Ejira 8 - Acoli Baibul

Jo ma yam giterogi i opii ma guchvogo i Jerucalem

¹ Magi aye nyiŋ ludito ma giloyo dog odi pa kwarogi, ma gudwogo kacel kweda ki i lobo Babilon, i kare me loc pa kabaka Aritakcec:

² ma gicoyo nyiŋgi i buk me tekwarogi: Gercom, ki i kin likwayo pa Finekaci. Daniel, ki i kin likwayo pa Itamar. Katuc, ki i kin likwayo pa Daudi,

³ ma i kin likwayo pa Cekania. Jekaria, ki i kin likwayo pa Paroc, kacel jo megi ma gicoyo nyiŋgi giromo miya acel ki pyerabic.

⁴ Eliekoenai wod pa Jerakia, ki i kin likwayo pa Pakat-moab, kacel ki jone ma welgi oromo miya aryo.

⁵ Cekania wod pa Jakajiel, ki i kin likwayo pa Jatu, kacel ki jone miya adek,

⁶ Ebed wod pa Yonacan, ki i kin likwayo pa Adin, kacel ki jone pyerabic.

⁷ Jecaya wod pa Atalia, ki i kin likwayo pa Elam, kacel ki jone pyerabiro.

⁸ Jebadia wod pa Mikael, ki i kin likwayo pa Cepatia, kacel ki jone pyeraboro.

⁹ Obadia wod pa Jekiel, ki i kin likwayo pa Joab, kacel ki jone miya aryo ki apar wiye aboro.

¹⁰ Celomit wod pa Jocipia, ki i kin likwayo pa Bani, kacel ki jone miya acel ki pyerabicel.

¹¹ Jekaria, wod pa Bebai, ki i kin likwayo pa Bebai, kacel ki jone pyeraryo wiye aboro.

¹² Yokanan wod pa Kakatan, ki i kin likwayo pa Ajgad, kacel kijone miya acel ki apar,

¹³ Elipelet, Jeuel, ki Cemaya, ki i kin likwayo pa Adonikam, jo ma gucito lacen, kacel ki jo megi pyerabicel.

¹⁴ Utai ki Jakur, ki i kin likwayo pa Bigvai, kacel ki jo megi pyerabiro.

Ejira onoŋo Lulevi pi tic i ot pa Lubaŋa

¹⁵ An yam acokogi kacel i dog kulu ma mol dok yo tuŋ Akava, wagony iye wabedo kunnu pi nino adek. Ka abedo ka ŋiyo dano anoŋo ni ajwagi gitye, ento Lulevi pe gitye kadi ki acel mo.

¹⁶ Ka dok acwalo kwena me lwoŋo jo magi, Eliejer, Ariel, Cemaya, Elnatan, Jarib, Elnatan, Natan, Jekaria, ki Meculam, gin aye ludito wi lwakgi dok alwoŋo Joyarib ki Elnatan ma yam gin jo ma fye ki niaŋ matut,

¹⁷ ka acwalogi bot Iddo, ma en ladit ma loyo kabedo me Kacipia, kun atito botgi lok ducu ma myero gin gucilok bot Iddo ki utmegine ma gin lutic i ot pa Lubaŋa ma i kabedo me Kacipia, me cwalo botwa dano ma gibitic i ot pa Lubaŋawa.

¹⁸ Pi Rwot Lubaŋawa ma onoŋo tye ka konyowa omiyo gucwalo botwa Cerebia dano ma ŋeyo piny, ma en tye i kin likwayo pa Makali ma en lakwar pa Levi dok lakwar Icrael bene; en obino ki litinone kacel ki utmegine, gin ducu apar wiye aboro;

¹⁹ ka dok gucwalo Kacabia ki Jecaya ma gitye i kin likwayo pa Merari, kacel ki utmegigi, ki litinogi gin ducu pyeraryo.

²⁰ Doŋ medo i kom lutic i ot pa Lubaŋa miya aryo ki pyeraryo, ma con Daudi ki luditone guketo pi tic bot Lulevi, gin ducu gicoyo nyiŋgi woko piny kikore.

