Buk me Aryo pa Moses ma Gilwoŋo Nia 21 - Acoli Baibul

Cik me tic ki opii

¹ “Magi aye cik ma ibiketo i nyim lwak.

² Ka iwilo opii ma en Laibru, en bitic boti pi mwaka abicel i mwaka me abirone gibigonye woko laboŋo lim mo me kok, bicito gire,

³ Ka yam obino en kene, ci en bicito en kene; ka obino ma onyomo, ci bicito ki dakone.

⁴ Ka rwode aye onyomme dako ce onywalle awobe ki anyira, dako ki litinone gibidoŋ bot rwode, ci en bicito gire kene.

⁵ Ento ka opii meno oloko atir ni, ‘An amaro rwoda, ki dakona ki litinona; pe abicito,’

⁶ ci rwode bitere bot Lubaŋa, ci bitere wa i ŋet kika, nyo i kom okar me doggola; ka rwode bituco ite ki atero; ci doŋ en bitic bote matwal.

⁷ “Ka dano mo ocato nyare woko, macalo aŋeca, aŋeca meno pe gibigonyo macalo opii,

⁸ Ka en pe oyomo cwiny rwode, ma yam oyere-ni, en myero oye ni gikoke ki lim; ento pe bibedo ki twero me cate bot dano mo ma larok, pien obwole noŋo.

⁹ Ka yam oyere pi wode, ci en myero ogwoke macalo gwoko nyare.

¹⁰ Ka ce binyomo dakone mukene gire, pe ojwik camme, kadi boŋone, pe oteny en woko ata.

¹¹ Ka pe ocobo gin magi adek ducu, dako gibigonyo laboŋo lim mo me kok, laboŋo culo lim mo.

Cik ma mako bwami

¹² “Ka ŋatti mo ogoyo dano, ce oto, gibineke wako.

¹³ Ento ka yam pe obuto okiye, ento Lubaŋa omiyo ciŋe orwatte i kome, ci abiyero kabedo mo ma en biriŋo laro iye.

¹⁴ Ento ka dano mo ocako lweny i kom gat mo me akaka me nekone woko ki ryeko, ci wubikwanye woko ki i kom keno tyerra, gineko woko.

¹⁵ “Ka ŋatti mo ogoyo wonne nyo minne gibineke woko.

¹⁶ “Ka ŋatti mo ekwalo dano, kadi ka ocato bot ŋatti mo nyo ginoŋo bote, gibineke woko.

¹⁷ “Ka ŋatti mo oceno wonne nyo minne gibineke woko.

¹⁸ “Ka jo mogo gubedo ka da, ce ŋat acel ocelo lawote ki got nyo odoŋo ki ciŋe ci pe oto, ento obedo ka twor labuto,

¹⁹ lacen ka dano meno ocukke oa malo kun woto komo ki odoo, kop pe biloyo ŋat ma ogoye-ni, ento bicul pi balo kare me ticce, dok bimiyo en caŋ maber.

²⁰ “Ka ŋatti mo ogoyo opiine nyo aŋecane ki odoo ce oto woko cut, I gibiketo can i kome.

²¹ Ento ka opii meno obedo kwo pi nino acel nyo aryc pe gibiketo can mo i kome; pien op meno obedo gire limme.

²² “Ka co gitye ka lweny, ci ŋat acel ciŋe ocer i kom dako ma iye odoŋo, ce iye opoto woko, ma can pe onen iye’ dano ma ogoyo dako-nu biculo kwor pi wei ma won dako biŋolone, kun culo ki kit ma laŋolkop oŋolo.

²³ Ka can onen iye, ci gibiculo kwo ki kwo

²⁴ waŋ ki waŋ, lak ki lak, ciŋ ki ciŋ tyen ki tyen,

²⁵ waŋo ki mac ki waŋo ki mac, ret ki ret, goco ki goco.

²⁶ “Ka ŋatti mo ogoyo waŋ opiine nyo waŋ aŋecane, ce oloyo oneko woko, ci bigonyo opii meno nyo aŋeca meno, weko cito gire pi waŋe-nu.

²⁷ Ka otwomo omuko lak opiine nyo aŋecane ci bigonyo opii meno nyo aŋeca meno weko cito gire pi lake-nu,

Cik ma mako wegi lim

²⁸ “Ka twon mo ocobo dano ki tuŋe nyo dako, ce oneko woko, ci twon meno gibicelo woko ki got, dok riŋone bene pe gibicamo; ento kop pe biloye rwode.

²⁹ Ento ka kit twoŋ meno onene ni yam cobo dano ki tune con, dok yam doŋ giciko rwode pire ci ento pe omedo ki gwokone, ce oneko dano nyo dako mo, ci twon meno gibicelo woko ki got, ki rwode bene gibineke woko.

³⁰ Ka giŋolle cul, ci biculo lim ducu me koko kwone ma giŋolle.

³¹ Ka ocobo awobi pa dano mo, nyo nyare, gibitic kwede i kit cik acel-lu.

³² Ka twon ocobo opii mo, nyo aŋeca mo, ci rwode bimiyo cekel me ryal pyeradek ki ladit pa opii meno, ki twon bene gibicelo woko ki got.

³³ “Ka ŋatti mo oweko wi bur twolo nyo ka ŋatti mo okwinyo bur ci pe oumo wiye woko, ce twon nyo kana mo opoto iye,

³⁴ ci won bur biculone; en bimiyo lim bot rwode, ci riŋone bibedo mere.

³⁵ “Ka twon pa ŋatti mo otwomo mukene, ce oneko woko, ci gibicato makwo-ni woko, gipoko limme; ki twon ma gineko-ni riŋone bene gipoko woko.

³⁶ Nyo ka kite onene ni yam en twon ma lacob lim wadi atata, rwode bene pe ogwoko, en biculo twon ki twon wadi, ma gineko-ni bibedo mere.