Ejekiel 35 - Acoli Baibul

Lok ma lanebi otito mukemo got Ceir

¹ Rwot oloko kweda.

² Owacci, “Wod pa dano, cik waŋi inen got Ceir, ci itit lok i kome.

³ Wac bot jo ma gibedo kunnu ni, an Rwot Lubaŋa awaco kuman ‘ni, Nen, atye ki lok i komwu, wun jo ma i kom got Ceir. Abiryeyo ciŋa i komwu ci amiyo lobowu doko obur ka ma dano mo pe bedo iye.

⁴ Abiweko gaŋiwu ducu doko obur, ki wun doŋ wubibedo i lobo ma oballe woko. Man bimiyo wuŋeyo ni an aye a Rwot.

⁵ “Wun onoŋo wubedo lumone pa jo Icrael ducu, kun wumiyo gibedo ka nekogi woko ki pala lucwan i kare ma can opoto i komgi, ki i kare me keto can i komgi me agikki.

⁶ Pi meno, kit macalo atye kwo-ni, man Rwot Lubaŋa ma owaco, doŋ abiyubo to aye ma binekowu, ma binekowu nakanaka tyekowu woko; pien wutye ki bal alii me nek, pi meno to bibedo ka nekowu nakanaka.

⁷ Abimiyo got Ceir doŋ obur, ki lobone doŋ iye noŋo; doŋ abimiyo jo ma gibino ki jo ma gicito gikato ki kenyo gitum woko matwal.

⁸ Abipoŋo wi godiwu ki kom dano ma ginekogi; ki jo ma ginekogi ki pala lucwan gibipoto i wi cerewu ducu ki i notawu ki loŋowu ducu.

⁹ Abimiyo lobowu iye doŋ noŋo kare ducu, ki gaŋiwu bene ducu dano doŋ pe bibedo iye. Man bimiyo wuŋeyo ni an aye a Rwot.

¹⁰ “Yam wubedo ka wacci rok magi aryo, Icrael ki Juda, ki lobogi ducu bidoko mewu, dok bene wubicamo bedo mewu, kadi bed an Rwot aye abedo Lubaŋagi.

¹¹ Pi meno, kit macalo atye kwo-ni, man Rwot Lubaŋa ma owaco, abitic kwedwu kun lubo kit kinigawu ki nyekowu ma doŋ wutyeko nyutogi woko ka maleŋ-ŋi, pien wubedo ki adagadaga i kom jona. Abimiyo wuneya i kinwu kekenwu, ka doŋ acako ŋolo kop i komwu pi gin ma wutimo i kom jona.

¹² Man bimiyo wuŋeyo ni an Rwot onoŋo awinyo lok ma wubedo ka wacone ki cac i kom godi me Icrael, kun wuwacci doŋ gudoŋ igi noŋo, dok ni doŋ gimiyo botwu ni wucam obed mewu,

¹³ Dok bene wumine kenwu me bedo dit makato an woko, kun wunyatte kwede i koma ma wuloko lok mapol; ento meno an awinyo woko.”

¹⁴ Rwot Lubaŋa owaco kuman ni, “Abimiyo lobowu iye doŋ noŋo, wek jo me wi lobo ducu gubed ki yomcwiny pi can ma opoto i komwu.

¹⁵ Kit macalo wubedo ki yomcwiny pi ginaleya pa jo me ot pa Icrael, ni pien lobogi doŋ odoŋ nono, an bene abitimowu kit meno, wun jo ma wubedo i got Ceir, ki jo Edom ducu. Man bimiyo giŋeyo ni an aye a Rwot.”