Buk me Aryo pa Moses ma Gilwoŋo Nia 40 - Acoli Baibul

Guro kema ki kwerone

¹ Rwot owaco bot Moses ni,

² “I nino dwe acel i dwe mukwoŋo, cak guro iye kema, en kema me rwatte.

³ Ket iye canduk lok me caden, ci iŋab boŋo kicika me laum kom canduk.

⁴ Ka doŋ iter iye meja, ican iye jami ducu kikore, ka dok ikel okar-mac ci icib laput malo i wiye,

⁵ Dok iket keno tyer me jabu me waŋo odok eceta i nyim canduk lok me caden, ci iŋab boŋo cuka laum doggola me kema.

⁶ Ket keno tyer me gitum awaŋa i nyim doggola me kema, en kema me rwatte;

⁷ iket otako lwok ocuŋ i kin kema me rwatte ki keno tyer, ci iony iye pii.

⁸ Dok iŋab boŋo cuka me dyekal irum woko ducu, ci iŋab boŋo cuka me laum doggaŋ me dyekal.

⁹ K waŋy moo wir, iwir ki kema ki lwak jami ducu ma gitye iye, kun ikwero en ki jami ma giketo iye ducu gubed maleŋ.

¹⁰ Dok bene wir keno tyer me gitum awaŋa ki moo, ki jami ticce ducu; kwer keno tyer, ci bidoko maleŋ makato.

¹¹ Wir moo bene i kom otako lwok ki tedi tere ikwergi.

¹² Ka doŋ ibikelo Aron ki awobene i doggola kema me rwatte, ci ilwok komgi ki pii.

¹³ Ka doŋ iruk Aron ki boŋŋi aruka maleŋ, ci iwire ki moo, ikwere wek oti bo ta tic me ajwaka.

¹⁴ Ka dok ikel awobene bene, irukgi ki kanyi,

¹⁵ iwirgi ki moo macalo iwiro wongi-ni, wek guti bota tic meajwagi: wirogi ki moo bimiyo gibedo ajwagi matwal wa i kare pa likwayogi ducu.”

¹⁶ Moses otimo kit meno kit ma yam Rwot ocike kwede ducu; otimo ducu kit meno,

¹⁷ I dwe mukwoŋo, i mwaka me aryone, i nino dwe mukwoŋo aye giguro iye kema.

¹⁸ Moses oguro kema: oryeyo tedi tere; ocibo iye guti, ka orwako iye rii bao, oilo wir malo,

¹⁹ Ka dok oyaro boŋo opeto i wi kema, oketo laum kema, opeto i wiye, macalo yam Rwot ociko ki Moses.

²⁰ Ka dok otero lok me caden oketo i canduk, ka orwako tal i kor canduk, oketo kom me kica i wi canduk;

²¹ ka otero canduk i kema, onabo boŋo kicika malo me laumme, ci oumo kom canduk lok me caden woko, macalo Rwot ociko ki Moses,

²² Ka dok oketo meja i kema me rwatte, i kema tuŋ acam, ki woko i ŋe boŋo kicika ma oumo canduk-ki

²³ ka dok ocano mugati i nyim Ii wot macalo Rwot ociko ki Moses.

²⁴ Ka dok oketo okar-mac i kema me rwatte tuŋ acuc me kema kun okemme ki meja,

²⁵ ka ocibo laput malo i nyim Rwot; macalo Rwot ociko ki Moses.

²⁶ Ka dok oketo keno tyer me jabu i kema me rwatte i nyim boŋo kicika,

²⁷ ci owaŋo odok eceta ma ŋwece kur i wiye; macalo Rwot ociko ki Moses.

²⁸ Dok onabo boŋo cuka me laum doggola me kema.

²⁹ Ka dok oketo keno tyer me gitum awaŋa cok ki doggola kema me rwatte, ka ocako tyero iye gitum awaŋa, ki gityer me moko kwon; macalo Rwot ociko ki Moses.

³⁰ Ka dok oketo otako lwok i kin kema me rwatte ki keno tyer, oonyo iye pii me lwok;

³¹ en aye ka ma Moses ki Aron ki awobene gilwoko iye tyengi.

³² Ka gicito i kema me rwatte, dok ka ginyiko cok ki keno tyer, ci gilwokke, macalo Rwot ociko ki Moses:

³³ Oguro dyekal orumo kema ki keno tyer, ci onabo boŋo cuka laum doggaŋ me dyekal, Kit meno Moses otyeko tic kakare,

Pol ma oumo wi kema

³⁴ Lacen pol obino, oumo wi kema me rwatte woko, ci deyo pa Rwot opoŋo i kema.

³⁵ Moses onoŋo pe twero donyo i kema me rwatte, pien pol oboyo kom kema me rwatte woko, dok deyo pa Rwot opoŋo i kema.

³⁶ I kare me wotgi ducu, ka pol owarre woko ki i wi kema, ci jo Icrael gicako wot anyim;

³⁷ ento ka pol pe owarre woko, ci pe gimedde ki wotgi anyim, gikuro nio i nino ma owarre woko,

³⁸ I kare me wotgi ducu pol pa Rwot umo wi kema dyeceŋ, ki mac bedo iye dyewor, ma kun jo ducu me ot pa Icrael gineno.