Esta 1 - Acoli Baibul

Daker Vasti ocayo dog kabaka Akacwero

¹ Man lok mutimme i kare pa Akacwero ma yam loyo piny nia ki i India nio kwede wa i lobo Etiopia, kun loyo dul lobo mapat-pat ma romo miya acel ki pyeraryo wiye abiro kulu,

² I kare meno kabaka Akacwero obedo i wi kom kerre i gaŋ kalle i Cuca.

³ I mwaka me adek me locce en ocako tedo karama pi rwodine ki ludito wi ticce ducu; ludito wi mony me Percia ki me Media gubino iye, kacel ki ludito me awora ki lulo dullobo mapatpat ducu.

⁴ En obedo ka nyuto botgi lonyo ki deyo ma tye i te kerre ki dit me locce, ki woro ma lwak omiye, pi lwak nino mapol, nino miya acel ki pyeraboro kulu.

⁵ Ka kare meno ducu doŋ otum, kabaka ocako tedo karama pi jo ducu ma gibedo i gaŋ madit me Cuca, jo madoŋo ki matino. Obedo kwedgi pi nino abiro i dyekal ki i poto me ka namo ma tye i ŋet ot mere.

⁶ Dyekalle gidero ki cuka boŋo pamba matarre ki boŋo ma bulu ma gitweyo ki tol uci camanini ki tol ma lamar lamar ma girwako i agit me ryal ma i kom wir ma gitiyo ki got mapwot me wel. Gi-bedo onoŋo tye ma gitiyo ki jabu ki ryal. Ka ma gicibogi iye onoŋo gipeto iye godi ma gidero ki kidi matino makwar ki matar, ki gin mukene ma ryeny ki ki di matino me wel.

⁷ Gikelo ginamata i kikopo mejabu ma kitgi patpat; kabaka onoŋo omiyo gionyo koŋo vino mabup twatwal muporo lonyone.

⁸ Koŋo vino bene gimato ma lubo cik, kun pe gidiyo dano mo tektek; pien onoŋo kabaka omiyo cik bot ludito tic ducu ma i gaŋ kalle ni dano acel acel omat kit ma cwinye mito.

⁹ Vasti ma en aye daker otedo karama bene pi mon, obedo kwedgi i gaŋ kal pa kabaka Akacwero.

¹⁰ I nino me abiro me karama meno, ma cwiny kabaka doŋ odpko yom ki mat, en ociko Meuman, Bijita, Karbona Bigita, Abagita, Jetar ki Karkac, ma gin aye ludito kal abiro ma gikologi ma gitiyo bot kabaka Akacwero,

¹¹ ni myero gukel Vasti ma daker mere i nyime, kun girwako lalukanane me ker i wiye, wek onyute bot lwak jo ma rokgi patpat ki bot rwodi wek gunen kit ma dakone ber kwede, pien mwonya mada me anena.

¹² Ento Vasti okwero lubo cik pa kabaka ma onoŋo ooro ludito kalle bote-ni, ci pe obino. Pienno omiyo kiniga omako kabaka mada, cwinye owaŋ matek.

¹³ Ci kabaka ocako lok ki luryeko ma giŋeyo lok me kare mapatpat, pien meno obedo kit pa kabaka; kare ducu en penyo lok bot jo ma giŋeyo cik ki kit me ŋolo kop,

¹⁴ Jo ma cok kwede gin aye Karcena, Cetar, Adimata, Tarcic, Merec, Marcena ki Memukan, ma gin rwodi pa jo Percia ki Media ma gitye ki twero me bino bot kabaka i kare mo keken, ludito ma gikwoŋo nyim jo mukene ducu ma i kerre pi ditogi.

¹⁵ Openyogi ni, “I te cik myero gitim gin aŋo i kom daker Vasti, pien pe olubo cik pa kabaka Akacwero ma onoŋo ooro ludito kalle bote pi lwone?”

¹⁶ Ci Memukan odok iye i nyim kabaka ki rwodi ni, “Daker Vasti pe otimo bal bot kabaka keken, ento bot rwodi ducu me rok ducu ma i dul lobo ducu ma kabaka Akacwero loyo-ni;

¹⁷ pien tim man ma daker otimo-ni lokke binene bot mon ducu, miyo gibicayo coggi ki i waŋgi atyer kun giwacci, ‘Kabaka Akacwero owacci gikel daker bote, ento dako okwero bino woko.’

¹⁸ Wa tin kikome mon madito pa jo Percia ki Media ma gutyeko winyo tim pa daker gibitito pire bot rwodi ma i te locpa kabaka, ci meno binyayo cac ki kiniga madwoŋ mada.

¹⁹ Ka ce ineno ni ber, wek gicwal cik ma iketo pi ditti in kabaka, dok wek gico i kin cik pa jo Percia ki jo Media ma pe doŋ gitwero lokoneni, daker Vasti doŋ pe myero oo i nyim kabaka Akacwero. Dok wek kabaka omi ditte me bedo daker bot dako mukene ma dok ber kato en woko.

²⁰ Ka cik ma kabaka biketo-ni gibitito pire romo lobo ducu ma i te kerre, kit macalo ditte tye kwedeni, ci bimiyo mon ducu woro coggi, jo me rwom ma malo ki me rwom ma piny.”

²¹ Lok meno oyomo cwiny kabaka ki rwodi, ci kabaka otiyo kit macalo Memukan owaco.

²² Ocwalo waraga i kabedo ducu ma en loyo, kun onoŋo gicoyo bot jo me dul lobo acel acel ki kit nukuta ma jo kunnu giŋeyo, ki i leb mapatpat ma oporo rok mapatpat ducu. Ocoyo ni laco acel acel myero obed rwot i ode, dok ni olok lok kun lubo leb pa lutugi.