Ejekiel 8 - Acoli Baibul

Cwiny pa Lubaŋa otero Ejekiel i Jerucalem

¹ I nino dwe abic, dwe me abicel, mwaka me abicel ma doŋ wabedo kwede i opii, ludoŋo me Juda onoŋo gubedo i oda gitye ka lok kweda. Cutcut tek pa Rwot Lubaŋa obino opoto i koma.

² Aneno ci aneno gin mo ma nen calo dano. Cakke ki i pyere tuŋ piny, onoŋo nen calo mac, doŋ a i pyere dok kwede malo onoŋo ryeny aryenya calo mola.

³ Ci ocwalo gin ma obedo calo ciŋ dano ci omako yer wiya otiŋa kwede malo. Doŋ i ginanyuta man Cwiny pa Lubaŋa otiŋa malo wa i kin polo ki lobo ci otera i Jerucalem. Otera i dog gaŋ ma i iye ma tye’ yo tuŋ acam me ot pa Lubaŋa, ka ma onoŋo cal jok mo tye iye, co ma miyo nyeko mako Lubaŋa,

⁴ I kare ma atye kunnu aneno deyo pa Lubaŋa pa Icrael kit macalo onoŋo aneno kwede deyone i ginanyuta ma aneno i nota.

⁵ Lubaŋa owacca ni, “Wod pa dano, tiŋ waŋi malo kombeddi inen yo tuŋ acam.” Atiŋo waŋa malo aneno yo tuŋ acam, ci aneno cal jok ma kelo nyeko tye cok ki keno tyer i dog gaŋ ka ma gidonyo ki iye.

⁶ Lubaŋa dok owacca ni, “Wod pa dano, tika ineno gin ma jo Icrael gitye ka timoneni, gin me kwer madito keken wek giryema woko ki i kabedona maleŋ? Pud dok ibineno gin me kwer madit makato man ma gitimo.”

⁷ Dok okela i doggola me dyekal; i kare ma aneno piny, ci anene kor ot ka ma otuc.

⁸ Ci en owacca ni, “Wod pa dano, muk kor-ot kany.” Ka amuko kom ot, ci anoŋo doggola.

⁹ En owacca ni “Dony i ot ci inen gin me kwer me lewic ina gitye ka timone kany-nyi.”

¹⁰ Kit meno adonyo i dyere ci aneno kor ot ducu gigoyo iye kit cal ducu mapatpat. Cal gin ma lak alaka piny, ki cal lee mogo ma komgi ki, keni ma gikwero, ki kit cal jogi ducu me ot pa Icrael.

¹¹ Doŋ onoŋo tye kunnu jo pyerabiro i, kom ludoŋo me ot pa Icrael ma gucuŋ i nyim cal jogi-gu, kacel ki Jajania wod pa Capan ma ocuŋ i kingi. Dano acel acel onoŋo omako atabo weerre i ciŋe, kun yito me odok eceta ma giwaŋo duny cito malo macalo pol.

¹² Dok en owacca ni, “Wod pa dano, tika doŋ ineno gin ‘ma ludoŋo me ot pa Icrael gitye ka tiyone i, muŋ i colpiny ca? Gin ducu gitye ka woro jogi i kicika ma opoŋ ki cal lubaŋa-gu. Gin giloko kekengi ni, “Rwot pe nenowa, Rwot doŋ otyeko bwoto lobo man woko.’ ”

¹³ Rwot owacca ni, “Ibineno gin me kwer madito makato man ma gitimo.”

¹⁴ Ci okela i doggola me dog gaŋ ma tye yo tuŋ acam me ot pa Rwot; ci anene mon gubedo kunnu gitye ka kok pi jok Tamuj.

¹⁵ Ka openya ni, “Wod pa dano, doŋ ineno gin man?’ Pud dok ibineno gin me kwer madito makato: magi woko.”

¹⁶ Ci otera i dyekal ma tye i ot pa Rwot. Ci aneno jo ma romo pyeraryo wiye abic tye cok ki doggola me ot pa Rwot, i kin keno tyer ki ka ma gidonyo kwede i ot. Gin jo-nu guloko ŋegi i kom ot pa Rwot, kun nyimgi okemo tuŋ wokceŋ, gitye ka ryebbe piny me woro ceŋ ma tye ka tuc ki yo tuŋ wokceŋ.

¹⁷ Ci en openya ni, “Wod pa dano, doŋ ineno gin man? Man mono jo me ot pa Juda gineno ni lok matidi ki botgi ka gibedo ka timo gin me kwer kany, wek gubed ka miyo tim bwami omedde onya i lobo, kun gibedo ka neto cwinya jwi wek kiniga omaka doki aye? Nen kit macalo gitye ka nywara kwede i yo marac mukato kare.

¹⁸ Pi meno, abitimogi ki akemo; pe abiparo pigi, dok bene kica pe bimaka i komgi, Kadi bed gukok bota kun gilego lega ki dwan maloŋo, pe abiwinyo kokogi.”