Buk me Aryo pa Moses ma Gilwoŋo Nia 1 - Acoli Baibul

Atwom pa Luicrael i lobo Ejipt

¹ Man aye nyiŋ awobe pa Icrael ma yam gubino i Ejipt kacel ki Yakobo, kun ŋat acel acel bino ki jo nia i ode:

² Reuben, Cimeon, Levi, Juda,

³ Icakar, Jabulon, ki Benjamin,

⁴ Dan ki Naputali, Gad ki Acer.

⁵ Litino pa Yakobo ducu giromo pyerabiro, kun onoŋo Yucepu doŋ tye i Ejipt.

⁶ Ci Yucepu oto, ki omege ki yalwak ke ducu.

⁷ Ento likwayo pa Icrael gunya gumedde mapol; gunya, gudoko matek twatwal, ci gupoŋo lobo woko.

⁸ Ka kabaka manyen oloyo Ejipt, ma yam pe ŋeyo Yucepu,

⁹ ci ocako waco ki lwak ke ni, “Nenu, jo Icrael doŋ gidwoŋ twatwal, dok gitek, giloyowa woko.

¹⁰ Wubin wek watimugi ki ryeko, wek pe gunya twatwal; pien ka mony bipoto i komwa, ci giribbe ki lumerokwa ka lweny i komwa, ci giriŋo woko, giweko lobowa.”

¹¹ Pi meno guketo ludito ma loyo tic me romogi, ki tic madwoŋ; ci gugero ki Parao gaŋ kal ma nyiŋgi Pitom ki Ramcec, me kano cam.

¹² Ento ka gimedo can i komgi, gin bene ginya, gimedde, gipoŋo lobo malac, ci Luejipt gubedo ki lworo i kom jo Icrael.

¹³ Pienno girido jo Icrael ki tic magwa,

¹⁴ ma omiyo kwogi obedo ki peko pi tic matego me nyono lobo ki goyo matafali, ki kit tic ducu me poto; i dog ticgi ducu giridogi ki tic magwa.

¹⁵ Ka dok kabaka me Ejipt oloko bot lucol-mon pa jo Ibru, ma ŋat acel nyiŋe Cipira ki mukene Pua, owaco ni,

¹⁶ “Ka wutye ka colo mon jo Ibru, ka wunenogi ma pud gitye i wi kom me nywal, ka latin laco, ci wubineko woko; ka latin nyako, ci wuwek makwo.”

¹⁷ Ento lucolo yam lworo Lubaŋa, ci pe, gutiyo kit ma kabaka me Ejipt ocikogi ento guweko litino co makwo,

¹⁸ Mumiyo kabaka me Ejipt dok olwoŋo lucolmon, ci owaco botgi ni, “Wutimo kuman piŋo, ma wuweko litino co makwo-ni?”

¹⁹ Lucol-mon guwaco bot Parao ni, “Pien mon jo Ibru pe girom ki mon Ejipt, pien komgi rom, miyo ginywal woko ma noŋo lacol-mon peya obino botgi,”

²⁰ Mumiyo Lubaŋa otimo lucol-mon ber; dano gunya gudoko matek twatwal.

²¹ Pien lucolmon gulworo Lubaŋa, Lubaŋa omiyogi gudoko mego.

²² Parao dok ociko lwakke ducu ni, “Latin laco acel acel ma jo Ibru gunywalo wubibolo woko i kulu Nail, ento wubiweko litino anyira ducu gibedo makwo.”