Buk me Aryo pa Moses ma Gilwoŋo Nia 28 - Acoli Baibul

Boŋo me aruka pa ajwagi

¹ “Kel omeru Aron cok boti kacel ki awobene, gua woko ki i kin jo Icrael, wek guti bota tic me ajwagi; gin ene: Aron ki awobe pe Aron, Nadab ki Abiu, Eleajar ki Itamar.

² Ibikwoyo boŋŋi maleŋ pi omeru Aron, me deyo dok mamwonya.

³ Dok ibiwaco bot jo makwiri ducu, ma apoŋo cwinygi ki kwiri, ni gukwo boŋo aruka pi Aron me kwero en pi tic me bedo, ajwakana.

⁴ Man aye boŋŋi aruka ma gibikwoyo: kicaa kor, epod, jor, kanyi ma giŋweko kome, kitambara adwala me wic ki kitambara latwe pyer; myero gikwogi gubed boŋŋi aruka maleŋ pi omeru Aron ki awobene pi ticgi me bedo ajwagina.

⁵ “Gibigamo jabu, uci ma bulu ki ma lamar lamar ki makwar, ki boŋo camanini ma giwiyo maberre.

⁶ Gibikwoyo epod ki jabu ki uci ma bulu ki ma lamar lamar ki makwar, ki boŋo camanini ma giwiyo maberre, ma gikwoyo ki diro.

⁷ Bibedo ki gin wi gwoke aryo ma gikubo i doge ryoryo, wek okubbe kacel.

⁸ Ceme ma i kome ma latwene ma gicweyo ki diro bibedo kit tic acel-lu, me jami acel-lu, en aye me jabu, uci ma bulu ki ma lamar lamar ki makwar, ki boŋo camanini ma giwiyo maberre.

⁹ Ibikwanyo litino kidi onik aryo, igor nyiŋ awobe pa Icrael i komgi,

¹⁰ nyiŋ awobe abicel i kom kidi onik acel, ki nyiŋ awobe mudoŋŋe abicel i kom kidi onik mukene-ni, kun ilubo kit dito me anywalligi.

¹¹ Macalo ladiro goro kom kidi, in bene ibigoro nyiŋ awobe pa Icrael i kom kidi aryo-nu: ibimwonogi i kom jabu ma giŋweko kome ki diro ma okwa ko tere.

¹² Ci doŋ ibiketo litino kidi aryo meno i gin wi gwok epod, gubed kidi me po pi awobe pa Icrael; Aron bitiŋo nyiŋgi i wi gwoke aryo ducu me po pigi i nyim Rwot,

¹³ Tim gin lakwak tere ki jabu ma giŋweko kome ki diro;

¹⁴ dok itim nyor aryo me jabu ma giliyo maber ma giminogi macalo tol; ka imwon tol nyor meno i kom gin lakwak tere.

¹⁵ “Dok ibikwoyo kicaa kor me ŋolo kop ki tic me diro; ibitiyo macalo tic i kom epod; ibitimo ki jabu, ki uci ma bulu ki ma lamar lamar ki makwar, ki boŋo camanini ma giwiyo maberre,

¹⁶ Ibibano iye aryo ma borre ki lacce rom ki dye ciŋ acel.

¹⁷ Ci ibimwono iye litino kidi me wel ma guryeyo tyen aŋwen.I tyeŋ mukwoŋo gibiketo iye cadiuc, topaj ki kabankel:

¹⁸ tyen me aryone obed emeradi, capir ki dayaman;

¹⁹ tyen me adekke obed jacint, agat ki ameticito;

²⁰ ki tyen me aŋwenne obed berul, onik ki jacipa; gibimwonogi i jabu ma giŋweko ki diro.

²¹ Litino kidi ducu bibedo apar wiye aryo ma nyiŋ awobe pa jo Icrael gigoro i komgi; gibibedo macalo kidi ma gigoro me agit, kun acel acel tye ki nyiŋ ma gigoro i kome muporo kaka apar wiye aryo.

²² Tim bene nyor aryo ki jabu ma giliyo maber ma giminogi macalo tol, me tweyo kicaa kor;

²³ ibitimo agit me jabu aryo, pi kicaa kor, ci iket agit aryo-nu i kom dog kicaa kor aryo.

