Ejekiel 27 - Acoli Baibul

Wer lyel ma dano guwero gukoko ki Turo

¹ Rwot oloko kweda.

² Owacci, “Wod pa dano, kombeddi cak wer lyel

³ kun ikok kwede pi Turo, ma en gaŋ ma ocuŋ i dog nam, dok bene lacat-wil ki jo ducu ma gibedo i wanwat mapatpat ma orumo dog namo Tit ki Turo ni Rwot Lubaŋa owaco kuman ni, “In Turo, onoŋo iwaco ni, ‘An aber anen mwonya mada.’

⁴ Waŋ apokki loboni ducu tye wa i cwiny dye nam madit; jo ma gugeri gugeri woko maber ma inen mwonya ada calo mel.

⁵ Gupayo bao me apeta mapol ki i kom yat odwon ma gukelo ki i got Cenir. Gutoŋo bene yat cedar ki i Lebanon ci guyubo ki yat me yaro boŋo mel wek yamo okuti.

⁶ Gutoŋo kworo me Bacan ci guyubo pol me cero yeyani; gipeto dye kabedoni ki bao me yadi mabeco ma gikelo ki i lobo Caiprac, kun gidero woko bene ki lak lyec.

⁷ Boŋo me ayara malo i wi yat me mel obedo boŋo camanini ma gidero maberre ma gikelo ki i Ejipt, gitwero neno ki cen ci giŋeyo oyotoyot. Kemani giyubo ki boŋo maberre, boŋo ma obedo bulu ki lamar lamar, ma gikelo ki i cula nam me Elica.

⁸ Jo ma gibedo i Cidon ki i Arvad gin aye gubedo lucer yeyani, Joni ma gikwiri aye gubedo ludwo mel.

⁹ Ludoŋo me Gebal ki jone ma gikwiri onoŋo bene gibedo i kin joni, ma giyubo mel me wot i nam; mel ducu me nam ki jo ma dwoyogi gubedo i kin joni, gubedo ka cat i dukanni.

¹⁰ “Askari ma gua ki i Percia, Lud ki Put onoŋo gitye i dul monnyi macalo lulwennyi; gunabo kwot ki otaŋ-wic i gaŋ monnyi. Gin bene aye ma gumiyi deyo.

¹¹ Jo Arvad ki monygi guito i kom celli doