Buk me Aryo pa Moses ma Gilwoŋo Nia 13 - Acoli Baibul

Kwero litino kayo

¹ Rwot owaco bot Moses ni,

² “Kwer litino kayo ducu gubed mega; gin ducu ma okwoŋo yabo ic i kin jo Icrael, pa dano ki pa lee bene, ducu mera.”

Nino madito me Mugati ma Tobi Pe Iye

³ Moses owaco ki lwak ni, “Wupo nino man, ma wua iye woko ki i Ejipt i ot me opii, pien Rwot okwanyowu woko ki i kabedo man pi bade matek; pe wubicamo mugati ma tobi tye iye.

⁴ Tin wun doŋ wubecito woko, i dwe me Abib,

⁵ Ka Rwot bikelowu i lobo pa jo Kanaan, jo Kit, jo Amor, jo Kiv ki jo Jebuc, ma yam okwoŋo pire bot kwarowu ni ebimiyowu, lobo ma mol cak ki moo k ic, wubilubo kit tic man i dwe-ni.

⁶ Wubicamo mugati ma tobi pe iye pi nino abiro; i kom nino me abirone en aye wubikwero iye nino madit bot Rwot.

⁷ Mugati ma pe girubo iye tobi wa tobi bene pe binen botwu i lobowu ducu.

⁸ I nino meno ibitito bot latinni ni, ‘Man obedo tye pi gin ma yam Rwot otimo pira i kare ma aa wo ko ki i Ejipt.’

⁹ Man bibedo lanyut i ciŋi, dok bibedo i dye tur nyimi, me poyo wii, wek cik pa Rwot obed i dogwu; pien Rwot okwanyowu woko ki i Ejipt pi bade matek,

¹⁰ Pi neno wugwok cik man i kare ma giciko-ni mwaka ki mwaka.

Litino kayo

¹¹ “Ka Rwot bikelowu i lobo p Kanaan, macalo yam okwoŋo be ki bot kwarowu ni ebimiyowu,

¹² wubi yeko litino ducu mukwoŋo yabo ic gubed pa Rwot. Litino kayo pa limwu ducu ma twonne gibibedo pa Rwot.

¹³ Latin kayo pa kana ibikoko ki i romo, nyo ka pe ikoko, ci ibituro woko. Latin dano acel acel ma i kin litinowu, ma latin kayo, wubikokone bene.

¹⁴ I kare me anyim, ka latinni bipenyi ni, ‘Man kono te lokke aŋo?’ ci ibiwacce ni, ‘Rwot yam okwanyowa woko ki i Ejipt ki bade matek, i ot me opii.

¹⁵ Pien con ka Parao okwero woko matek ni pe waciti, Rwot oneko litino kayo ducu ma i Ejipt, litino kayo pa dano ki litino kayo pa lim makwo. Mumiyo atyero bot Rwot twon ducu ma gukwoŋo yabo ic; ento akoko awobena ma litino kayo ducu.’

¹⁶ Bibedo macalo kedo i ŋut ciŋi, nyo gin me atweya i dye tur nyimi; pien Rwot yam okwanyowa woko ki i Ejipt ki matek.”

Lubaŋa otelo dano ki wir me pol ki wir me mac

¹⁷ Ka Parao oweko dano gucito, ci Lubaŋa pe otelo wigi i yo ma dok tuŋ lobo pa Lupiliciti, kadi bedi yam yone cok; pien Lubaŋa owacci, “Ka dano gurwatte ki mony, ci cwinygi biballe woko gidok woko cen i Ejipt.”

¹⁸ Ento Rwot otelo wi dano kun rabo kwedgi piny i yo ma dok tun lim mukemo Nam Makwar. Ci jo Icrael gua woko ki i lobo Ejipt ma guyubbe ki jami lweny.

¹⁹ Moses okwanyo cogo pa Yucepu ocito kwede; pien yam Yucepu omiyo jo Icrael gukwoŋo kwoŋ matek, kun waco ni, “Lubaŋa bilimowu; myero wutin cogona nia ki kany, kwede.”

²⁰ Gua Cukot, gugony i Etam i dog tim,

²¹ Rwot otelo nyimgi i dyeceŋ ki pol mucuŋ macalo wir me nyutogi yo, ki i dyewor telo nyimgi ki mac mucuŋ macalo wir me menyo piny wek gubed ka wot dyeceŋ ki dyewor;

²² wir me pol dyeceŋ ki wir me dyewor, kun pe a woko i nyim dano.