Ejekiel 33 - Acoli Baibul

Tic pa lakur-piny;

¹ Rwot oloko kweda.

² Owacci, “Wod pa dano, tit bot lutuwu jo Icrael kun iwaco botgi gin ma timme ka akelo lweny i lobo mo-ni. Gin wegi lobo meno giyero dano ki i kingi me bedo lakur-pinygi.

³ Ka ce oneno lukwor gibino i lobo, ci kutotum wek dano guŋe komgi;

⁴ Ka ce inen dano mo owinyo koko tum, ce pe oketo iye cwinye, ka lukwor gubino guneke, lok me tone bibedo i wiye kekene.

⁵ Tone bedo balle gire, pien kadi en owinyo koko tum, ci pe oketo iye cwinye. Ka nene oketo iye cwinye, kono onoŋo olaro kwone.

⁶ Ento ka ce lakur-piny oneno lukwor bino ce pe ‘okuto tum, wek otit bot dano guŋe komgi, ce lukwor gubino guneko ŋat mo ki i kingi; doŋ dano ma ‘kit meno bito i balle, mumiyo abidwoko alii me tone i wi lakur-piny.

⁷ “Doŋ kombeddi, in wod pa dano, aketi me bedo lakur-piny pi rok me Icrael. Ibitito botgi lok ducu ma acikogi kwede ma an awacci,

⁸ Ka ce awaco bot latim marac ni, In latim marac, ibito ada, ento ka pe iloko bote kun icike me lokke owek timo gin marac, ci dano meno ma latim marac bito i ballenu, ento alii me tone abidwoko i wii.

⁹ Ento ka ce onoŋo ijuko en latim marac meno, kun icike ni owek yo me tim maraco, ka ce pe olokke oweko yo me tim maracone-ni, en bito i balle-nu, ento noŋo in giri ilaro kwoni,

Gin ma’ Lubaŋa timo tye atir

¹⁰ “Doŋ in, wod pa dano, wac bot jo me ot pa Icrael ni, Wun wuwaco kuman ni, ‘Tim aranyiwa ki balwa ducu gire tye i wiwa, doŋ gimiyo wato woko ata; dok watwero bedo kwo niŋ iniŋ?’

¹¹ Wac botgi ni, Macalo atye kwe-ni, man Rwot Lubaŋa ma owaco, cwinya pe bedo yom me neno ka latim marac to, ento amito en oŋuti owek timo bal ci olokke odwog bota wek obed kwo. Wulokke, wudwog cen wuwek timo bal; piŋo wumito ni wuto woko, wunjo me ot pa Icrael?

¹² “Kombeddi, in wod pa dano, wac bot lutuwu jo Icrael ni, Ka dano ma kite atir otimo bal, ci gin maber ma en otiyo doŋ pe twero lare. Ka ce dano ma latim marac oweko timo gin marac, pe gibiketo can i kome, ento ka ce dano ma kite atir ocako timo bal, pe dok bimedde ki bedo kwo.

¹³ Ento kadi bed awaco bot dano ma kite atir ni bibedo kwo ada, ento ka ce en ojeŋŋe i kom kite ma atir-ri ce ocako timo bal, ci pe abipo i kom gin mabeco ducu ma en otiyo kadi ki acel. En bito pi ballenu ma en otimo-ni.

¹⁴ Doki kadi awaco ki dano ma latim marac ni, ‘In ibito ada,’ ento ka ce en olokke oweko timo bal, ce otiyo gin ma cik mito dok ma tye atir,

¹⁵ Labolle tye kit man ni, ka ce latim marac meno okwanyo gin ma gijeŋo bote odwoko cen bot rwode, dok bene ka en odwoko gin ma yam en oyako ayaka cen, kun lubo cik ducu ma miyo kwo, ma pe doŋ timo kit bal mo; en bibedo kwo ada, pe bito gire.

¹⁶ Doŋ abiweko bal ducu ma yam en otimo pe doŋ abipo pigi. En doŋ gire bibedo kwo ada pien otimo gin ma cik mito dok ma tye atir.

¹⁷ “Ento lutuwu giwacci, ‘Gin ma Rwot tye ka timone pe atir!’ Meno pe kakare, gin ma gin timo aye pe atir.

