Buk me Aryo pa Moses ma Gilwoŋo Nia 37 - Acoli Baibul

Tiyo canduk lok me caden

¹ Bejalel opayo canduk ki bao yat lalwii; borre obedo futi aŋwen, ki lacce futi aryo, ki borre tuŋ malo futi aryo.

² Omwono iye ki ŋeye woko ki jabu ma giliyo maber, ka olulo doge ducu, orumo woko ki jabu,

³ Ci oliyo agit me jabu aŋwen pi twoke aŋwen ducu, agit aryo pi tuŋ cel ki agit aryo mukene pi tuŋ cel.

⁴ Ka dok otiyo tal me yat lalwii, omwono komgi woko ki jabu,

⁵ ka orwako tal i agit ma tye i but canduk-ki me tiŋo canduk.

⁶ Dok otimo kom me kica ki jabu ma giliyo maber; borre obedo futi aŋwen, ki lacce futi aryo.

⁷ Ka otiyo lukerubi aryo me jabu ma otetogi ki nyol. Otiyogi i agikki kom me kica ryoryo ducu,

⁸ lakerubi acel i agikki tuŋ cel, ki lakerubi acel i agikkine tun cel; otiyo lukerubi kun gikubbe i kom kom me kica i agikkine aryo ducu.

⁹ Lukerubi guyaro bwomgi malo i wiye, guumo wi kom me kica ki bwomgi, kun waŋgi kemme ki wadi; waŋ lukerubi nen ma okemo kom me kica.

Tiyo meja

¹⁰ En dok otiyo meja ki bao yat lalwii; borre obedo futi adek ki lacce futi acel ki nucu, ki borre tuŋ malo futi aryo.

¹¹ Omwono kome woko ki jabu ma giliyo maber, ci olulo doge ducu orumo woko ki jabu.

¹² Oketo riine tuŋŋi ki tuŋŋi ducu, ma lacce rom ki dye ciŋ, ci olulo doge ducu orumo woko ki jabu.

¹³ Oliyo agit aŋwen me jabu pire, ci omwono agit i twoke aŋwen ducu i kom tyene aŋwen.

¹⁴ Agit giketo cok i kom rii, me rwako tal latin meja.

¹⁵ Otiyo tal ki bao yat lalwii me tiŋo meja, omiwono komgi woko ki jabu.

¹⁶ Otiyo jami me jabu ma giliyo maber me aketa i wi meja, caanine ki atabone me odok eceta, ki weerre, ki cupane me liyo gityer amata,

Tiyo okar-mac

¹⁷ En dok otiyo okar-mac ki jabu ma giliyo maber. Tedi okar-mac ki bolle oteto ki nyol; kikopone, en aye wene ki ature ducu, obedo ma gukubbe k acel kwede.

¹⁸ Jaŋe onoŋo tye abicel ma gujany guryeyo gukaco i Jete ryoryo; jaŋ okar-mac adek ma guryeyo i bute tun cel, ki jaŋ okar-mac adek ma guryeyo i bute tuŋ cel, ki jaŋ okar-mac adek ma guryeyo i tuŋ mukene-ni.

¹⁹ I kom jaŋe tuŋ cel obedo iye kikopo adek ma gitimo macalo tur yaa, kun acel acel tye ki wene ki ature, ki i kom jaŋe tuŋ mukene bene obedo iye kikopo adek ma gitimo macalo tur yaa, kun acel acel tye ki wene ki ature; jaŋe abicel ma guryeyo gukaco okar-mac-ci gubedo kit meno.

²⁰ Ka dok i kom okar-mac kikome-ni onoŋo tye iye kikopo aŋwen ma gitiyo macalo tur yaa, ki wengi ki aturegi,

²¹ ki wene ma okubbe i kom okar-mac-ci i te jaŋe abicel ma guryeyo ryoryo i kom okar-mac.

²² Wengi ki jaŋgi obedo ma gukubbe kacel, kun kome ducu obedo me jabu ma giliyo maber ma giteto ki nyol.

²³ Otiyo mac laputte abiro, ki magacce, ki caanine ki jabu ma giliyo maber,

²⁴ Oyubo okar-mac ki jami ticce ducu ki jabu ma giliyo maber ma pekke oromo ratili miya acel.

Tiyo keno tyer me wago odok eceta

²⁵ Otiyo keno tyer me waŋo odok eceta ki yat lalwii; borre obedo futi acel ki nucu, ki lacce bene futi acel ki nucu; obedo ma twoke aŋwen ma rom, Borre tuŋ malo oromo futi adek; obedo ki ten keno aŋwen ma gukubbe i kome.

²⁶ Omwono kome woko ducu ki jabu ma giliyo maber, wiye ki bute ki ten keno ducu; olulo doge ducu orumo woko ki jabu.

²⁷ Otiyo agit me jabu aryo oketogi i te doge ma gilulo-ni, kun agit acel okemme ki wadi tuŋ cel, me rwako iye tal me tiŋone.

²⁸ Otiyo tal ki bao yat lalwii, omwono komgi woko ki jabu.

Tiyo moo wir ki odok eceta.

²⁹ Otiyo moo maleŋ me wir bene, ki odok eceta ma ŋwece kur ma giliyo maber, ma girubo kit macalo larub gin ma ŋwe kur timo-ni.