Buk me Aryo pa Moses ma Gilwoŋo Nia 29 - Acoli Baibul

Kwero Aron ki awobene pi tic maleg

¹ “Man aye gin ma ibitimo i komgi ka ikwerogi, wek guti bota tic me ajwagi. Kwany wod twon acel ki nyogi romi aryo ma mwonyo pe i komgi,

² ki mugati ma tobi pe iye, ki capat ma tobi pe iye ma girubo ki moo, ki capat marep ma gireyo moo i komgi; ibitimogi ki moko ŋano ma pwotte.

³ Ibiketogi i aduku acel, ci ikelogi ki aduku-nu, ka ikel, bene wod twon ki nyogi romi aryo.

⁴ Ibikelo Aron ki awobene i nyim doggola kema me rwatte, ci ilwok komgi woko ki pii.

⁵ Ibikwanyo boŋŋi aruka, ci iruko Aron ki kanyi, ki jor me epod, ki epod, ki kicaa kor, ci itwe pyere ki ceme me epod ma gicweyo ki diro;

⁶ ibidwalo kitambara adwala i wiye, ka iketo lakukana maleŋ cuŋ i wi kitambara adwala,

⁷ Ka ibikwanyo moo me wir, iwiro kwede,

⁸ Ka dok ibikelo awobene, irukogi ki kanyi,

⁹ ci ibitweyo pyergi ki kitambara, ka itwe gitok matino i wigi; ci tic me ajwagi bibedo megi pi cik ma bibedo matwal. Ibiketo Aron ki awobene i dog ticgi kitmeno.

¹⁰ “Dok ibikelo twon i nyim kema me rwatte, ci Aron ki awobene gibiketo ciŋgi i wiye,

¹¹ ka doŋ ibineko wod twon-nu i nyim Rwot, ki i doggola kema me rwatte.

¹² Ibigwelo remo twon, ci ireyo remone i kom ten keno aŋwen me keno tyer ki lwet ciŋi; ki remo mudoŋŋe ibionyo i te tedi keno tyer.

¹³ Ibikwanyo dwolo ducu ma oumo jam iye, ki okene ma i kom cwiny, ki olaŋ aryo ki dwolo ma tye i komgi, ci iwaŋgi woko i wi keno tyer,

¹⁴ Ento riŋo wod twon-nu ki pyenne ki wee iye-gu, ibiwaŋo awaŋa ki mac wa i ŋe gony; en aye gitum me bal.

¹⁵ “Ka man otum ci ibikwanyo nyok romo acel imiyo Aron ki awo bene giketo ciŋgi i wiye

¹⁶ ci ibineko nyok romo, ibijolo remone, ci icoro remone i kom keno tyer irumo kwede kome ducu.

¹⁷ Dok ibinido riŋo nyok romo matitino ci ilwoko jam iye, ki tyene ducu, ci iketogi i kom riŋo ma giŋido-ni, kacel ki wiye,

¹⁸ ibiwaŋo riŋo nyok romo woko ducu ki berre i wi keno tyer; en aye gitum awaŋa bot Rwot; en aye gin ma ŋwece kur me layom cwiny, gityer ma giwaŋo ki mac bot Rwot.

¹⁹ “Ka lacen dok ibikwanyo nyok romo mukene; ci Aron ki awobene gibiketo ciŋgi i wiye,

²⁰ ci ibineko nyok romo, igwelo remone ci ireyo i ogwilo it Aron malacuc, ki i ogwilo it awo bene malacuc, ki i kom twon nyig tyengi malacuc, ci ibicoro remo mudoŋŋe i kom keno tyer irumo kwede kome ducu,

²¹ Ka ibikwanyo remo manok ma i wi keno tyer, ki moo wir, ci ikirogi i kom Aron ki i kom boŋŋi arukane, ki i kom awobene ki i kom boŋŋi aruka pa awobene, ci en ki boŋŋi arukane gibibedo maleŋ, kacel ki awobene ki boŋŋi arukagi bene.

²² “Dok bene ibikwanyo dwolo nyok romo, ki moo yibe, ki dwolo ma oumo jam iye, ki okene ma i kom cwiny, ki olaŋ aryo kacel ki dwolo ma tye i komgi, ki em tun lacuc, (pien obedo nyok romo me keto dano i dog tic),

²³ ki mugati acel ki capat acel ma girubo iye moo, ki capat marep acel ma i aduku me mugati ma tobi pe iye ma tye i nyim Rwot;

²⁴ ci ibiketogi ducu i dye ciŋ Aron ki i dye ciŋ awo bene bene, wek gikwatgi me bedo gityer akwata i nyim Rwot.

