Ejekiel 3 - Acoli Baibul

¹ Lubaŋa owacca ni, “Wod pa dano, cam gin: ma doŋ gimiyi; cam buk adola man, ci icit ilok bot jo me ot pa Icrael.”

² Kit meno aŋamo doga, ci omiya buk adola ni acam.

³ Ci owacca ni, “Wod pa dano, cam buk adola man ma amiyo boti, nio ka iyeŋ woko kwede ma ii odeŋ.” Ci acamo; anoŋo obedo lim mada i doga calo moo kic.

⁴ Lubaŋa dok owacca ni, “Wod pa dano, cit io bot jo me ot pa Icrael ci it it botgi gin ducu ma atye ka wacci-ni,

⁵ Pe atye ka twali ni icit i rok mo ma jone loko leb ma’ niaŋ iye tek. Ento abecwali bot jo me ot pa Icrael.

⁶ Ka ce acwali bot rok ducu ma jone loko leb matek mapatpat ma in pe iniaŋ iye, ci kono guwinyo lok ma iwaco botgi.

⁷ Ento jo me ot pa Icrael pe gibiwinyo lokki; dok bene pe gibiwinyo lokka. Pien gin’ ducu cwinygi nwaŋ dok wigi tek:

⁸ Nen, kombeddi doŋ abimiyo cwinyi bedo nwaŋ calo cwinygi ki wii bene bedo tek calo wigi.

⁹ Abimiyo wii bedo tek calo got lela matek makato got mabit woko; pe ilworgi, pe bene ilwor kit waŋ ma gineni kwede, pien gin jo ma lujemo.”

¹⁰ Lubaŋa omedde ki lokke kun waco bota ni, “Wod pa dano, lok ducu ma abiwacci myero igam obed i cwinyi, dok iwiny bene ki iti.

¹¹ Ka doŋ ia icit bot jo ma gitye i opii, cit bot lutuwu kikome, ci iwac botgi ni, ‘Rwot Lubaŋa owaco kuman ni’; kadi giwinyo nyo gikwero winyone.”

¹² Cutcut Cwiny pa Lubaŋa otiŋa woko malo, ci awinyo dwan ki yo tuŋ ŋeya ma mor matek calo oyeŋyeŋ ma yeŋo piny, kun daŋŋe ni, “Gipwo deyo pa Rwot i kabedone!”

¹³ Awinyo bwom lee ka tye ka gone kacel i yamo, ki koko pa lawala bene mor matek calo oyeŋyeŋ ma yeŋo piny.

¹⁴ I kare ma Cwiny pa Lubaŋa oila malo otera woko, ci abedo ki keco i cwinya, kiniga bene omaka woko, ci acito ma doŋ onoŋo Rwot tye ka diya matek ki cine,

¹⁵ Acito i Tel Abib, ka ma onoŋo jo ma giterogi i opii gibedo iye, i ŋet kulu Kebar. Abedo kunnu i kingi pi nino abiro kun atye ki ur madit atikatika pi gin ma onoŋo aneno otimme i koma ca.

Lubaŋa ociko Ejekiel ni obed lakur-piny

¹⁶ Lacen i ŋe nino abiro-nu Rwot oloko kweda.

¹⁷ En owacci, “Wod pa dano, doŋ aketi me bedo lakur-piny pi rok me Icrael. Ibitito botgi lok ducu ma acikogi kwede ma an awacci.

¹⁸ Ka ce awaco ni dano ma latim marac bito ada, ento kun in pe ijuko en ma icike ni olokke owek timo gin marac, wek olar kwone, en bito i balle-ni; ento alii me tone abidwoko i wii.

¹⁹ Ento ka ce onoŋo ijuko en latim marac meno, icike ni owek yo me tim maraco, ka pe olokke oweko timo gin maraco, nyo yo me tim maracone-ni, en bito i balle-nu; ento noŋo in giri ilaro kwoni.

²⁰ Dok bene ka ce dano ma kite atir olokke woko oweko timo gin ma tye atir, ce otimo bal, ce an aketo ariya mo i nyime, ci en bito, pien onoŋo in pe ijuke, en bito pi balle, ki tic ma atir ma yam en otiyo pe doŋ abipo pire; ento alii me tone abidwoko i wii.

²¹ Dok bene ka ce ijuko dano ma kite atir ni pe otim bal, ka en owinyo lokki pe otimo bal, ci adada en bibedo kwo, pien owinyo lok ma ijuke kwede; ci in bene ibilaro kwoni.”

Lanebi Ejekiel pe twero lok

²² Rwot oketo ciŋe i koma;’ ci owacca ni, “A malo, ci icit i dye bar, an abilok kwedi ki kunnu.”

²³ Ci aa malo acito i dye bar, ci aneno deyo pa Rwot ocuŋ kunnu ma rom ki deyo ma akwoŋo nenone i ŋet kulu Kebar; ci cutcut aryebbe woko piny,

²⁴ Ento Cwiny pa Rwot odonyo i koma, ci ociba acuŋ ki tyena; ci oloko kweda kun wacci, “Cit paco, ci ilor wii woko i odi.

²⁵ Ci in wod pa dano, gibitweyi woko ki tol, man bimiyo pe itwero cito woko i kin dano.

²⁶ Abimiyo te lebi dwalle woko ki i dogi, wek ibed ladogeoto ma pe doŋ itwero juko dano; pien gin jo ma lujemo.

²⁷ Ento ka ce doki aloko kwedi, ci abiyabo dogi, ci in ibiwaco botgi ni, ‘Rwor Lubaŋa owaco kuman ni’; ŋat ma biwinyo lok man wek owiny, ki ŋat ma kwero winyo lok man wek okwer; pien gin jo malujemo.