Buk me Aryo pa Moses ma Gilwoŋo Nia 15 - Acoli Baibul

Wer pa Moses

¹ Moses ki jo Icrael guwero wer man bot Rwot kun giwaci ni, “Abiwero wer bot Rwot, pien otuc ki loc me deyo; obolo aguragura ki lait i wiye woko i nam,

² Rwot aye tekka ma akoro ki wer, en odoko Lalarra. Man aye Lubaŋana, abipako en Lubaŋa pa wora, abikoro nyiŋe.

³ Rwot en oteka lweny: nyiŋe Rwot,

⁴ “En obolo gadigadi pa Parao ki monnye ducu i nam; twoni ma oyerogi gumwony piny i Nam Makwar.

⁵ Pii matut oumo wigi woko; gulwiny woko i te kut macalo got.

⁶ Ciŋi malacuc, ai Rwot, won deyo ki tek, ciŋi malacuc, ai Rwot, ŋido lumerok i woko.

⁷ Pi deyoni madit ireto lukworri piny; icwalo akemoni, owaŋogi woko macalo ren kal.

⁸ Yweyo me umi otiŋo pii malo, pii mamol otiŋŋe malo likuŋ; pii matut odille likiŋ i cwiny nam.

⁹ Lumerok guwacci, ‘Abiryemo korgi, amakogi, abipoko gin ma ayako, cwinya biyen kwede, abiwoto pala lucwanna, ciŋa bityekogi woko.’

¹⁰ Ento in ikuto yamoni, ci nam omwonyogi woko; gumwony i te pii madwoŋ macalo odoo olek.

¹¹ Aŋa ma calo in, ai Rwot, ki i kin lwak lubaŋa-ni? Aŋa ma calo in, ma ladeyo ki maleŋ? Kom myel i gin me deyo ma itiyo, itimo ginaura,

¹² In yam iryeyo ciŋi malacuc, ci lobo omwonyogi woko.

¹³ “Pi marri ma pe lokke itelo wi jo ma yam ikokogi, pi tekki igwokogi, ikelogi i kabedoni maleŋ,

¹⁴ Lwak doŋ guwinyo pire ci komgi omyel; atiba opoto i kom Lupiliciti.

¹⁵ I kare-nu cwiny rwodi me Edom oŋabbe aŋaba; lworo oonyo koyo i kom ludito me Moab; kom jo Kanaan ducu oto woko lirut.

¹⁶ Lworo ki myelkom opoto i komgi, pi tek me badi omiyo gucuŋ, guliŋ macalo got, nio ka joni gukato ki ka netgi, ai Rwot, nio ka jo ma iwilogi gukato.

¹⁷ Ibiterogi i lobo, ibipitogi i kom got meri, i kabedo ma iketo me bedo kabedoni, ai Rwot, i kabedo maleŋ, ai Rwot, ma yam ciŋi omoko.

¹⁸ Rwot bibedo kabaka nakanaka.”

¹⁹ Pien ka aguragura pa Parao ki gadigadine ki wegi aguragurane gucako donyo i nam, ci Rwot odwoko pii me nam cen i komgi; ento jo Icrael guwoto i lobo mutwo i dye namo

²⁰ Ci Miriam, lanebi ma dako, lamiŋ Aron, okwanyo ajaa i ciŋe; ci mon ducu gukwanyo ajaa gumol kwede i kore ki myel.

²¹ Miriam ocakogi wer ni: “Wuwer bot Rwot, pien otuc ki loc me deyo; obolo aguragura ki lait i wiye woko i nam.”

Pii makec i Mara

²² Moses dok otelo wi jo Icrael guwoto anyim nia ki i Nam Makwar gucito i tim me Cur; guwoto i tim wot me nino adek ci pe gunoŋo pii.

²³ Ka guo i Mara, ci mato piine oloyogi, pien piine onoŋo kec; mumiyo gilwoŋo ni Mara.

²⁴ Ci dano gubedo ka ŋur i kom Moses, kun giwacci, “Wabimato aŋo?

²⁵ En okok bot Rwot, Rwot onyutte yat mo; obolo i pii, ci pii odoko mamit. Rwot oketogi cik kunnu, ki lok ma en oŋolo, otemo cwinygi kunnu,

²⁶ kun waco ni, “Ka wubiworo dog Rwot Lubaŋawu ki cwinywu ducu, ma wuyito gin ma nen atir i waŋe, dok wugwoko lok ma en ociko kun wumako cikke ducu, ci pe abikelo two mo i komwu ma yam aketo i kom jo Ejipt; pien an a Rwot lacanwu.”

²⁷ Ka dok gubino i Elim, ka ma yam tye iye waŋ it apar wiye aryo, ki otit pyerabiro; ci gugony i ŋet pii-nu.