Esta 5 - Acoli Baibul

Esta olwoŋo kabaka ki Aman me bino i karamane

¹ I nino me adekke Esta oruko jor me kerre ocuŋ kwede i dyekal ma iye ma i gaŋ kal pa kabaka, ma opimme ki ot malac me cokke, En kabaka kono obedo i wi komkerre i gaŋ kalle ma opimme ki dog cel me gaŋ kal.

² I kare ma kabaka oneno daker Esta ocuŋ i dyekal, obedo ki yomcwiny madit twatwal, oilo odoo kerre me jabu ma onoŋo tye i ciŋe tuŋ bot Esta. Ci Esta onyiko oboŋo wi odoo ker.

³ Kabaka ocako penye ni, “Kop aŋo, daker Esta? Imito atimmi gin aŋo? Gitwero mini kadi bed nucu kerra.”

⁴ Ci Esta owaco ni, “Ka onoŋo ber piri, kabaka, amito ni wubin wun ki Aman i cam ma ayubo piri tin.”

⁵ Ci kabaka owacci, “Wukel Aman oyot, wek, wati gin ma Esta mito-ni.” Ka kabaka gin ki Aman gucako bino ka cam ma Esta oyubo,

⁶ I ka re ma gucako mato koŋo vino, kabaka openyo Esta ni, “Gin aŋo ma myero piri? Gitwero mini. Gin aŋo ma ilego? Kadi wa nucu kerra, jami ducu gitwero cobo kakare.”

⁷ Ento Esta owacci, “Legana ki gin ma apenyo en aye ni,

⁸ ka in kabaka itwero tima ber me ye lokka ki cobo gin ma alego, myero in kabaka idwog kany wun ki Aman diki ka cam ma abiyubo piwu, ci diki abitimo macalo in kabaka iwaco.”

⁹ Ci Aman ocito ma cwinye yom mada i nino meno, Ento Aman ka oneno Mordekai i dogcel pa kabaka pe oa malo, pe kome bene oryaŋŋe pire, kiniga omake matek twatwal ri kom Mordekai.

¹⁰ Kadi bed kit ennu, Aman ociro dok odiyo cwinye, ci ocito paco. Ooro dano ka lwoŋo lureme ki dakone Jerec,

¹¹ Aman ocako boko pi lonyone kit ma dwoŋ kwede, ki kwano wel awobene, rwom mapatpat ma, kabaka omiye me wore, ki kit ma omiye kwede twero mamalo ma kato rwodi ki lutic pa kabaka mukene ducu.

¹² Aman omedo doki ni, “Wa cam ma daker Esta oyubo pe oye ŋatti mo me bi no iye, kono wan ki kabaka keken. Dikini doki olwoŋa ka cam aye wan ki kabaka,

¹³ Ento magi ducu pud peya berra kit macalo aneno Mordekai Lajudaya pud bedo i dogcel pa kabakani,”

¹⁴ Ci dakone Jerec ki lureme ducu guwacci, “Yub yat me deyo dano mabor twatwal ma romo futi pyerabiro wiye abic, wek di ki odiko itit ki kabaka ni myero gide Mordekai iye; ka wek icit ki yomcwiny ka cam ma giyubo piwu wun ki kabaka.” Tam man oyomo i Aman twatwal; otugi yubo yat me deyo dano wok