Ejekiel 42 - Acoli Baibul

Odi aryo ma gigerogi cok ki ot pa Lubaŋa

¹ Dano-nu dok otelo nyima otera i dyekal ma i iye ma tye yo tuŋ acam-mi, ci okela wa i kicika mapol ma onoŋo gukemme ki dyekal me ot pa Lubaŋa ma onoŋo okemme ki ot ma tye yo tuŋ acam-mi.

² Ot man ma onoŋo tye yo tuŋ acam-mi borre onoŋo romo futi miya acel ki pyerabicel, ki lacce onoŋo romo futi pyeraboro.

³ Ki tuŋcel onoŋo okemo kabedo ma lacce romo futi pyeradek wiye aryo ma i ŋet ot pa Lubaŋa, ki tuŋcel onoŋo okemo kabedo ka ma gicano iye gweŋ ma i dyekal ma woko. Ot man onoŋo yam gigero i dul adek ma gukubbe malo i wi wadi, dul ot acel acel onoŋo tye ki yo mukemo yo wadi ma donyo i odi ma gukubbe malo i dul adek-ki.

⁴ I nyim kicika magi onoŋo yo tye iye me donyo i ot ki yo tuŋ i iye kunnu, lacce onoŋo romo futi apar wiye abicel ki borre futi miya acel ki pyerabicel; doggolagi ducu onoŋo tye yo tuŋ acam,

⁵ Kicika ma malo onoŋo gigero madin, pien kicika ma piny ki ma i dyere onoŋo gumayo kabedo malac woko ki piny.

⁶ Pien onoŋo gitye odi ma gukubbe malo i dul adek, onoŋo wir bene pe i igi calo wir ma onoŋo tye i dyekal ma woko-ni, Mumiyo kicika ma malo gidiyo woko obedo madin makato kicika ma gucuŋ i ŋom ki ma i dyere-gu.

⁷ Onoŋo bene tye cel ki woko ma opimme ki kicika ducu atir, kun okemo yo tuŋ dyekal ma woko, doŋ ka ma okemme ki kicika onoŋo borre romo futi pyeraboro.

⁸ Kicika ma onoŋo tye i kom dyekal ma woko onoŋo bocogi romo futi pyeraboro, kun kicika ma okemo ot pa Lubaŋa-gu bocogi onoŋo romo futi miya acel ki pyerabicel.

⁹ Ki yo tuŋ piny i te kicika magi onoŋo tye iye doggola me donyo yo tuŋ wokceŋ, ka onoŋo dano gidonyo i igi ki yo tuŋ i dyekal ma woko,

¹⁰ ka ma cel ma tye yo tuŋ woko ocakke ki iye. Onoŋo tye kicika mogo bene yo tuŋ acuc ma gukemme ki dyekal dok gukemme ki ot madit-ti,

¹¹ onoŋo yo bene tye i nyimgi. Onoŋo giromrom ki kicika ma gitye yo tuŋ acam, ma bocogi ki lacgi bene rom, ki kit ma gigerogi kwede bene rom, wa doggolagu ducu girom,

¹² Onoŋo tye doggola me donyo yo tuŋ wokceŋ ki piny i te kicika ma gitye yo tuŋ acuc, ka ma dano donyo ki iye tuc i yo, ki dok cel ma opoko kingi onoŋo okemme kwedgi.

¹³ Dano-nu dok owacca ni, “Kicika magi ducu ma tye yo tuŋ acam ki kicika ma gitye yo tuŋ acuc ma gukemme ki dyekal-li gin aye kicika maleŋ, I kicika magi en aye ajwagi ma gidonyo ka tic i nyim Rwot gicamo iye gityer maleŋ makato ducu, Kunnu aye giketo iye gityer maleŋ makato ducu, gityer me moko kwon, gitum pi bal, ki gitum pi tino alii, pien kabedo meno aye kabedo maleŋ.

¹⁴ Ka inen ajwagi doŋ gudonyo i kabedo maleŋ, pe gibia gikato woko ki iye gicito i dyekal ma woko laboŋo weko boŋŋigi ma giruko ka gitye ka tic kunnu, pien boŋŋi magi gileŋ. Gibiruko boŋŋi mukene ma pud peya noŋo gucito cok ki kabedo ka ma lwak gicokke iye.”

Kit ma gipimo kwede kabedo murumo ot pa Lubaŋa

¹⁵ Lacen ka doŋ dano-nu otyeko pimo kabedo ma tye yo tuŋ i iye murumo ot pa Lubaŋa, ci otelo nyima otera wadonyo ki i dogcel ma okemo yo tuŋ wokceŋ, ci ocako pimo kabedo ma orumo ot pa Lubaŋa ki woko,

¹⁶ Opimo kabedo ma tye yo tuŋ wokceŋ ki lagada me pimo piny, ci opimo ki lagada meno oromo futi miya aboro.

¹⁷ Ka olokke dok opimo kabedo ma tye yo tuŋ acam, opimo ki lagada me pimo piny oromo futi miya aboro.

¹⁸ Ka dok olokke opimo kabedo ma tye yo tuŋ acuc, opimo ki lagada me pimo piny oromo futi miya aboro,

¹⁹ Lacen olokke yo tuŋ potoceŋ ci opimo ki lagada lapim piny oromo futi miya aboro.

²⁰ Opimo twoke aŋwen ducu. Onoŋo bene tye cel murumo woko, ma borre romo futi mi ya aboro ki lacce bene futi mi ya aboro, wek opok kin kabedo maleŋ ki kabedo me nino ducu.