Ejekiel 30 - Acoli Baibul

Rwot biketo can i kom jo Ejipt

¹ Rwot doki oloko kweda.

² Owacci, “Wod pa dano, tit lok kun iwaco gin ma an a Rwot Lubaŋa atye ka lokone kuman ni, “Wukok ni, ‘Tin aye nino ma kelo lworo!’

³ Ninone doŋ cok, en nino ma Rwot bitic iye-ni, Man bibedo nino ma opoŋ ki pol keken, en aye bene kare ma can bipoto kwede i kom rok ducu.

⁴ Lweny bibedo i Ejipt, ki remcwiny madwoŋ bibedo i Etiopia. Jo ma gibedo i Ejipt gibinekogi woko; gibiyako lonyone ducu gitero woko, ci gibiweko doŋ obur.

⁵ “I lweny meno gibineko askari ma giwilogi ki lim ma gua ki i Etiopia, Put ki Lud, Arabia, ki Libya, ki wegi lobona kikomgi.”

⁶ Rwot owaco kuman ni, “Cakke i Migdol o kwede yo tuŋ Ciene, jo ducu ma gikonyo jo Ejipt gibinekogi woko i lweny. Dul mony pa jo Ejipt ma giwakke ni gitek-ki gibijwerogi woko ducu. Gibinekogi woko ki pala lucwan i dye gaŋ. Man Rwot Lubaŋa ma owaco.

⁷ Lobe Ejipt bidoko gin ma iye odoŋ nono, gaŋine igi bidoŋ nono ki i kin gaŋi ducu ma doŋ gityeko balogi woko.

⁸ Ka acwinyo Ejipt woko ki mac, dok bene ka gineko jo ma konyogi woko, man bimiyo giŋeyo ni an aye a Rwot.

⁹ “Ka nino meno oo, ma Ejipt doŋ gijwero woko, abicwalo lukwena ma gikwaŋo mel wek gumi lworo omak jo Etiopia ma cwinygi pe peto-ni; gibibedo ki remcwiny madwoŋ i nino ma can bipoto i kom jo Ejipt; pien niŋone tye ka bino!”

¹⁰ Rwot Lubaŋa owaco kuman ni, “Abitic ki Nebukadnejar kabaka me Babilon me giko te lonyo me Ejipt woko.

¹¹ En kacel ki jone, ma gin jo me rok mager adada, gibikelogi me balo lobo woko; ci gibilwenyo i kom jo Ejipt ki pala lucwan, man miyo lobo doŋ bipoŋ ki kom dano muto keken.

¹² Abimiyo pii kulu Nail two woko, dok bene abicato lobo woko bot jo maraco; abibalo lobo kacel ki jami ducu ma tye iye amiyo iye doŋ noŋo. Lurok gibijwero lobo woko ducu. An Rwot doŋ atyeko loko.”

¹³ Rwot Lubaŋa owaco kuman ni, “Abijwero cal jogi apaya ki cal lubaŋa mogo me goba ki i Mempic; laker mo doŋ pe bibedo i lobo Ejipt. Kit meno abimiyo lworo bedo tye i lobo Ejipt.

¹⁴ Abimiyo lobo Patroc doŋ noŋo, dok bene abicwinyo mac woko i kom Joan, ci abiŋolo kop i kom jo Tebec kun alubo te cik kikome me ŋolo kop.

¹⁵ Dok bene abionyo akemona i kom jo Pelucium, ma en aye cel gogo matek pa jo Ejipt, ka dok aneko lwak me Tebec woko ducu.

¹⁶ Ci abiketo mac woko i kom Ejipt; ki jo Pelucium gibibedo ki toncwiny madit adada. Gibimuko cel me gaŋ Tebec gireto woko piny, ki gaŋ bene bipoŋ woko ki pii aluka.

¹⁷ Awobe On ki awobe Pibecet gibinekogi woko i lweny, ki mon gibimakogi giterogi woko i opii,

¹⁸ Piny bicido woko i Tapanec i kare ma abituro ker me Ejipt woko, ki tekke ma onoŋo jone giwakke k wede-ni bene doŋ bigik. Pol biumo Tapanec woko, ci jone gibiterogi woko i opii.

¹⁹ Meno aye kit ma abiŋolo kwede kop i kom Jo Ejipt kun alubo te cik me ŋolo kop. Man bimiyo giŋeyo ni an aye a Rwot.”

Bad kabaka me Ejipt otur

²⁰ I nino dwe abiro dwe me acel, i mwaka me apar wiye acel, Rwot oloko kweda, owacci,

²¹ “Wod pa dano, doŋ atyeko turo bad Parao ka baka me Ejipt woko. Doŋ inen ŋat mo ma otweyo ki bandej wek ocaŋ woko pe, wek dok odok tek me mako pala lucwan.

²² Pi meno Rwot Lubaŋa owaco kuman ni, Nen, atye ki lok i kom Parao ka baka me Ejipt. Abituro bade ryoryo ducu, bade matekke-ni ki bade ma yam otur-ri; ci amiyo pala lucwan poto woko piny ki i cine.

²³ Abikeyo jo Ejipt woko i kin jo me rok ducu, abimiyo giket giromo wi lobo woko ducu.

²⁴ Doŋ abijiŋo bad kabaka me Babilon ryoryo ducu bedo matek, ci amiyo pala lucwanne i ciŋe en mako; ento abituro bad Parao ryoryo ducu woko, miyo en doŋ bibedo ka cur i nyim kabaka me Babilon calo dano ma doŋ gityeko keto ret woko i kome.

²⁵ Abijiŋo bad kabaka me Babilon bedo matek, ento bad Parao bipoto woko; ci bimiyo giŋeyo ni an aye a Rwot. Ka doŋ aketo pala lucwanna i ciŋ kabaka me Babilon, ci en biryeyo woko i kom lobo Ejipt;

²⁶ ci akeyo jo Ejipt woko ducu i kin lurok, kun aketogi i wi lobo ducu. Man bimiyo giŋeyo ni an aye a Rwot.”