Buk me Aryo pa Moses ma Gilwoŋo Nia 34 - Acoli Baibul

Gityeŋo kidi ma apada me aryone

¹ Rwot owaco bot Moses ni, “Tyeŋ kidi ma apada aryo macalo mukwoŋo ca, ci abicoyo i komgi lok ma nene acoyo i kom kidi mukwoŋo-ni, ma yam ityero woko-ni,

² Bed ma iyubbe odiko, ci ibin malo odiko i wi got Cinai, icuŋ i nyima i wi got.

³ Pe ŋatti mo bibino kwedi malo, pe ŋatti mo onen i wi got ducu; romi ki dyaŋi pe gucam nyim got.”

⁴ Ci Moses otyeŋo kidi aryo ma apada macalo mukwoŋo ca; ci oa malo odiko con, oito i wi got Cinai, kit macalo Rwot ocike, otero kidi ma apada ma omako i-ciŋe.

⁵ Ci Rwot olor piny i pol, ocuŋ kacel kwede kunnu, ci otuco nyiŋe.

⁶ Rwot okato ki i nyime kun tucce ni, “Rwot, Rwot, Lubaŋa ma lakica dok maro dano, kiniga pe make oyot, marre ma pe lokke dwoŋ, en lagen mada.

⁷ En gwoko mar ma pe lokke pi jo alip ki alip, kun weko rocgi, ki tim aranyigi ki balgi. En pe kwanyo kop i kom lubalo, ento keto can i kom likwayogi ki i kom likwayo pa likwayogi nio i yalwak me adek ki me aŋwen.”

⁸ Moses orune oyot, okulo wiye piny i ŋom, oworo Lubaŋa.

⁹ Owaco ni. “Koni doŋ ka ayomo cwinyi, ai Rwot, alegi in Rwot iwot kwedwa, kadi bed waŋ jo ma ŋutwa tek; itimwa kica pi rocwa ki balwa, imiwa wabed lwakki.”

Ginwoyo gicikke

¹⁰ Rwot dok owaco ni, “Nen aketo gicikke. Abitiyo gin me aura’ mapol i nyim lwakki ducu, ma yam peya otine i lo bo ducu nyo i rok mo; ci jo ducu ma wubedo i kingi gibineno tic pa Rwot; abitiyo kwedwu gin ma kelo atiba i kom dano.

¹¹ “Gwok lok ma aciki iye tin. Nen, abiryemo jo Amor woko ki i nyimi, ki jo Kanaan, jo Kit, jo Periji, jo Kiv ki jo Jebuc.

¹² Gwokke pe iket gicikke mo ki jo ma bedo i lobo-nu, wek pe odok owic i kinwu.

¹³ Ento wumuk keno jogigi woko, wuret wir jogigi piny, wutoŋ yadi ma gipito ka ma giworo iye jok ma dako ma gilwoŋo Acera.

¹⁴ Pe myero wuwor lubaŋa mukene, pien Rwot, ma nyiŋe Lanyeko, en Lubaŋa ma lanyeko.

¹⁵ Gwok iket gicikke mo ki jo ma bedo i lobo-nu: pien ka giworo lubaŋagi ki tim kwele kwele, nyo gityero gitum bot lubaŋagi, ce ŋatti mo olwoŋi, miyo ibicamo gin ma en otumo.

¹⁶ Dok ka inyomo anyiragi ki awobeni, ce anyiragi gitimo abor pi woro lubaŋagi, ci miyo awobeni bene giworo lubaŋagi ki tim kwele kwele.

¹⁷ “Pe iti cal lubaŋa mo me nyonyo aliya piri keni.

¹⁸ “Ibikwero nino madito me Mugati ma Tobi Pe Iye, Ibicamo mugati ma tobi pe iye pi nino abiro macalo yam acikowu, i kare ma giciko, i dwe me Abib; pien yam ia woko ki i lobo Ejipt i dwe me Abib.

¹⁹ “Litino kayo ducu mega, litino twonini, litino kayo me dyaŋi ki me romi.

²⁰ Latin kayo pa kana ibikoko ki latin nyok romo, nyo ka pe ikoko, ci itur ŋute woko. Litino kayo ducu ma gin litino awobeni ibikokogi. Dano mo pe obin i nyima ki ciŋe noŋo.

²¹ “Ibitic nino abicel, ento i nino me abiro ibiywe iye; wa i kare me pur ki i kare me kac bene ibiywe.

²² Ibibedo ki nino madit me kwero agikki cabit abiro, en aye wi mwaka me kayo naŋo mukwoŋo cek; ki nino madito me nyonone i dero i tum mwaka,

²³ Joni ma co ducu gibibino i nyim Rwot Lubaŋa, Lubaŋa pa Icrael, tyen adek i mwaka acel.

²⁴ Pien abiryemo lurok woko ki i nyimi, abimiyo waŋ loboni bedo malac; ŋatti mo bene pe bibedo ki miti i kom loboni i kare ma ibiwot ka nen i nyim Rwot Lubaŋawu tyen adek i mwaka acel acel.

²⁵ “Pe ityer remo me gitumma kacel ki tobi; pe giwek gitum me nino madit me Kato (Paska) obed nio wa odiko,

²⁶ “Cam mukwoŋo cek i potoni me wi mwaka myero ikel i ot pa Rwot Lubaŋani, “Pe ited riŋo latin dyel ki cak pa minne.”

²⁷ Rwot owaco bot Moses ni, “Co lok magi; pien doŋ acikke kwedwu, in ki jo Icrael, ki gicikke ma lubo lok magi ducu.”

²⁸ En obedo kunnu kacel ki Rwot nino pyeraŋwen, dyeceŋ ki dyewor, kun pe camo dok pe mato pii bene. Ci ocoyo lok me gicikke i kom kidi ma apada, gin aye cik apar-ri,

Moses olor piny ki i wi got

²⁹ Ka lacen Moses olor piny ki i wi got Cinai, ma omako kidi ma apada aryo me lok me caden i ciŋe. I kare ma en lor piny ki wi got, onoŋo Moses pe ŋeyo ni tur nyime tye ka ryeny, pien onoŋo obedo ka lok ki Lubaŋa.

³⁰ Ka Aron ki jo Icrael ducu guneno Moses, ci nen, tur nyime obedo ka ryeny; ci gulworo cito bote cok.

³¹ Ento Moses olwoŋogi; ci Aron ki lutel wi lwak ducu gucako dok bote, Moses oloko kwedgi.

³² Ka lacen jo Icrael ducu gucito bote cok, ocako miyogi cik ducu ma Rwot otitte i wi got Cinai,

³³ Ka doŋ Moses otyeko lok kwedgi, ci umo tur nyime ki boŋo;

³⁴ ento i kare ducu ma Moses cito i nyim Rwot ka lok kwede, kwanyo boŋo woko ki i tur nyime, nio wa ka dwogone; ka okatti woko ci tito ki jo Icrael lok ma gicike kwede,

³⁵ Ka jo Icrael gineno tur nyim Moses, gineno ni del tur nyim Moses ryeny; ci Moses dok umo tur nyime woko ki boŋo, nio ka dok cito ka lok kwede.