Ejira otelo wi lwak i kare me ri kec ki lega

²¹ An dok aciko pi ri kec kunnu, ki i dog kulu Akava, wek wamwolle kenwa i nyim Lubaŋawa, wek waleg en omiwa wawot maber, wan kikomwa, litinowa, kacel ki jamiwa ducu.

²² Kono nene apenyo kabaka ni omiya lwak askari ki wegi aguragura me gwokowa i kom lumerokwa ma iyo, lewic onoŋo twero maka; pien onoŋo doŋ watito bot kabaka woko ni, “Lubaŋawa bibedo ki jo ma giyenye pi konyogi, ki tek me akemone bedo i kom jo ducu ma gibwoto en woko.”

²³ Wari kec kun walego Lubaŋawa ni ogwokwa, ci en owinyo legawa bene.

Mot pi ot pa Lubaŋa

²⁴ Ka dok aketo ludito magi apar wiye aryo ma giloyo ajwagi: Cerebia, Kacabia, ki jo apar mukene ma gin utmegigi kacel kwedgi.

²⁵ Ci apimo botgi ryal ki jabu ki jami me tic, amiyogi gityer me ot pa Lubaŋawa ma con kabaka ki lumi-tamme ki luditone ki jo Icrael ducu ma gitye i kare-nu gumiyo.

²⁶ Apimo ryal ma romo talanta miya abicel ki pyerabic, ki jami mukene ma romo talanta miya acel, ki jabu ma romo talanta miya acel,

²⁷ ki atabo jabu pyeraryo ma acel acel peke romo darik alip acel, ki atabo mola aryo ma giliyo maber ma rom ki jami me jabu.

²⁸ Awaco botgi ni, “Wun dano maleŋ i nyim Rwot, ki jami ducu bene leŋ; ryal ki jabu ducu gin aye mot me gityer ma cwiny dano opwoyo me miyone bot Rwot, Lubaŋa pa kwarowu.

²⁹ Wugwokgi, wunengi maber nio ka wupimogi i nyim ajwagi madito ki Lulevi kacel ki ludito ma giloyo dog odi pa kwarogi ma i Jerucalem, kun wupimo ki i kicika ma i ot pa Rwot.”

³⁰ Ajwagi ki Lulevi gutiŋo ryal ki jabu ma gupimo kacel ki jami mukene ducu, guterogi guketo i ot pa Lubaŋawa i Jerucalem.

Wot me dok i Jerucalem

³¹ Lacen wacako wot ki i dog kulu Akaya i nino me apar wiye aryo me dwe me acel, me cito i Jerucalem; Lubaŋawa aye obedo ka konyowa, dok ogwokowa ki i ciŋ lumerok ki i ciŋ luli bo ma gubuto ka kiyowa iyo.

³² Ka wao i Jerucalem, ci wabedo kunnu pi nino adek.

³³ I nino me aŋwenne, wacito i ot pa Lubaŋawa, wacako pimo iye ryal ki jabu ki jami tic ducu wamiyogi i ciŋ ajwaka Meremot, ma wod pa Uria. Onoŋo en tye kacel ki Eleajar wod pa Finekaci, kacel ki Lulevi ma gitye kwedgi, ma gin aye Jojabad wod pa Yecwa ki Noadia wod pa Binui.

³⁴ Gikwano jami woko liweŋ, dok gipimogi bene ka gicoyo pekgi i buk i cawa meno.

³⁵ I kare meno jo ma yam gudwogo ki i opii i rok, gucako tyero gitum awaŋa bot Lubaŋa pa Icrael. Gutyero twoni dyaŋi apar wiye aryo pi jo Icrael ducu, ki nyogi romi pyeraboŋwen wiye abicel, ki litino nyogi romi pyerabiro wiye abiro, ki nyogi dyegi apar wiye aryo pi gitum me bal; meno ducu obedo gitum awaŋa bot Rwot.

³⁶ Gin gumiyo cik pa kabaka bot rwodi ki bot luloc ma gitye i lobo me Loka Kulu; gin bene gukonyo dano kacel ki ot pa Lubaŋa.