Buk me Aryo pa Moses ma Gilwoŋo Nia 18 - Acoli Baibul

Yecero olimo Moses

¹ Yecero, ma ajwaka pa jo Midian, won dako pa Moses, yam owinyo gin ducu ma Lubaŋa obedo ka tiyo pi Moses ki pi jo Icrael, kit ma Rwot okwanyo jo Icrael ki i Ejipt,

² Onoŋo Yecero, won dako pa Moses, ogamo Jipola dako pa Moses, i kare ma Moses odwoko en bote,

³ kacel ki awobene aryo. Nyiŋ awobi acel Gercom, pien yam owacci, “Abedo labedo i lobo pa lurok.”

⁴ Nyiŋ mukene Eliejer, pien yam owacci, “Lubaŋa pa wora aye okonya, ci olara ki i pala lucwan pa Parao.”

⁵ Ka Yecero, won dako pa Moses, obino ki awobene ki dakone bot Moses i tim, ka ma yam gugony iye i te got pa Lubaŋa,

⁶ ŋat acel mo otito bot Moses ni, “Nen, won dakoni Yecero obebino boti ki dakoni kacel ki awobene.”

⁷ Ci Moses okato ocito ka jolo won dakone, ci oryebbe i nyime, onoto leme; ka gucako motte kekengi kun gipenyo kit bedogi, ka gudonyo i kema,

⁸ Ka Moses otito ki won dakone gin ducu ma yam Rwot otimo i kom Parao ki i kom jo Ejipt pi jo Icrael, ki peko ma gubedo kwede i korayo, ki kit ma yam Rwot olarogi kwede.

⁹ Ci cwiny Yecero obedo yom pi gin ducu ma Rwot yam otiyo bot jo Icrael, pi kit ma olarogi kwede ki i ciŋ jo Ejipt.

¹⁰ Ci Yecero owacci, “Gipwo Rwot ma olarowu ki i cin jo Ejipt ki i cin Parao.

¹¹ Kombeddi doŋ aŋeyo ni, Rwot dit makato lubaŋa mukene ducu, pien olaro dano ki i ciŋ jo Ejipt, ma yam gubedo ka ronyogi-ni.’

¹² Ka Yecero won dako pa Moses otyero gitum awaŋa, ki gitum mukene, bot Lubaŋa; ci Aron obino ki ludoŋo ducu pa jo Icrael ka camo kwon kacel ki won dako pa Moses i nyim Lubaŋa.

Keto luŋolkop

¹³ Orwone Moses obedo ka ŋolo kop pa dano, ci dano gucuŋ i nyim Moses nia odiko con nio wa otyeno.

¹⁴ Ka won dako pa Moses oneno gin ducu ma en obedo ka timo pi dano, ci owacci, “Itiyo ki dano ku man piŋo? Piŋo ibedo keni, kun dano ducu gucuŋ gurumi woko nia odiko nio wa otyeno?”

¹⁵ Moses owaco bot won dakone ni, “Pien dano gibino bota pi penyo dog Lubaŋa,

¹⁶ Ka gitye ki lok alara, ci gibino bota, an aŋolo kop i kin dano ki lawote, kun amiyo giŋeyo cik pa Lubaŋa ki ŋolle.”

¹⁷ Won dako pa Moses owacce ni, “Gin ma in itiyo pe kakare.

¹⁸ In kacel ki lwak wubiol woko, pien ticce pek obwoyo komi woko, in pe itwero tyekone keni.

¹⁹ Doŋ iwiny doga; abimini ryeko, dok Lubaŋa obed kwedi! In ibibedo lakwena pa dano i nyim Lubaŋa, ki pi tero kopgi bot Lubaŋa.

²⁰ Ibipwonyogi cik ki kit ŋolone, kun imiyo giŋeyo lubone ki kit ma myero giti kwede.

²¹ Ento in iyer dano makwiri ki i kin lwak, jo ma nen ni gilworo Lubaŋa, jo ma gigenogi, ma gikwero lim me wilo loyo kop matan: ci iket jo meno gulo lwak, gubed lulo jo alip, ki jo miya, ki jo pyerabic, ki jo apar.

²² Wek guŋol kop ki dano kare ducu; gukel boti lok maditone keken; ento lok ducu matitino guŋol ki kunnu; ci doŋ gibiyweyo kori, dok gibinywako tiŋo peko meno kwedi.

²³ Ka itiyo kit man ma Lubaŋa bene ociki kwede kit man, ci ibitwero cirone, ki lwak man ducu bene gibidok i kabedogi ki kuc.”

²⁴ Moses owinyo dog won dakone, otimo gin ducu ma owacce.

²⁵ Moses ocako yero jo makwiri ma i kin jo Icrael ducu, oketogi gudoko lutel wi lwak, lulo jo alip, ki jo miya, ki jo pyerabic, ki jo apar.

²⁶ Gubedo ka ŋolo kop i kare ducu; pido matego aye gikelo bot Moses, ento lok ducu matitino giŋolo ki kunnu.

²⁷ Ka Moses olwoko won dakone odok, ci en omedde anyim nio i lobo tugi.