Esta 9 - Acoli Baibul

Lujudaya guneko lumerokgi

¹ Ci nino dwe apar wiye adek me dwe me apar wiye aryo oromo, ma en aye dwe me Adar. Meno aye nino kikome ma lumerok pa Lujudaya gimito ni gilogi iye pi lok me cik ma kabaka oketo, ento onoŋo olokke odoko nino ma Lujudaya aye myero gulo iye lumerokgi.

² I nino meno Lujudaya gucokke kacel i gaŋgi i dul lobo ducu liweŋ ma i te loc pa kabaka Akacwero, me neko jo-nu ma onoŋo mito timo aranyi i komgi. Pe tye ŋatti mo ma romo cuŋ i nyimgi, pien lworo omako rok ducu i komgi.

³ Rwodi ducu me dul lobo mapatpat, ki luloyo madoŋo, ki lulo dano, ki lutic pa kabaka, gukonyo Lujudaya, pien lworo madit mada omakogi i kom Mordekai.

⁴ Pien onoŋo Mordekai odoko dano me awora mada i ot pa kabaka, doŋ ywekane oromo dul lobo ducu, Twero pa Mordekai owoto ki medde mada.

⁵ Ci Lujudaya gucako lweny i kom lumerokgi ducu; gunekogi ki pala lucwan, gutyekogi woko, gutimo gin ma igi mito i kom jo ma onoŋo gidag wangi-ni.

⁶ I gaŋ kal madit me Cuca kikome, Lujudaya guneko dano ma romo miya abic, gutyekogi woko.

⁷ Guneko bene Parcandata, Dalpon ki Acapata,

⁸ Porata, Adalia ki Aridata,

⁹ Parmacata, Aricai, Aridai ki Vaijata,

¹⁰ ma gin aye awobe apar pa Aman wod pa Amedata, lamerok pa Lujudaya; ento pe guyako jami mo.

¹¹ I nino-nu kikome jo ma ginekogi i gaŋ kai me Cuca ginyuto welgi ki kabaka.

¹² Kabaka otito ki daker Esta ni, “Lujudaya guneko lumerokgi miya abic i gaŋ kai me Cuca ki awohe apar pa Aman bene, Gin doŋ gutimo gin aŋo i dul lobo mukene ma i te kerra-ni? Gin aŋo ma myero piri? Gitwero mini, Gin aŋo ma pud ipenyo? Gitwero cobone.”

¹³ Ci Esta ogamo ni, “Ka kabaka oye, myero giket cik ni diki doki Lujudaya ma tye i Cuca gutim macalo tin-ni. Ki awobe apar pa Aman doki myero gilyer komgi i wi yat me deyo dano.”

¹⁴ Kabaka oye ni myero gitim kumeno; girriiyo cik meno onene i Cuca ci gulyero kom awobe apar pa Aman i wi yat me deyo dano.

¹⁵ Lujudaya ma onoŋo gitye i Cuca gucokke kacel doki i nino dwe apar wiye aŋwen me dwe me Adar, ci guneko dano miya adek i Cuca, ento pe guyako jami mo.

Nino madito me Purim

¹⁶ Lujudaya mukene ma gibedo i dul lobo mapatpat ma i te Loc pa kabaka guŋbbe kacel bene pi gwoko komgi. Guneko dano alip pyerabiro wiye abic i kom jo ma daggi-ni, mumiyo gunoŋo yweyo i kom lumerokgi; ento pe guyako jami mo.

¹⁷ Meno otimme i nino dwe apar wiye adek me dwe me Adar. I nino dwe apar wiye aŋwen en aye guywe iye, ci giloko odoko nino me tedo karama ki me yomcwiny,

¹⁸ Ento Lujudaya ma onoŋo gitye i Cuca gukkeco i nino dwe apar wiye adek ki apar wiye aŋwen, mumiyo gin guywe i nino dwe apar wiye abic, ci guloko nino meno odoko nino me tedo karama ki me yomcwiny.

¹⁹ Pi meno Lujudaya ma gibedo i caro, i kin gaŋ, gikwero nino dwe apar wiye aŋwen me dwe me Adar macalo nino me yomcwiny ki me tedo karama ki me yweyo, ki nino ma dano poko iye mot me jami mabeco bot luwotgi.

²⁰ Mordekai ocoyo lok magi ducu, ocwalo waraga bot Lujudaya ducu ma gibedo i dul lobo ducu ma i te loc pa kabaka Akacwero, ma gitye cok ki ma gitye ka mabor.

²¹ Ocikogi ni myero gikwer nino dwe apar wiye aŋwen me dwe me Adar, ki nino dwe apar wiye abic bene me dwe meno, mwaka ki mwaka,

²² ni gin aye nino ma Lujudaya gunoŋo iye yweyo i kom lumerokgi, dwe ma gua kwede ki i cwercwiny medwogo kwede i yomcwiny, ma gua kwede ki i kumo me dwogo kwede i kuc; wek gulok nino magi gubed nino me tedo karama ki me yomcwiny, nino me cwalo jami mabeco bot luwotgi, ki me cwalo mot bot lucan.

²³ Lujudaya guye me timo kit ma onoŋo doŋ gucako kwede ki kit ma Mordekai ocoyo botgi-ni.

²⁴ Pien Aman ma jo Agag wod pa Amedata, lamerok pa Lujudaya ducu, opiro lok i kom Lujudaya me nekogi woko, ci obolo kwir ma gilwoŋo ni Pur me loyo tekogi wek etyekgi woko.

²⁵ Ento ka Esta obino i nyim kabaka omiyo twer i coc ni lok marac ma en opiro i kom Lujudaya myero gidwok i wiye, dok ni awobe pa Aman myero gidegi woko i wi yat me deyo dano,

²⁶ Pienno nino-ni gilwoŋo ni Purim, pi lubo nyiŋ kwir ma gilwoŋo ni Pur. Pienno, pi lok ducu ma gicoyo i waraga-nu dok pi can ma gineno pi lok meno ki gin ma otimme i komgi,

²⁷ Lujudaya guye lok man ni myero obed i wigi, ki i wi likwayogi, ki i wi jo ducu ma gibiribbe kwedgi; myero gikwer nino magi aryoni, kun gilubo lok ma gicoyo i kare ma giciko mwaka ki mwaka ma pe gikeŋ.

²⁸ Nino magi myero gipo pigi dok gikwergi wa i kare pa likwayogi ducu i doggola acel acel, i dul lobo ducu ki i gaŋ madito ducu. Lujudaya pe myero guwek gwoko nino magi me Purim, po iye pe myero ogiki i kin likwayogi.

²⁹ Ci daker Esta nya pa Abikail, ocoyo waraga gin ki Mordekai ma Lajudaya, kun moko waraga man me aryo-ni i kom Purim ki twerone ducu.

³⁰ Gicwalo waraga bot Lujudaya ducu ma i dul lobo miya acel ki pyeraryo wiye abiro ma i te loc pa kabaka Akacwero ki lok me kuc ki ada,

³¹ ni meno nino magi me Purim myero gikwer i kare ma giciko, kit ma Mordekai Lajudaya ki daker Esta guciko bot Lujudaya, ki kit ma Lujudaya onoŋo guciko pigi kengi ki pi likwayogi i kom lok ma mako kare me ri kecgi ki kokogi.

³² Cik pa daker Esta omoko lok man me Purim, ci gicoyo gigwoko i buk.