²⁵ Ka dok ikwany woko ki i ciŋgi, iwaŋgi woko i wi keno tyer me ameda i kom gitum awaŋa, obed gin ma ŋwece kur ma yomo cwiny Rwot; en aye gityer ma giwaŋo ki mac bot Rwot.

²⁶ “Dok ibikwanyo gok nyok romo me keto Aron i dog ticce, ci ikwat me bedo gityer me akwata i nyim Rwot; en aye bibedo waŋ wat ma tuŋ boti,

²⁷ Dok ibikwero gok me gityer me akwata, ki em me waŋ wat pa ajwagi, ma gikwato, ma gityero nia ki i kom nyok romo me keto dano i dog tic, pien en aye pa Aron ki pa awobene,

²⁸ Bibedo waŋ wat pa Aron ki pa awobene ma myero jo Icrael gumi botgi dikdik, pien en aye waŋ wat pa ajwagi ma jo Icrael myero gutyer nia ki gitumgi me gityer lakwecwiny, en aye gityergi bot Rwot.

²⁹ “Boŋŋi aruka pa Aron maleŋ ducu bibedo pa likwaye ma bilube; gibiruko i komgi ka giwirogi ki moo, me ketogi i dog tic.

³⁰ Latin awobi ma bileyo kakare i t ic me bedo ajwaka birukogi tyeko kwede nino abiro, i kare ma en ci to i kema me rwatte ka tic i kabedo maleŋ.

³¹ “Ibitero riŋo nyok romo me ketogi i dog tic, ci itedo i kabedo mo maleŋ;

³² ci Aron ki awobene gibicamo riŋo nyok romo-nu ki mugati ma tye i aduku, i doggola kema me rwatte.

³³ Gibicamo jami meno ma gitiyo kwede me lakwany bal pi ketogi i dog tic ki kwerogi pi tic maleŋ, ento jo mukene pe gibicamone, pien gin jami maleŋ.

³⁴ Ka riŋo mo me ketogi i dog tic, nyo mugati mo, odoŋ nio odiko, ci ibiwaŋo mudoŋ-ŋi awaŋa ki mac; pe dok gibicamo, pien leŋ,

³⁵ “Ibitimo i kom Aron ki awobene kameno, kit macalo aciki kwede ducu; ibitiyo tic me ketogi i dog ticgi pi nino abiro;

³⁶ dok ibityero twon acel pi gitum me bal nino ducu me lakwany bal. Dok ibitumo gitum me bal pi keno tyer, ka itimo gin lakwany bal ki i kome, dok ibiwire ki moo pi kwerone.

³⁷ Ibitimo gin lakwany bal ki i kom keno tyer, ibikwere pi nino abiro, miyo keno tyer doko maleŋ maka to; gin ducu ma bigudo ke no tyer bidoko maleŋ,

Tyer me nino ducu

³⁸ “Magi aye gin ma ibityero i wi keno tyer: nyogi romi aryo ma ditogi romo mwaka acel acel en aye ibityerogi nino ducu,

³⁹ Ibityero nyok romo acel odiko ki nyok romo acel ibityero otyeno.

⁴⁰ Kacel ki romo mukwoŋo-ni ibityero moko kwon mapwotte ma romo agwata acel ma girubo ki moo nyig jeituni ma giodo aoda ma romo cupa aryo ki nucu, ki vino ma romo cupa aryo ki nucu, me bedo gityer amata.

⁴¹ Nyok romo mukene ibityero otyeno, kacel ki gityer me moko kwon ki gityer amatane, macalo me odiko, pi bedo gin ma ŋwece kur ma yomo cwiny, gityer ma giwaŋo ki mac bot Rwot.

⁴² Bibedo gitum awaŋa me nino ducu ma wubityero wa i kare pa likwayowu ducu, i doggola kema me rwatte i nyim Rwot, ka ma abirwatte iye kwedwu, pi lok kwedwu kunnu.

⁴³ Abirwatte ki jo Icrael kunnu, ci deyona bilonyogi gibedo maleŋ;

⁴⁴ abikwero kema me rwatte ki keno tyer; ka dok abikwero Aron ki awobene pi t icgi bota me bedo ajwagi.

⁴⁵ Dok abibedo i kin jo Icrael, abibedo Lubaŋagi.

⁴⁶ Gin giŋeyo ni an a Rwot Lubaŋagi, ma yam akwanyogi woko ki i lobo Ejipt wek abed i kingi; an a Rwot Lubaŋagi.