac, ka giwacogi ni, “Wun pe wubidwoko wel matafali piny kit me nino ducu.”

²⁰ Giromo ki Moses ki Aron ma onoŋo yam gitye ka kurogi, ka gia gidwogo ki bot Parao;

²¹ guwaco botgi ni, “Rwot onenwu dok oŋolliwu kop, pien wun wumiyo nyiŋwa odoko ŋwe lituny i nyim Parao ki luticce, dok wumiyo pala lucwan i ciŋgi me nekowa.”

Lega pa Moses

²² Moses olokke bot Rwot, owacce ni, “Ai Rwot, itimo jo-ni marac kuman piŋo? Icwala ka ŋo kaa?

²³ Nia ma abino bot Parao, ma aloko kwede pi nyiŋi, en ocako timo jo-ni marac cut, in bene peya ilaro joni wacel.”