Buk me Aryo pa Moses ma Gilwoŋo Nia 36 - Acoli Baibul

¹ “Bejalel ki Okoliab ki jo ducu ma kwiri i tic, ma Rwot oketo kwiri me tic i igi, ki niaŋ matut, me ŋeyo ki me tiyo tic ducu me tic i kabedo maleŋ, gibitiyo kun gilubo kit ducu ma yam Rwot ociko.”

Dano gutyero mot madwoŋ

² Moses olwoŋo Bejalel ki Okoliab ki jo ducu ma kwiri i tic, ma Rwot onoŋo oketo kwiri me tic i igi, dano ducu ma cwinygi olyetto pi bino ka tic;

³ ci gugamo ki bot Moses mot ducu ma jo Icrael gutyero pi tic i kom kabedo maleŋ, Pud onoŋo gimedde ameda ki kelo gityer ma igi opwoyo odiko odiko.

⁴ Pien lukwiri tic ducu ma gitiyo kwa tic mo ma i kom kabedo maleŋ gubino, kun ŋat acel acel oa ki i dog tic ma en tiyo,

⁵ ci guwaco bot Moses ni, “Dano doŋ gukelo madwoŋ mukato ma yam mitte pi tic ma Rwot ocikowa ni wati.”

⁶ Kit meno omiyo Moses ocwalo cik, lokke gitito oromo i gony ducu ni, “Pe dok laco mo kadi dako mo otim gin mo me gityer pi kabedo maleŋ.” Ci gijuko dano pe dok gukelo;

⁷ pien jami ma gukelo onoŋo doŋ oromo tiyo tic ducu, ki makato bene.

Tiyo kema

⁸ Jo ducu ma kwiri i tic ma yam gitye i kin lutic gutiyo kema ki boŋo cuka apar, ma gitiyogi ki boŋo camanini ma giwiyo maberre, ki uci ma bulu ki ma lamar lamar ki makwar, kun gicweyo iye cal lukerubi ma gitiyogi ki diro.

⁹ Bor boŋo cuka acel acel onoŋo oromo yadi apar wiye aŋwen, ki lacce romo yadi aryo; boŋo cuka ducu gubedo marom.

¹⁰ Oribo boŋo cuka abic kacel, ki abic mu kene bene oribo kacel kit meno.

¹¹ Ci okwoyo waŋ jarara ma bulu i dog boŋo cuka me dul mukwoŋo mugikoni, ka dok okwoyo waŋ jarara i dog boŋo cuka me dul me aryone mugiko-ni, ma rom ki wadi,

¹² Okwoyo waŋ jarara pyerabic i dog boŋo cuka acel, ki waŋ jarara pyerabic i dog boŋo cuka me aryone, kun waŋ jarara kemo wadi.

¹³ Dok otiyo jarara gol me jabu pyerabic, ci oribo dog boŋo cuka ki jarara gol-li; ci kema obedo mukubbe kacel likiŋ.

¹⁴ Dok otiyo boŋo cuka me yer dyegi bene me laum wi kema; otimo cuka apar wiye acel,

¹⁵ Bor pa cuka acel acel romo yadi apar wiye abic, lac pa cuka acel acel romo yadi aryo; boŋo cuka apar wiye acel-li ducu girom.

¹⁶ Oribo cuka abic kacel pat kengi, ki cuka abicel bene kacel pat kengi.

¹⁷ Okwoyo waŋ jarara pyerabic i dog cuka me dul mukwoŋo mugiko-ni, dok okwoyo jarara pyerabic me dul mukene mugikoni.

¹⁸ Otiyo jarara gol me mola pyerabic me ribo dog kema kacel, wek obed mukubbe kacel likiŋ,

¹⁹ Dok okwoyo laa nyogi romi ma ginyoŋo, ki laa dyegi, me umo wi kema.

²⁰ Dok otiyo guti me bao ‘yat lalwii, ma ocuŋ atir pi kema.

²¹ Bor pa guti obedo futi apar wiye abic, ki lacce futi aryo, i kom guti acel acel.

²² Guti acel acel obedo ki tyene aryo me kubogi kacel; otiyo guti me kema ducu kit meno.

²³ Otiyo guti me kema kit man: guti pyeraryo i tuŋ acuc.

²⁴ Ka dok otiyo tedi tere me ryal ma romo pyeraŋwen me kubo iye guti pyeraryo-nu; tedi tere aryo aryo pi guti acel acel, pi tyene aryo.

²⁵ Ka dok pi kema tuŋ me aryone, ma tuŋ acam, otiyo guti pyeraryo

²⁶ ki tedi tere me ryal ma romo pyeraŋwen, tedi tere aryo aryo pi guti acel acel.

²⁷ Ki pi ne kema, ma tuŋ porocen, en otiyo guti abicel.

²⁸ Ka dok otiyo guti aryo me twok kema ma i ŋeye.

²⁹ Gipoko kingi ki tuŋ piny, ento giribo doggi ki tuŋ wigi malo i kom agit mukwoŋo; otiyo aryo ma kit meno pi twoke aryo.

³⁰ Yam tye guti aboro ki tedi tergi me ryal; tedi tergi obedo apar wiye abicel; i te guti acel acel bedo iye tedi tere aryo.

³¹ Otiyo rii me bao yat lalwii abic pi guti me kema tuŋ cel,

³² ki rii bao abic pi guti me kema tuŋ cel, ki rii bao abic pi guti me kema me ŋeye tuŋ potoceŋ.

³³ Ka dok otiyo rii bao ma i dyere ma oa ki i agikki tuŋ cel nio wa i agikki tuŋ cel ma oŋolo kor guti ari.

³⁴ Ci omwono kom guti woko ki jabu, ka otiyo agit me jabu me rwako bao iye; ki rii bao bene omwono komgi woko ki jabu.

³⁵ Ka dok otiyo boŋo kicika me uci ma bulu ki ma lamar lamar ki makwar, ki boŋo camanini ma giwiyo maberre; otiyo ma gicweyo iye lukerubi ki tic me diro.

³⁶ Otiyo pire wir aŋwen me bao yat lalwii, ci omwono komgi woko ki jabu; golgi obedo me jabu, ci oliyo tedi tergi me ryal aŋwen.

³⁷ Dok onyo boŋo cuka me laum doggola me kema ki uci ma bu lu ki lamar lamar ki makwar, ki boŋo camanini ma giwiyo maberre, ma gidero maber.

³⁸ Dok otiyo wirre abic, ki golgi, Omwono wigi woko, ki otacgi bedo me jabu, ento tedi tergi abic obedo me mola.