Buk me Aryo pa Moses ma Gilwoŋo Nia 19 - Acoli Baibul

Luicrael i te got Cinai

¹ I kom por dwe me adekke nia guo i tim Cinai i kom nino meno.

² Ka gua woko ki i Repidim ci gubino i tim Cinai, gugony i tim; jo Icrael gugony kunnu i nyim got.

³ Ka Moses oito malo bot Lubaŋa, ci Rwot olwone ki i got, kun waco ni, “Ibiwaco ki jo me ot pa Yakobo kit man kun itito ki jo Icrael ni, Rwot owaco ni,

⁴ ‘Doŋ wutyeko neno gin ma atimo i kom jo Ejipt, kit macalo yam atiŋowu ki bwom ocur, akelowu bota,

⁵ Pienno ka wubiworo doga, kun wumako gicikkena, ci wubibedo jona kikome i kin rok ducu; pien lobo ducu mera.

⁶ Wubibedo ker ma lwakke ajwagi ma an aye aloyo, wubibedo rok maleŋ.’ Meno aye lok ma ibiloko bot jo Icrael.”

⁷ Kit meno Moses obino olwoŋo ludoŋo pa lwak, ci oketo lok meno Rwot owaco-ni i nyimgi.

⁸ Ci lwak ducu gugamo lawaŋ acel ni, “Gin ducu ma Rwot owaco, wabitiyo.” Ci Moses odwoko lok pa lwak bot Rwot.

⁹ Rwot owaco ki Moses ni, “Nen, an abibino boti i pol mapek, wek lwak guwiny aloko kwedi, wek guye in matwal.” Ka Moses otito lok pa lwak bot Rwot,

¹⁰ ci Rwot owaco bot Moses “Cit bot dano, ilonygi tin ki diki, gulwok boŋogi,

¹¹ wek i nino me adekke onoŋ guyubbe; pien i nino adekke, an Rwot abilor piny i wi got Cinai i nyim lwak ducu.

¹² In ibitoŋo waŋaco me poko ka ma lwak bicuŋ iye, kun itito ki lwak ni, ‘Wugwokke, pe wuit malo i wi got, pe gugud waŋacone bene; dok ka ŋat mo ogudo kom got, gibineko woko.

¹³ Pe ciŋ mo bugudo kome, ento gibicelo ki got nyo ki atero; kadi bed lee nyo dano, pe bikwo. Ka dwan obute bikok nakanaka, ci gibiito malo i kor got.”

¹⁴ Ci Moses olor piny nia ki wi got ocito bot lwak ka olonyo lwak; ci gulwoko boŋogi.

¹⁵ Ka owaco bot lwak ni, “I nino adekke noŋo doŋ wuyubbe; pe wubed cok ki mon.”

¹⁶ I kom nino me adekke odiko piny obedo ka mor ma noŋo lutkot wil awila, pol mapek oumo wi got, ci obute okok maloŋo twatwal, omiyo jo ducu ma gubedo i gony komgi omyel.

¹⁷ Lacen Moses okelo lwak woko ki i gony ka rwatte ki Lubaŋa; gucuŋ piny ma jo Icrael gua ki i lobo Ejipt i te got.

¹⁸ Yito oboyo kom got Cinai woko, pien onoŋo Lubaŋa olor Piny i kome ki mac; yitone oduny cito malo macalo yito mac lawaŋ agulu, got ducu oyeŋŋe matek.

¹⁹ Ka dwan obute medde ki koko maloŋo, Moses bedo ka lok Lubaŋa gamo doge ki mor kot.

²⁰ Rwot olor piny i wi got Cinai, i wi lacol got Rwot olwoŋo Moses ki malo i wi locol got, ci Moses ocito malo kunnu.

²¹ Rwot owaco bot Moses ni, “Lor piny, ijuk lwak, wek pe gucerre pi neno Rwot, miyo lwak jo mapol gibito.

²² Dok imi ajwagi ma gibino cok bot Rwot, gulonnye kekengi, wek Rwot pe otugge i komgi.”

²³ Ci Moses ogamo ni, “Lwak pe gibiito malo i wi got Cinai; pien in kikomi aye icikowa, kun iwaco ni, ‘Toŋ waŋaco orum got ci iket obed kwer.’’’

²⁴ Rwot owacce ni, “Lor piny, icibin malo wun ki Aron; ento pe iwek ajwagi ki lwak gucerre me bino bota, wek pe atugge i komgi.”

²⁵ Kit meno Moses olor piny bot lwak, otito botgi.