Ejekiel 34 - Acoli Baibul

Lok i kom lukwat me Icrael

¹ Rwot oloko kweda.

² Owacci, “Wod pa dano, tit lok i kom lukwat pa jo Icrael, ma gin romina. Tit botgi lok ma an Rwot Lubaŋa atye ka wacone botgi kuman ni, Can i wiwu, wun lukwat me Icrael! Wugwoko komwu keken, ento pe wupito romina.

³ Wumato cakgi, wuruko yer romo-gu, wuneko romi mucwe-gu me acamawu, ento pe wupito romina.

⁴ Pe wubedo ka gwoko jo magoro, pe wucano jo ma komgi lit, pe wutweyo tyen jo ma gulimo ret, jo muŋak pe wudwokogi cen, pe wubedo ka yenyo jo ma gurwenyo, ento wubedo ka loyogi ki tek dok ki gero,

⁵ Kit meno guket woko, pien lakwatgi mo onoŋo pe; mumiyo romi gudoko cam pa ŋuu ducu.

⁶ Romina guket woko gubedo ka lak ata i wi godi ducu ki i wi cere maboco-gu ducu. Romina guket woko i wi lobo ducu, ento ŋat mo pe ma oyenyogi nyo ma otemme me nonogi.

⁷ “Kombeddi wun lukwat, wuwiny gin ma an Rwot atye ka wacone botwu.

⁸ Adada kit macalo an Rwot Lubaŋa makwo-ni, myero wuwiny lokka. Romina doŋ gudoko lee me amaka, gudoko cam pa ŋuu, pien onoŋo pe gitye ki lakwat mo. Lukwat pe guyenyo romina, ento gubedo ka pito komgi keken, ma pe gubedo ka pito romina.

⁹ Pi meno, wuwiny lokka, wun lukwat.

¹⁰ An Rwot Lubaŋa atuco botwu atyer ni atye ki lok i komwu. Abikwanyo romina woko ki botwu, abimiyo pe wubedo lukwatgi matwal, dok bene pe doŋ wubimedde ki pito komwu kekenwu. Abilaro romina woko ki i dogwu, pe doŋ wubibedo ka camogi.

Lakwat maber

¹¹ “An Rwot Lubaŋa, atito botwu ni an kikoma aye doŋ abiyenyo romina, dok abiketo cwinya me gwokogi.

¹² Kit macalo lakwat keto kwede cwinye me yenyo romine ma guket woko i kabedo ma tye ka maboco-gu, kit meno bene an abiketo cwinya me gwoko romina, abilarogi, akwanyogi woko ki i kabedo ducu ma yam guket iye i nino me pol ki mutu mapek macol licuc.

¹³ Abikwanyogi ki i kin lurok, kun acokogi ki i wi lobo ducu, ci akelogi wa i lobogi kikome. Abimiyo gibedo ka cam i wi godi me Icrael, i ŋet waŋ it ma gunnye agunya, ki i kabedo ducu ma i lobo ka ma dano bedo iye.

¹⁴ Abimiyo gicamo lum mabeco i kakwat maberre, ki i kabedo ma tye i wi godi maboco me Icrael; gibibuto kunnu i olet ma lobone ber me kakwat, dok gibicamo lum mabeco i wi godi me Icrael.

¹⁵ An kikoma aye abibedo lakwat romina, ci abimiyo gibuto piny, man Rwot Lubaŋa ma owaco.

¹⁶ Abiyenyo romi ma gurwenyo, dok abikwanyo romi ma yam gitye ka lak ata adwokogi cen, abitweyo tyen romi ma ret tye iye, abimiyo romi magoro gijiŋ gidoko tek, dok abiketo waŋa me ne-no romi mucwe ki mategone; abipitogi i kit ma atir.

¹⁷ “Kombeddi doŋ, wun romina, an Rwot Lubaŋa atittiwu ni abiŋolo kop i komwu wun ducu, kun apoko kinwu woko, aketo jo mabeco pat, ki jo maraco bene aketogi pat kaikengi; apoko romi woko ki i kom dyegi.

¹⁸ Lum ma wucamo i kakwat maber-ri mono pe romowu, ma weko wunyono lum mukene wo ko piny ki tyenwu-ni? Dok bene wumato pii maleŋ, ento wurubo pii mukene ki tyenwu wubalo woko!

¹⁹ Wutamo ni myero romina gucam lum ma doŋ wunyono woko piny ki tyenwu, dok wumito gumat pii ma wurubo ki tyenwu wubalo wokoni?

²⁰ “Pi meno, an Rwot Lubaŋa doŋ abiŋolo kop i kin romi mucwe ki romi mujony.

²¹ Kitmacalo wubedo ka coro romi magoro ki lakŋetwu ki gwokwu, kun wutuco igi woko pil ki tuŋwu, wumiyo guket gucito woko wa ka maboco-ni,

²² an abilarogi, pe gibibedo me amaka pa ŋuu; ci abiŋolo kop i kin romi ki romi luwotgi.

²³ Abiketo laticca Daudi bedo lakwatgi, lakwat acel keken; en bipitogi kun bene bedo lakwatgi.

²⁴ Doŋ an Rwot Lubaŋa abibedo Lubaŋagi, ki laticca Daudi bibedo rwot i kingi. An Rwot doŋ atyeko loko man,

²⁵ Abiketo gicikke me kuc kwedgi kun atyeko ŋuu ma yelogi-ni woko ducu ki i lobogi, wek doŋ gubed i dye tim laboŋo ayela mo, kun bene gibuto wa i buŋa.

²⁶ Abimiyo gum i komgi ki i kom kabedo ducu murumo got mera maleŋ, Dok abimiyo kot cwer botgi i kare ma noŋo gimito, kot kikome, ci bikelo gum botgi,

²⁷ Yadi ducu me tim binyako nyiggi, ki lobo bene bimiyo ginapita ma gipuro iye cek nya mabup, man miyo gibedo i lobogi laboŋo ayela mo. Ka doŋ alaro jona woko ki i ciŋ jo ma yam gulokogi gudoko opiigi, kun bene aturo rii okol ma yam gitweyogi kwede woko, ci doŋ gibiŋeyo ni an aye a Rwot,

²⁸ Pe doŋ gibibedo lee me amaka pa lurok matwal, kadi ki ŋuu me tim bene doŋ pe bimwodogi; gibibedo maber laboŋo ayela mo, dok bene ŋat mo pe ma bimiyo gibedo ki lworo.

²⁹ Abimiyogi ŋom maber ma ceko cam mabup atika, ma bimiyo kec doŋ pe binekogi matwal i lobogi, doŋ pe gibibedo ginacaya pa jo me rok ducu,

³⁰ Ci gin ducu gibiŋeyo ni an aye a Rwot Lubaŋa gi, atye ka gwokogi, dok bene gin jo me ot pa Icrael gin jona. Man Rwot Lubaŋa ma owaco.

³¹ Doŋ wunromina, an aye ma akwayowu i oletta, an Lubaŋawu,” man Rwot Lubaŋa ma owaco.