Buk me Aryo pa Moses ma Gilwoŋo Nia 30 - Acoli Baibul

Keno tyer me odok eceta

¹ “Ibitiyo keno tyer me waŋo odok eceta; ibitiyo ki bao yat lalwii.

² Borre obed futi acel ki nucu, ki lacce bene futi acel ki nucu; borre ki Lacce bibedo marom, Borre tuŋ malo obed futi adek; ten keno aŋwen ducu bene gubed ma gukubbe kacel kwede.

³ Ibimwono kome woko ki jabu ma giliyo maber, wiye ki bute ducu, ki ten keno aŋwen ducu; dok ibilulo doge ducu, irumo woko ki jabu.

⁴ Ibitimo agit me jabu aryo pire; ibiketo agit ki piny i te doge ma ilulo-ni, kun agit acel acel okemme ki wadi tun cel, ci ibirwako iye tal me tinone,

⁵ Ibitiyo tal ki bao yat lalwii, ibimwono komgi woko ki jabu.

⁶ Ibiketo keno tyer man i nyim oono kicika ma umo canduk lok me caden, i nyim kom me kica ma i wi canduk lok me caden, ka ma abirwatte iye kwedi.

⁷ Ci Aron biwaŋo iye odok eceta ma ŋwece kur. Nino ducu ka en yubo mac laput odiko, ci biwaŋone;

⁸ dok ka Aron keto mac laput malo otyeno, ci biwaŋone, Kit meno gibiwaŋo odok eceta nino ducu i nyim Rwot, wa i kare pa likwayowu ducu.

⁹ Pe wubityero iye odok eceta mo ata, kadi gitum awaŋa, kadi gityer me moko kwon; dok pe wuony iye gityer amata.

¹⁰ Aron myero otim gin lakwany bal i kom ten keno aŋwen ducu ma i kome i mwaka acel kicel; en bitimo gin lakwany bal ki i kome ki remo me gitum me bal me lakwany bal i mwaka acel kicel wa i kare pa likwayowu ducu: en aye gin maleŋ makato bot Rwot.”

Lim me lakwany bal

¹¹ Rwot owaco bot Moses ni

¹² “Ka icako kwaŋo wei jo Icrael, ci ŋat acel acel bimiyo gin lakok kwone kene bot Rwot ka ikwaŋogi, wek two gemo pe opot i komgi ka ikwaŋogi,

¹³ Dano acel acel ka ikwano welle bimiyo gin man: nucu cekel me kabedo maleŋ (cekel acel rom ki gera pyeraryo); nucu cekel meno bibedo gityer bot Rwot.

¹⁴ Dano ducu ki acel acel ma doŋ gikwano welle, cakke i kom jo ma ditogi romo mwaka pyeraryo ki makato, bimiyo gityer bot Rwot.

¹⁵ Lalonyo pe bimiyo madwoŋ, dok lacan bene pe bimiyo matidi ma pe rom ki nucu cekel, i kare me miyo gityer bot Rwot me lakwany bal ki i komwu.

¹⁶ Ibigamo lim me lakwany bal ki bot jo Icrael, i biketo pi tic me kema me rwatte, wek obed me po pi jo Icrael i nyim Rwot pi kwanyo bal ki i komwu.”

Otakolwok

¹⁷ Rwot owaco bot Moses ni

¹⁸ “Dok ibitiyo otako mola, ki tedi tere bene me mola, obed me lwok. Ibicibo cuŋ i kin kema me rwatte ki keno tyer; ka doŋ ibionyo iye pii;

¹⁹ en aye ka ma Aron ki awo bene gibilwoko iye ciŋgi ki tyengi.

²⁰ I kare ma gicito i kema me rwatte, nyo ka gicito cok ki keno tyer ka tic iye, me waŋo gityer ma giwaŋo ki mac bot Rwot, koŋ gibilwokke ki pii, wek pe guto.

²¹ Gibilwoko ciŋgi ki tyengi wek pe guto; bibedo cik botgi matwal, bote ki bot likwaye, wa i kare pa likwayogi ducu.”

Moo wir

²² Dok Rwot omedde owaco bot Moses ni,

²³ “Kwany aŋwece mabecone makato: murra maliyo ma romo cekel miya abic, cinamon ma ŋwece mit ma romo cekel miya aryo ki pyerabic, ma en aye nucune, lum ma ŋwece kur ma roma miya aryo ki pyerabic,

²⁴ kaciya cinamon miya abic, ma gipimo ki cekel me kabedo maleŋ, ki moo jeituni ma romo cupa apar.

²⁵ Man aye ibitimo ki moo maleŋ me wir ma girubo i kit macalo larub moo ma ŋwe kur rubo kwede; bibedo moo wir maleŋ,

²⁶ Ibiwiro ki kema me rwatte ki canduk lok me caden,

²⁷ ki meja ki jami ticce ducu, ki okar-mac tara ki jami ticce ducu, ki keno me odok eceta,

²⁸ ki keno tyer me gitum awaŋa ki jami ticce ducu, ki otako lwok ki tedi tere.

²⁹ Ibikwerogi wek gubed jami maleŋ makato; gin ducu ma bigudo komgi bidoko maleŋ.

³⁰ Dok ibiwiro Aron ki awobene, me kwerogi wek guti bota tic me ajwagi.

³¹ Dok ibiwaco ki jo Icrael ni, ‘Man aye bibedo moona maleŋ me wir, wa i kare pa likwayowu ducu.

³² Pe gibionyo i kom dano mo ata, pe wubitiyo mukene ma girubo macalo en; en moo maleŋ, bibedo maleŋ botwu bene.

³³ Dok ŋat ma birubo macalo meno, nyo ŋat ma biwiro i kom dano mo ata, waŋe birwenyo woko ki i kin lutugi.’ ”

Odok eceta

³⁴ Rwot owaco bot Moses ni, “Kwany aŋwece makur, citakte ki onika ki galbanu, aŋwece makur, ki odok luban ma giliyo maber, (pekgi ducu obed marom)

³⁵ ci itim ki odok eceta maleŋ ma, giliyo maber, ma girubo i kit macalo larub gin ma ŋwe kur rubo kwede, ci ipwor iye kado.

³⁶ Mukene ibiluro iŋido matitino twatwal, ci iket mogo i nyim canduk lok me caden ma i kema me rwatte ka ma abirwatte iye kwedi; bibedo botwu gin maleŋ makato.

³⁷ Pe wubitimo piwu kenwu odok eceta ma irubo macalo meno; bibedo gin maleŋ bot Rwot ki tuŋ botwu.

³⁸ Ŋat ma birubo gin me aŋweya macalo meno, waŋe birwenyo woko ki i kin lutugi.”