Buk me Aryo pa Moses ma Gilwoŋo Nia 27 - Acoli Baibul

Keno tyer me gitum awaŋa

¹ “Ibitiyo keno tyer ki bao yat lalwii; borre obed futi abiro ki nucu ki lacce futi abiro ki nucu. Bor keno tyer ki lacce bibedo ma rom, ki borre tuŋ malo bibedo futi aŋwen ki nucu,

² Ibitimo ten keno i kom twoke aŋwen ducu; ten keno ducu gibikubbe kacel kwede, dok ibimwono kome woko ki mola.

³ Ibiyubo lajob burune, ki akwaya latokke, ki becen, ki gin lacob riŋo, ki weer lawaŋ mac; jami tic meno ducu ibiyubogi ki mola.

⁴ Yub keikeine bene me obwo mola, dok i twok obwo mola aŋwen-ni iket iye agit aŋwen me mola.

⁵ Ibiketo i te rii me keno tyer wek obwo obut i kor keno tyer.

⁶ Dok itim tal me keno tyer, tal me yat lalwii, ci ibimwono komgi woko ki mola.

⁷ Ibirwako tal donyo i agit ducu, wek tal orine i keno tyer tuŋŋi ki tuŋŋi me latiŋŋe.

⁸ Ibitiyo keno tyer ma iye twolo, ki bao; ti macalo yam ginyutti i wi got,

Dyekal me kema

⁹ “Ibitiyo dyekal me kema. I tuŋ acuc me dyekal gibiŋabo iye boŋo cuka camanini ma giwiyo maberre, ma borre tuŋ cel romo yadi pyerabic.

¹⁰ Wir bibedo pyeraryo, ki tedi tergi bene pyeraryo, me mola, ento gol me wir ki otacgi ducu gubed me ryal,

¹¹ Ki tuŋ acam bene borre obed kit meno, kunnu bene gibiŋabo iye cuka ma borre romo yadi pyerabic; wir obed pyeraryo ki tedi tergi pyeraryo, me mola, ento gol me wir ki otacgi ducu gubed me ryal.

¹² Ki bute ma tuŋ potoceŋ dyekalle bene gibiŋabo iye boŋo cuka ma borre romo yadi pyeraryo wiye abic; wir obed apar ki tedi tergi bene obed apar,

¹³ Lac dyekal ma tuŋ nyime ma tuŋ wokceŋ biromo yadi pyeraryo wiye abic.

¹⁴ Gibiŋabo boŋo cuka i ŋet doggaŋ tuŋcel ma romo yadi abiro ki nucu; wir obed adek ki tedi tergi adek,

¹⁵ Ki tuŋ mukene bene gibiŋabo iye boŋo cuka ma romo yadi abiro ki nucu; wirgi obed adek ki tedi tergi adek.

¹⁶ Doggaŋ me dyekal gibiumo ki boŋo cuka ma lacce romo yadi apar ma gitiyo ki uci ma bulu ki ma lamar lamar ki makwar, ki boŋo camanini ma giwiyo maberre, ma gidero maber; bibedo ki wir aŋwen ki tedi tergi aŋwen,

¹⁷ Wir murumo dyekal ducu bibedo iye otac me ryal; golgi bibedo me ryal, ki tedi tergi me mola.

¹⁸ Bor me dyekal biromo yadi pyerabic, ki lacce yadi pyeraryo wiye abic, ki borre tuŋ malo futi abiro ki nucu; gibiŋabo iye boŋo cuka camanini ma giwiyo maberre; tedi te wir bibedo me mola.

¹⁹ Jami tic ducu ma i kema ma konyo kwa tic ducu, kacel ki teke lagurre ducu, ki teke ma orumo dyekal ducu bibedo me mola.

Gwoko tara

²⁰ “Dok ibiciko jo Icrael ducu gukel moo me nyig jeituni ma giodo, giliyo maleŋ, me menyo piny, wek giket mac laput obed ka lyel nino ducu ma pe to.

²¹ Aron ki awbene gucan mac olyel i nyim Rwot nia otyeno nio odiko, kun giketo i kema me rwatte, ki woko i ŋe boŋo kicika ma i nyim canduk lok me caden. Man bibedo cik ma jo Icrael bigwoko matwal, wa i kare pa likwayogi ducu.