Buk me Aryo pa Moses ma Gilwoŋo Nia 33 - Acoli Baibul

Cik me a woko ki i te got Cinai

¹ Rwot owaco bot Moses ni, “Wua woko ki kany, in ki lwak ducu ma yam ikwanyogi woko ki i lobo Ejipt, pi terogi i lobo ma yam akwoŋo pire bot Abraim, Icaka, ki Yakobo, kun acikogi ni, abimiyo bot likwayogi.

² Dok abicwalo lamalaika i nyimgi, ci abiryemo jo Kanaan woko, ki jo Amor, jo Kit, jo Periji, jo Kiv ki jo Jebuc.

³ Cit malo i lobo ma mol cak ki moo kic; ento an pe abicito kwedwu kunnu, wek pe arid wiwu woko iyo, pien wun jo ma nutwu tek.”

⁴ Ka lwak giwinyo lok man marac-ci, ci gukumo; pe tye dano mo ma orukke me deyo.

⁵ Pien onoŋo Rwot owaco bot Moses ni, “Wac bot jo Icrael ni, ‘Wun wu jo ma ŋutwu tek; kono ka acito kwedwu kunnu pi kare manok mo, kono arido wiwu woko cut. Kombeddi doŋ wuluny ruk me deyowu woko ki i komwu, wek aŋe gin ma abitimo i komwu.’ ”

⁶ Mumiyo jo Icrael gulunyo ruk me deyogi woko, nia ki i te got Koreb ki cito kwede anyim.

Kema me rwatte

⁷ I kare meno Moses obedo ka tero kema, ci guro woko i ne gony, ka mabor ki gony; ci olwoŋo ni, kema me rwatte. Ci ŋat ma yenyo Rwot cito woko i kema me rwatte, ma tye woko i ŋe gony.

⁸ I kare ducu ma Moses kato cito woko i kema me rwatte, lwak ducu gia malo, kun ŋat acel acel cuŋ i nyim dog kemane, ka neno kor Moses nio ka odonyo wa i kema.

⁹ Ka Moses odonyo i kema, ci wir me pol dwogo piny cuŋ i doggola kema me rwatte, ci Rwot loko ki Moses.

¹⁰ Ka lwak dano ducu guneno wir me pol ma ocuŋ i dog kema, ci dano ducu gia malo, giworo Lubaŋa, kun ŋat acel acel tye i dog kemane.

¹¹ Kit meno Rwot yam loko ki Moses waŋ ki waŋ, macalo dano loko ki lareme, Ka Moses odok i gony, Yocwa wod pa Nun, latin awobi ma lakony en, yam doŋ i kema.

Rwot ociko ni ebibedo kwedgi

¹² Moses owaco bot Rwot ni, “Nen, in onoŋo iwacca ni, ‘Kwany jo man woko;’ ento pe imiya aŋeyo ŋat ma ibicwalo acito kwede. Ento iwacci, ‘Aŋeyo in ki nyiŋi, ki in bene iyomo cwinya.’

¹³ Koni doŋ alegi, ka onoŋo ayomo cwinyi, nyutta kiti, wek aŋeyi, anoŋ gum ki boti. Dok itam bene ni, rok man gin aye lwakki.”

¹⁴ Ci Rwot ogamo ni, “An kikoma abiwot kwedi, abimiyi iywe mot.”

¹⁵ Dok owacce ni, “Ka in kikomi pe ibicito kweda, ci pe ikwanywa woko ki kany.

¹⁶ Pien binene niŋniŋ ni anoŋo gum ki boti, an kacel ki lwakki? Pe pi in ma iwoto kwedwa-ni mumiyo waŋen pat? An, kacel ki lwakki, wapat ki jo mukene ducu ma gitye i wi lobo.”

¹⁷ Rwot owaco bot Moses ni, “Abitiyo gin man ma iwaco-ni kikome; pien iyomo cwinya, dok aŋeyo in ki nyiŋi.”

¹⁸ Moses ogamo ni, “Alegi inyutta deyoni.”

¹⁹ Rwot ogamo ni, “Abimiyo berra ducu kato ki i nyimi, ka dok abituco nyina ni, ‘A Rwot’; abinyuto berra bot ŋat ma abinyuto berra bote, dok abitimo kica bot ŋat ma abitimo kica bote.”

²⁰ Rwot dok owaco ni, “Ento pe ibineno waŋa; pien dano pe neno waŋa ci bedo kwo.”

²¹ Ci Rwot owacci, “Nen, kabedo mo tye ka ŋeta ka ma ibicuŋ iye i kom got.

²² Ka deyona bikato ki kenyo, ci abiketi i kin got ma obar, ci abiumi woko ki ciŋa nio ka akato otum;

²³ ka doŋ abikwanyo ciŋa woko, ci ibineno neya; ento waŋa pe ibinenone.”