²⁴ Dok irwak tol jabu aryo-nu odony i agit aryo ma gitye i kom kicaa kor-ri,

²⁵ ki dog tol aryo-nu ibimwonogi i kom gin lakwak tere aryo me jabu ma giŋweko ki diro-ni, me tweyo kicaa kor i gin wi gwok epod tuŋ nyime.

²⁶ Dok itim agit me jabu aryo, ci iketgi i twok kicaa kor aryo ducu i kom doge ma tuŋ iye ma cok ki epod.

²⁷ Tim agit jabu mukene doki, ci ikubgi i gin wi gwok epod aryo anyim tuŋ tere, ka ma okubbe tuŋ malo i wi ceme me epod ma gicweyo ki diro.

²⁸ Gibitweyo kicaa kor ki agitte i kom agit me epod ki tol ma bulu, wek gitwe obut opyelle i wi ceme me epod ma gicweyo ki diro, wek kicaa kor pe ogonnye woko ki i kom epod,

²⁹ Wek Aron otiŋ nyiŋ awobe pa Icrael i kicaa kor me ŋolo kop i pal cwinye i kare me donyo i kabedo maleŋ nino ducu, wek obed me po i komgi i nyim Rwot.

³⁰ I kicaa kor me ŋolo kop ibiketo iye Urim ki Tumim; gin bene gibibedo i pal cwiny Aron i kare ma en donyo i nyim Rwot; kit meno Aron bitiŋo ŋolo kop pa jo Icrael i pal cwinye nino ducu i nyim Rwot.

³¹ “Dok ibitimo jor me epod ma kome ducu obedo bulu.

³² Gituc doge obed twolo i dyere pi rwako wic; gibicweyo kun gidolo doge macalo dog boŋo aruka ma gidolo, orumo wo ko likiŋ, wek pe oyeci.

³³ I dog boŋo ibiluno iye gin muporo okwer pomegranat munyak ma gikwoyo ki uci ma bulu ki ma lamar lamar ki makwar, orum dog jor ducu, kun iŋobo kingi ki olan me jabu;

³⁴ olaŋ jabu ki okwer pomegranat orum dog jor ducu kun gigwennye agwenya.

³⁵ Aron biruko ka donyo ka tic, ci dwan olan bikok winnye i kare ma en donyo i kabedo maleŋ i nyim Rwot, ki i kare ma en kato woko, wek pe oto.

³⁶ “Ibitimo akwaya jabu ma giliyo maber, ci igor i ko me macalo agora i kom agit, ni, ‘Maleŋ pi Rwot.’

³⁷ Ci ibitweyo irido i kom kitambara adwala me wic-ci ki tol ma bulu; ibiketo i nyim kitambara adwala me wic,

³⁸ Gibiketo cun i tur nyim Aron, ci Aron bitiŋo alii me bal pi jami maleŋ ma jo Icrael gityero me bedo motgi maleŋ; bicuŋ i tur nyime jwijwi, wek Rwot ogamgi.

³⁹ “Ibicweyo kanyi ki boŋo camanini maberre ma giŋweko kome, itim kitambara me adwala i wic ki boŋo camanini maberre, ci itim bene kitambara me latwe pyer ma gidero maber.

⁴⁰ “Pi awobe pa Aron ibikwoyo kanyi ki kitambara latwe pyer, ki gitok matino; ibitimogi obed me deyo ki mamwonya.

⁴¹ Ibirukogi i kom omeru Aron kacel ki awobene, ibiwirogi ki moo me ketogi i dog tic, pi kwerogi pi tic maleŋ, wek guti bota tic me ajwagi.

⁴² Dok ibikwoyo pali boŋo camanini pigi me umo komgi nia i pyergi nio i emgi.

⁴³ Aron ki awo bene birukogi i kare me donyo i kema me rwatte, nyo i kare ma gicito cok ki keno tyer pi tic i kabedo maleŋ; wek pe gutiŋ alii me bal, miyo gito woko, Man bibedo cik matwal bote ki bot likwaye ma bilube.