Buk me Aryo pa Moses ma Gilwoŋo Nia 17 - Acoli Baibul

Pii mua i pata got

¹ Lwak Jo Icrael ducu gua woko ki i tim Cin kun giwoto gikobo macalo Rwot ociko, ci gugony Repidim; ento pii amata pa dano obedo pe.

² Mumiyo dano gukeco i kom Moses, guwacci, “Miniwa pii me amata.” Moses ogamo doggi ni, “Piŋo wukeco i koma? Piŋo wuomo i Rwot?”

³ Ento orwo pii oneko dano, ci dano gubedo ka ŋur i kom Moses kun giwacci, “Piŋo yam ikwanyowa woko ki i Ejipt ka nekowa ki Litinowa ki limwa ki orwo pii?”

⁴ Omiyo Moses okok bot Rwot ni, “Abitimo jo man niŋniŋ? Gin doŋ gutyeko yubbe me cela woko ki got.”

⁵ Rwot owaco bot Moses ni, “Kat wa i nyim lwak, kwany ludoŋo mogo pa jo Icrael, icit kwedgi; dok ikwany odoo ma yam igoyo ki Nail, mak i ciŋi, iwot kwede.

⁶ Nen, abicuŋ i nyimi, i kom pata got ma i Koreb; ci ibigoyo pata got, ci pii bia ki iye, wek lwak gumati.” Moses otimo kit meno i nyim ludoŋo pa Icrael.

⁷ Olwono nyiŋ kabedo meno ni, Maca ki Meriba, pien jo Icrael gukeco i kome, dok pien guomo i Rwot kun giwaco ni, “Rwot mono tye i kinwa nyo pe?”

Lweny ki jo Amalek

⁸ Jo Amalek gubino gulwenyo ki jo Icrael i Repidim.

⁹ Moses owaco bot Yocwa ni, “Yer co ma i kinwa, ci icit icilweny ki jo Amalek; diki abicuŋ i wi got ki odoo pa Lubaŋa i ciŋa.”

¹⁰ Ci Yocwa otimo kit ma Moses otitte, olwenyo i kom jo Amalek; ci Moses ki Aron ki Kur gucito malo i wi got.

¹¹ Ka Moses obedo ka tiŋo ciŋe malo, ci Icrael giloyo; ento ka obedo ka dwoko ciŋe piny, jo Amalek giloyo.

¹² Ento ka ciŋ Moses ojony woko, ci gikwanyo got gikette piny, ka en obedo i wiye, ci Aron ki Kur gitiŋo ciŋe malo, ŋat acel tuŋ cel kit ŋat acel tuŋ mukene; kit meno ciŋse obedo mutiŋŋe malo nio ka cen opoto.

¹³ Ci Yocwa ojwero Amalek ki jone ki pala lucwan.

¹⁴ Rwot owaco bot Moses ni, “Co lok man i buk obed me lapo wic, ci ikwan i it Yocwa matek, ni, An abijwayo Amalek woko ki i tam pa dano ducu ma gitye piny i te polo.”

¹⁵ Ka Moses ocano keno tyer, olwoŋo ni, Rwot aye benderana,

¹⁶ kun waco ni, “Cinwa omako bendera pa Rwot! Rwot bilweny ki Amalek kare ducu.”