Buk me Aryo pa Moses ma Gilwoŋo Nia 2 - Acoli Baibul

Ginywalo Moses

¹ Laco mo ma ladoggola pa Levi ocito onyomo nyako mo ma nya pa Levi.

² Dako-nu ogamo ic, ci onywalo latin laco. Ka dako oneno ni latinne ber twatwal, ci okane woko dwe adek.

³ Ka doŋ pe twero kanne, ci otiŋo aduku ma gicweyo ki togo, ci opuyo ki odok yat; opyelo iye latin, otero oroyo i dye aluga ma i ŋet kulu.

⁴ Laminne ocuŋ ki cen pi ŋeyo gin ma bitimme i kome.

⁵ Ka nya pa Parao obino ka lwok i kulu, ci anyirane guwoto gurabo ŋet kulu; en oneno aduku ki i kin aluga, ocwalo aŋecane ka omone.

⁶ Ka oelo wiye, ci oneno iye latin; ci nen, latin okok. Kica omake i kome, ci owacci, “Man latin pa jo Ibru.”

⁷ Laminne owaco ki nya pa Parao ni, “Acit alwoŋ lapidi mo ki i kin mon Ibru, wek opitti’ latin bo?”

⁸ Nya pa Parao ogamo ni, “Citi.” Kit meno nyako-nu ocito olwoŋo min latin.

⁹ Ci’ nya pa Parao owacce ni, “Cit ki latin man, ci icipitta; an abiculli mucarani.” Kit meno min latin otero latin, opito.

¹⁰ Ka doŋ latin odoŋo, ci otere bot nya pa Parao, odoko wode ocako nyiŋe Moses kun waco ni, “Pien aywayo ki i pii.”

Moses olwi woko wa i Midian

¹¹ Ka Moses doŋ odoŋo, ci i niŋo mo acel en owoto bot lutugi, oneno pekogi. Ka oneno Laejipt mo ka goyo Laibru mo, ma ŋat acel i kin lutugi,

¹² ci oneno piny tuŋŋi ki tuŋŋi, pe oneno ŋatti mo, ci oneko Laejipt meno, okane woko i kweyo,

¹³ Ka dok orwone, ka odok, nen jo Ibru aryo dok gubedo ka lweny, ci owaco bot latim bal ni, “Piŋo igoyo lawoti?”

¹⁴ Ogamo ni, “Aŋa muketi me bedo laker ki laŋolkop i komwa? In imito neka macalo ineke Laejipt-ti?” Ci lworo omako Moses kun tamo ni, “Ada lok man oŋene woko.”

¹⁵ Ka Parao owinyo lok man, ci omito neko Moses. Ento Moses oriŋo olwi woko ki bot Parao, obedo i lobo Midian; ci obedo piny i ŋet waŋ pii.

¹⁶ Onoŋo yam ajwaka pa jo Midian tye ki anyirane abiro; gubino gutwomo pii, ci gupoŋo weer ki pii me amata pa lim pa wongi.

¹⁷ Lukwat gubino guryemogi woko; ento Moses oa ci okonyogi, omiyo limgi gumato pii.

¹⁸ Ka gudwogo wongi Reuel, en owacci, “Piŋo wudwogo con?”

¹⁹ Gugamo ni, “laEjipt mo aye olarowa ki bot lukwat en, aye otwomowa pacoii, dok omiyo lim omato.”

²⁰ Reuel owaco ki anyirane ni“En tye kwene? Piŋo wuweko laco meno odoŋ woko? Wulwoŋe wek ocam kwon.”

²¹ Moses oye bedo bot dano meno, en omiyo nyare Jipola Moses.

²² Ci onywalo latin laco, ocako nyiŋe Gercom, kun waco ni, “An labedo i lobo pa lurok.”

²³ I lwak kare meno ducu, kabaka Ejipt oto iye woko, ci jo Icrael gubedo ka cur pi bedo opii, kun gikok gimito kony; ci kokogi pi bedo opii owinnye bot Lubaŋa.

²⁴ Ka Lubaŋa owinyo cur megi, ci opo pi gicikkene ki Abralm ki Icaka, ki Yakobo.

²⁵ Lubaŋa oneno jo Icrael, ci oŋeyo kit bedogi.