Buk me Aryo pa Moses ma Gilwoŋo Nia 4 - Acoli Baibul

¹ Moses ogamo ni, “Ento nen, pe gibiye lokka, pe gibiwinyo doga bene, pien gibiwacci, “Rwot gire pe onen boti.”

² Rwot owacce ni, “Meno gin aŋo ma i ciŋi-nu?” Ogamo ni, “Odoo.’

³ Ci owacce ni, “Bol piny i ŋom.” Ci ka obolo piny i ŋom, olokke odoko twol; Moses oriŋo woko cen.

⁴ Ento Rwot owaco bot Moses ni, “Rye ciŋi imak ki tuŋ yibe.” Oryeyo ciŋe, omako; ci olokke odoko odoo ki i ciŋe,

⁵ Rwot owaco ni, “Man bimiyo giye ni Rwot, Lubaŋa pa kwarogi, Lubaŋa pa Abraim, pa Icaka, ki pa Yakobo, otyeko nen boti.”

⁶ Ci Rwot owacce ni, “Rwak ciŋi i kori.” Orwako ciŋe i kore; ka okwanyo woko, ci nen, ciŋe orugo matar macalo pee.

⁷ Rwot dok owacce ni, “Rwak ciŋi i kori.” Ci dok orwako ciŋe i kore; ka okwanyo woko, nen, ciŋe odok kakare macalo kome mukene ducu.

⁸ Lubaŋa dok owaco ni, “Ka pe gibiye lokki, nyo pe gibiparo bene pi lanyut mukwoŋo-ni, ci gibiye lanyut malacen.

⁹ Ka bene pe gibiye lanyut man aryo-ni ducu, ki kwero winyo dogi, ci ibitwomo pii ki i kulu Nail, ionyo i lobo ka ma otwo; ci pii ma itwomo ki i Nail bidoko remo ki i lobo ma otwo-ni.”

¹⁰ Ento Moses owaco bot Rwot ni, “Ai Rwoda, an ladwal nia wa con, kadi wa i kare ma ibedo ka lok kweda. Onoŋo atye ma aywayo lok mot, leba dwalle woko.”

¹¹ Rwot dok owacce ni, “Aŋa ma oketo dog dano? Aŋa ma miyo dano bedo Iato-dog, nyo ladiŋ-it, ma neno piny nyo lawaŋe-oto? Pe an aye atiyo, ma a Rwot-ti?

¹² Pi meno doŋ iciti, abibedo ki dogi, abipwonyi ki gin ma ibiloko.”

¹³ Ento en dok ogamo ni, “Ai, Rwoda, alegi ni icwal ŋat mukene.”

¹⁴ Ci kiniga: pa Rwot otugge i kom Moses kun wacci, “Aron pe tye kunnu, ma omeru-ni, ma Lalevi? An aŋeyo en lebe loko atir, ci nen, en obebino ka rwatte kwedi; ka en bineni, ci cwinye bibedo yom.

¹⁵ In ibilok kwede, ki keto lok i doge, an abibedo ki dogi, ki doge bene, ci abipwonyowu ki gin ma wubitiyo.

¹⁶ En aye bilok ki lwak maka in; en bibedo maka dogi, dok in ibibedo macalo Lubaŋa bote.

¹⁷ Ibicito ki odoo man i ciŋi, ma ibitiyo ki lanyut magi.”

Moses odok cen i Ejipt

¹⁸ Moses ka odok bot Yecero, ma won dakone, ci owacce ni, “Alegi wek koŋ adok bot omega ma i Ejipt, wek anen ka pud gitye makwo.” Ci Yecero ogamo dog Moses ni, “Cit ki kuc.”

¹⁹ Rwot owaco bot Moses i Midian ni, “Dok cen wa i Ejipt; pien jo ma yam mito neki doŋ guto woko ducu.”

²⁰ Kit meno Moses okwanyo dakone ki awobene, oketogi i wi kana, ci owoto, odok cen i lobo Ejipt, kun omako odoo pa Lubaŋa i ciŋe.

²¹ Rwot oloko bot Moses ni, “Ka doŋ ityeko dok cen i Ejipt, nen ni itiyo i nyim Parao taŋo ducu ma atyeko keto i ciŋi-ni; ento abijiŋo cwinye doko nwaŋ, ma pe biye dano woto.

²² In ibiwaco bot Parao ni, ‘Rwot owaco kit man ni, Icrael aye latin kayona,

²³ ci awacci ni, Wek latinna ocit ka tic bota; ka ikwero kome ni pe ociti, nen, abineko latin kayoni woko.’ ”

²⁴ I kabutogi i yo en aye Rwot oromo ki Moses kun mito neke woko.

²⁵ Ci Jipola okwanyo got mabit, oliro ki kom latin awobine, ogudo ki tyen Moses kun wacce ni, “Ada, in i cwa remo!”

²⁶ Ci Rwot oweke gire. Oloko ni, “In i cwara pi remo,” me lirre-nu.

²⁷ Rwot owaco bot Aron ni, " cit i tim, wek icirom ki Moses.” Ci oromo kwede wa i te got pa lubaŋa ka onoto leme.

²⁸ Ci Moses otito bot Aron lok ducu ma Rwot owacce, ma ocwalle kwede, ki lanyut ducu ma ociko ni oti kwede.

²⁹ Ci Moses ki Aron gucito, gucoko ludoŋo pa jo Icrael ducu

³⁰ Ci Aron oloko lok ducu ma Rwot oloko bot Moses, ci onyuto lanyut ducu i nyim dano.

³¹ Dano guye; ka guwinyo ni Rwot otyeko limo jo Icrael dok otyeko neno atwomgi ci gukulo wigi piny, guworo Lubaŋa