Ejira 1 - Acoli Baibul

Ciro otito lok

¹ I mwaka mukwoŋo me loc pa Ciro kabaka me Percia, wek lok pa Rwot ma yam oloko ki i dog Jeremia ocobbe kakare, cutcut Rwot otugo cwiny Ciro kabaka me Percia omiyo en otito lok oromo i lobo ma i te kerre ducu. En ocoyo lok man bene ki waraga ni,

² “Ciro kabaka me Percia owaco kuman ni, Rwot, ma en Lubaŋa me polo, otyeko miyo ker ducu ma i wi lobo i ciŋa, dok ocika ni ager ot pire i Jerucalem ma tye i Juda.

³ Bot ŋat mo keken ma i kinwu ma i kom lwakke ducu awaco ni, Lubaŋane myero obed kwede. Wek en oa ocit i Jerucalem, ma tye i Juda, ka gero ot pa Rwot, Lubaŋa pa Icrael, en Lubaŋa ma gaŋ kalle Jerucalem.

⁴ Pienno dano acel acel ma pud odoŋ i kabedo mo ma en bedo iye, wek jo ma i kabedo meno gumiye kony me ryal ki jabu, kacel ki jami-gu ki lim makwo, kun gimedo i kom gityer ma igi opwoyo ma gimiyo pi ot pa Lubaŋa ma tye i Jerucalem.”

Jo ma giterogi i opii gudwogo cen i Jerucalem

⁵ Ludito ma giloyo dog odi pa kwarogi ma tye i kaka pa Juda ki Benjamin, kacel ki ajwagi ki Lulevi ma Lubaŋa otugo cwinygi, gucako yubbe me cito ka gero ot pa Rwot ma tye Jerucalem odoco.

⁶ Jo ducu murumogi gumiyogi kony me jami me ryal, jabu, ki lwak jami mapatpat, kacel ki lim makwo-gu, ki mot ma welgi doŋo, medo i kom lim ducu ma dano gutyero ma cwinygi opwoyo me miyone.

⁷ Kabaka Ciro bene okwanyo jami ma yam gitiyo kwedgi i ot pa Rwot woko ma yam Nebukadnejar oyako ki i Jerucalem ci otero oketo i ot jok pa lwak lubaŋane,

⁸ Ciro kaba ka me Percia okelogi ci omiyogi i cin Mitredat ma lakan lim, en ma okwano lwak jami meno ducu i nyim Cecbajar ma en rwot me Juda.

⁹ Wel jami onoŋo yam tye kit man: Becen me jabu alip acel, becen me ryal alip acel, ata bo weer me waŋo odok eceta pyeraryo wiye aboŋwen,

¹⁰ atabo me jabu pyeradek, atabo me ryal alip aryo ki miya aŋwen ki apar, ki jami mukene alip acel;

¹¹ jami me jabu ki me ryal ducu oromo alip abic ki miya aŋwen ki pyerabicel wiye aboŋwen, Jami magi ducu Cecbajar odwokogi i Jerucalem i kare ma jo ma yam giterogi i opii i Babilon gidwokogi kwede cen i Jerucalem.