¹⁸ Ka ce dano ma kite atir olokke oweko timo gin ma tye atir, ce otimo bal, en bito pi balle-nu.

¹⁹ Ento ka latim marac olokke oweko timme maraco, ce otiyo gin ma cik mito dok ma tye atir, en bibedo kwo pire.

²⁰ Ento wun wuwacci, ‘Gin ma Rwot tye ka timone pe atir. Abiŋolo kop i komwu kun Lubo gin ma wutimo wun jo Icrael.”

Lok i kom kit ma Jerucalem opoto kwede

²¹ I nino dwe abic, dwe me apar, i mwaka me apar wiye aryo, ma onoŋo doŋ giterowa watye i opii, dano mo ma obwot ki i Jerucalem obino bota ci otitta ni gaŋ me Jerucalem doŋ opoto woko.

²² Otyeno ma onoŋo dano-nu pud peya obino bota, onoŋo doŋ alimo tek ma nyuto ni Rwot onoŋo odiya ki ciŋe i cawa meno. I odiko ma doŋ dano-nu obino bota ci Rwot oyabo doga omiya teko me lok ci doga oyabbe, pe dok abedo ma doga oto.

Bal pa lwak

²³ Rwot oloko kweda,

²⁴ Owacci, “Wod pa dano, jo magi ma gibedo i gaŋi magi ma doŋ odoŋ obur i lobo Icrael-li giwacci, ‘Abraim yam obedo dano acel keken, ento gimiye lobo man ocamo woko ducu obedo mere kene. Ento wan wapol, adada lobo-ni doŋ gimiyowa me bedo mewa.’

²⁵ “Pi meno in myero itit botgi gin ma an Rwot Lubaŋa atye ka wacone kuman ni, Wun wucamo riŋo ma tye ki remo i kome, kun wuilo waŋwu malo wuworo cal jogi. Wuneko dano bene, ci wutamo ni lobo-ni wubicamo bedo mewu ada?

²⁶ Wun doŋ wujeŋŋe mewu i kom pala Lucwan, wutimo gin me kwer mapol kun dano acel acel balo dako pa lawote; ci wutamo ni wubicamo-lobo-ni bedo mewu ada?

²⁷ “Wac botgi ni Rwot Lubaŋa owaco kuman ni, Kit macalo atye kwe-ni, adada jo ma gibedo i kabedo ma doŋ odoko wi obur-ri gibinekogi woko ki pala Lucwan; ki jo ma ginoŋogi gibedo i tim ata abimiyo ŋuu mwodogi woko. Doŋ jo ma gibedo i gaŋi me cel gogo, ki jo ma gibedo i boro got-gu two gemo binekogi woko.

²⁸ Abimiyo lobo-ni doko obur dok kabedo ka ma dano mo pe bedo iye, Man bimiyo teko ma onoŋo giwakke pire-ni doŋ gik woko. Godi me Icrael doŋ bidoŋ noŋo ma ŋat mo pe dok bikato ki i kingi.

²⁹ Ka inen amiyo lobo odoko obur, dok ka ma dano pe bedo iye, pi tim me kwergi ducu ma gutimo, ci bimiyo giŋeyo ni an aye a Rwot.”

Adwoggi me lok pa lanebi

³⁰ Rwot owacci, “In, wod pa dano, lutuwu gitye ka lok piri ka gurwatte i ŋet cel me gaŋ nyo i dog odigi. Dano acel acel waco ki lawote ni, ‘Bin, waciwiny kit lok aŋo ma oa ki bot Rwot kombeddi.’

³¹ Ci gibino boti kit macalo dano kare ducu gibino-ni, gibedo piny i nyimi macalo jona, kun giwinyo gin ducu ma in itito botgi, ento pe gicitiyo gin ma in itito botgi-ni. Ginyuto ni gitye ki mar madwoŋ ki lok goba ma giloko ki doggi keken, ento guketo cwinygi mere i noŋo lim i yo ma pe atir.

³² Doŋ in inen botgi calo dano mo ma wero wer me mar ma noŋo winyo dwane mit, kun bene goyo agoya ki nana, Giwinyo lok ducu ma iwaco-gu, ento pe gilubo mo kadi ki acel.

³³ I kare ma lokki bitimme, ci bitimme ada, man bimiyo giŋeyo ni lanebi mo yam obedo i kingi.”