Buk me Aryo pa Moses ma Gilwoŋo Nia 10 - Acoli Baibul

Gemo me bonyo

¹ Rwot dok owaco bot Moses ni, “Cit bot Parao; pien ajino cwinye odoko nwaŋ, ki cwiny luticce, wek anyut lwak lanyut mera man i kingi,

² wek in itit i it litinoni ki likwayi kit macalo abedo ka tuko ki jo Ejipt kit ma iya mito-ni ki kit lanyut ma atiyo i kingi; wek wun wuŋe ni an a Rwot.”

³ Kit meno Moses ki Aron gucito gudonyo bot Parao, guwacce ni, “Rwot Lubaŋa pa jo Ibru owaco kuman ni, ‘In ibikwero bedo ki mwolo i nyima pi kare ma rom mene? Wek jona guciti, wek guti bota.

⁴ Pien ka ikwero ni jona pe guciti, ci nen, diki abikelo lwak bonyo i loboni,

⁵ giumo lobo woko lipuk, pe tye ŋatti mo ma bineno lobo; ci gibicamo gin ma pee oŋoyo botwu, ka dok gibicamo yadiwu ducu ma doŋo i poto.

⁶ Gibipono i odini ki i odi pa luticci ducu ki i odi pa jo Ejipt ducu; bibedo gin ma yam wegiwu ki kwariwu pe guneno nia i nino na giketogi wi lobo nio wa i nino man.” Ka olokke ci okato woko ki bot Parao.

⁷ Ci Lutic pa Parao guwacce ni, “Laco man bibedo owic botwa pi kare ma rom mene? Wek jo-nu guciti, wek guti bot Rwot Lubaŋagi: in peya iŋeyo ni Ejipt oballe woko ”

⁸ Omiyo gidwoko Moses ki Aron bot Parao; ci owaco botgi ni, “Doŋ wucit, wuti bot Rwot Lubaŋawu; ento jo mene ma gibicito?”

⁹ Ci Moses ogamo ni, “Wan wabicito ki litinowa, ki luditowa wabicito ki awobewa ki anyirawa; wabigwarre ki lwak limwa ducu matino ki madito, pien myero wakwer nino madit bot Rwot.”

¹⁰ Ci owaco botgi ni, “Rwot obed kwedwu ka abiweko wun ki litinowu wucito! Nen wun iwu kirungula, wutye ki kop i iwu,

¹¹ Pe twerre, co ma i kinwu aye gucit ka miyo woro bot Rwot; pien meno aye gin ma cwinywu pyette iye.” Ci giryemogi woko ki i nyim Parao.

¹² Rwot dok owaco bot Moses ni, “Rye ciŋi i wi lobo Ejipt wek bonyo obin obed i lobo Ejipt, ocam gin mutwi i lo bo ducu ma yam pee onoyo.”

¹³ Kit meno Moses’ otiŋo odoone i wi lobo Ejipt, ci Rwot ocwalo yamo oa tuŋ wokceŋ okodo i lobo dyeceŋ meno ducu ki i dyewor benebene; ka oo odiko ci yamo mua wokceŋ okelo bonyo.

¹⁴ Ci bonyo ocorre i lobo Ejipt ducu, ci obuto, ori i lobo ducu me Ejipt, lwak bonyo mumukke madwoŋ ma yam pe tye, ma dok pe binen.

¹⁵ Pien oumo lobo woko lipuk, ma lobo ocido woko licuc, ci gucamo gin mutwi ducu ma i lobo ki nyig yadi ducu ma yam pee onoyo; gin madyak mo pe odoŋ, kadi yat, kadi gin mutwi ma i poto ma i lobo Ejipt ducu.

¹⁶ Ka Parao dok olwoŋo Moses ki Aron pi oyoto, owaco ni, “Atyeko timo bal i kom Rwot Lubaŋawu, ki i komwu.

¹⁷ Mumiyo tin wutima kica, man doŋ alegowu kicel enni, dok wuleg Rwot Lubaŋawu wek okwany to man woko i koma.”

¹⁸ Ci Moses okato woko ki bot Parao, olego Rwot.

¹⁹ Rwot omiyo yamo okodo matek nia ki tuŋ potoceŋ, otiŋo bonyo ocorogi woko wa i Nam Makwar; bonyo mo acel pe odon i lobo Ejipt,

²⁰ Ento Rwot ojiŋo cwiny Parao odoko nwaŋ, pe oweko jo Icrael gucito.

Gemo me colpiny

²¹ Rwot dok owaco bot Moses ni, “Rye ciŋi malo tuŋ polo, wek piny ocid woko Licuc i lo bo Ejipt, piny ma ocido woko ma dano winyo wa i kome.”

²² Ci Moses oryeyo ciŋe malo tuŋ polo, ci piny ocido woko matek licuc ma oromo lobo Ejipt pi nino adek;

²³ pe ginenne kekengi, pe ŋatti mo a malo ki i kabedone pi nino adek; ento ka ma jo Icrael bedo iye onoŋo piny leŋ mere.

²⁴ Ka Parao olwoŋo Moses, ci owacce ni, “Cit wuti bot Rwot; litinowu bene myero gucit kwedwu; ento wuwek limwu matino ki madito gudoŋ i newu.”

²⁵ Ento Moses ogamo ni, “In bene myero imiwa gitum ki gityer me awaŋa, wek watyer bot Rwot Lubaŋawa.

²⁶ Limwa makwo myero gin bene gucit kwedwa; pe oboŋ tyen mo bidoŋ i ŋewa, pien myero wakwany mogo i kingi me miyo ki woro bot Rwot Lubaŋawa, dok pe waŋeyo gin ma myero wati kwede bot Rwot, nio ka wabio wa kunnu.”

²⁷ Ento Rwot ojiŋo cwiny Parao odoko nwaŋ, pe oweko gucito,

²⁸ Parao dok owacce ni, “A woko ki bota; gwokke keni aye, pe inen waŋa doki; pien i nino ma ibineno iye waŋa en aye ibito iye bene,”

²⁹ Moses ogamo ni, “Pe dok abineno waŋi kit macalo iwaco.”