Buk me Aryo pa Moses ma Gilwoŋo Nia 24 - Acoli Baibul

Gimoko gicikke

¹ Dok Rwot owaco bot Moses ni, “Bin malo bota kany, in ki Aron, Nadab ki Abiu, ki ludoŋo pa jo Icrael pyerabiro, wuwora ki ka mabor.

² Moses keken aye binyiko cok bota. Jo mukene pe gibinyiko cok, dok lwak bene pe gibibino kwede malo.”

³ Moses ocito otito ki lwak lok ducu ma Rwot owaco, ki cikke ducu. Lwak ducu gugamo ki dwan acel kun giwaco ni, “Lok ducu ma Rwot owaco wabiti yo.”

⁴ Moses ocoyo lok ducu ma Rwot owaco. Oa malo odiko con, ocano keno tyer i te got, ki wir apar wiye aryo, muporo wel kaka pa jo Icrael apar wiye aryo.

⁵ Ci ocwalo awobe pa jo Icrael, ma gutyero gitum awaŋa dok gutumo twoni bot Rwot me gityer lakwecwiny,

⁶ Lacen Moses okwanyo nucu remo, oonyo i weer, ki nucu remo ocoro i kom keno tyer.

⁷ Ka dok okwanyo buk me gicikke, ci okwano bot lwak, guwinyo. Ci gugamo ni, “Gin ducu ma Rwot owaco wabitiyo, dok wabiworo doge bene,”

⁸ Ka Moses dok otiŋo remo, ocoro i kom lwak, kun wacci, “Nen remo me gicikke ma Rwot oketo kwedwu, ma lubo lok magi ducu.”

⁹ Ka Moses ki Aron, Nadab ki Abiu, ki ludoŋo pa jo Icrael pyerabiro-ni gucito malo,

¹⁰ ci guneno Lubaŋa pa Icrael. Gin mo obedo ka tyene macalo kidi capir ma bulu ma gipeto, ma ryeny macalo polo kikome.

¹¹ Ento Lubaŋa pe ogudo kom ludoŋo pa Icrael ki ciŋe; guneno Lubaŋa, ci gucamo dok gumato pii bene.

Moses i wi got Cinai

¹² Rwot owaco bot Moses ni, “Bin bota malo i wi got, ci ikura kunnu, Abimini kidi ma apada, kacel ki cik ki ginacika ma acoyo me pwonyo lwak.”

¹³ Ci Moses oa malo, kacel ki Yocwa ma lakonye, ka ocito i wi got pa Lubaŋa.

¹⁴ Owaco ki ludoŋo ni, “Wubed wukurwa kany, nio ka dok wadwogo botwu, Nen, Aron ki Kur gudoŋ botwu; ka ŋat mo tye ki lok mo, oter botgi.”

¹⁵ Ka Moses cito malo i wi got, ci pol oumo got woko.

¹⁶ Deyo pa Rwot obedo i kom got Cinai, ci pol oumo kema pi nino abicel. I kom nino me abirone, Rwot olwoŋo Moses ki i dye pol.

¹⁷ I kare meno deyo pa Rwot onen bot jo Icrael macalo mac arum i wi got,

¹⁸ Ka Moses odonyo i dye pol, ocito malo i wi got; ci Moses obedo i wi got nino pyeraŋwen, dyeceŋ ki dyewor.