Ejekiel 5 - Acoli Baibul

Ejekiel olyelo yer wiye ki yer tike woko

¹ Lubaŋa owacci, “Wod pa dano, kwany pala lucwan mabit ci iti kwede macalo lyedi pa lalyel wic, lyel ki yer wii wa ki yer tiki bene; ka doŋ ikwany lapim, ci ipok yer woko i dul adek.

² Dul me adekke-ni ibiwaŋo woko i mac i dye gaŋ, kun iporo kare ma noŋo mony doŋ orumo gaŋ otum. Kwany dul me adek mukene ci itoŋ woko ki pala lucwanni i kare ma noŋo iwoto irumo gaŋ. Doŋ dul me adekke mudoŋ-ŋi kwany ibol i yamo ci an abilwenyo i kome ki pala lucwanna.

³ Gwok yer mogo ci itwe woko i dog boŋoni.

⁴ Dok ikwany yer mogo ki i kom yer ma onoŋo igwoko-ni, ci ibol woko i mac, wek owaŋ woko. Doŋ mac bia ki i kom yer man ci nya o kwede wa i kom ot pa Icrael.”

⁵ Rwot Lubaŋa owaco kuman ni, “Nen, Jerucalem. Doŋ atyeko kete i cwiny rok ducu, kun lobo mapol orume woko dyere.

⁶ Ento Jerucalem ojemo woko i kom gin ma an aciko ci olokke ka timo gin maraco atika makato rok mukene-gu ducu, obedo gin mudiŋ ma pe lubo cikka makato rok mukene ma yam gurumo en dyere-gu ducu. Jo Jerucalem gukwero tiyo gin ma an aciko, gukwero bene lubo cikka.

⁷ Mumiyo Rwot Lubaŋa owaco kuman ni, wun aye doŋ rok ma luyela makato lurok ma gurumowu dyere-ni, en gin mumiyo pe wuye lubo cikka ducu ma aketo, dok bene pe wugwoko gin ma an aciko, ento wun dok wubedo ka lubo cik pa rok mukene ma gurumowu.

⁸ Doŋ pi meno, an Rwot Lubaŋa atito botwu ni abiŋolo kop i komwu ma lwak me rok ducu gineno.

⁹ Doŋ pi gin me kwer ducu ma doŋ wutyeko timone, abitimo gin ma yam pud peya atimo i komwu, en lakit gin acel-lu ma pe abitimo doki.

¹⁰ Doŋ adwoggine aye ni wego ma i Jerucalem gibicamo awobegi woko, ki awobe bene gibicamo wegigi woko ki i dyewu. Dok bene abiŋolo kop i komwu acobo kakare, doŋ jo mogo ki i kinwu ma gibidoŋ gibedo kwo, abikeyogi woko ata.

¹¹ Pi meno, kit macalo an Lubaŋa makwo-ni, man lok pa Rwot Lubaŋa, adada, pien doŋ wubalo kabedona maleŋ woko ki tim me kwerwu-gu ducu, ki gin ducu ma obedo cilo ma cwinya dagi, pi meno abinekowu woko, pe abinenowu ki wan maber, dok bene kica pe bimaka i komwu wacel.

¹² Dul me adek pa lwak mewu, two gemo ki kec binekogi woko i dye gag; ki dul me adek mukene gibinekogi woko ki pala lucwan i ŋe gaŋ; doŋ dul me adek mudonne-ni abikeyo woko ata, doŋ abiwoto pala lucwan aye aryemogi kwede.

¹³ “Kinigana bitum gire kene kit meno, doŋ abitoyo akecana i komgi ka doŋ cwinya bikwe. Ka man otimme gibiŋeyo ni an a Rwot, doŋ aloko ki nyeko, i kare ma atoyo akecana i komgi.

¹⁴ Doŋ makato ducu abiweko pacowu doŋ obur wun wubibedo ginacaya i kin lurok ducu ma gurumowu dyere ki bot jo ducu ma gikato ki ka ŋet pacowu ma odon obur-ri.

¹⁵ “I kare ma abiŋolo kop i komwu ma noŋo kiniga omaka ki akeca, abiketo can magwa i komwu. Rok ducu ma gurumowu gibibedo ki lworo madwoŋ. Gibicayowu kun giloko lok aŋec i komwu ci wubibedo lanen me pwonyogi.

¹⁶ Abijuko kit cam ducu ma yam wunono-ni pe doŋ nen, man bimiyo kec nekowu matek. Wubiwinyo arem me kec matek mada calo atero ma lake bit ma gicelo i komwu wek otyekwu woko.

¹⁷ Abicwalo kec ki guu-gu me neko litinowu woko, dok bene abicwalo two gemo ki tim bwami ki lweny me nekowu me tyekowu woko. An Rwot doŋ aloko.”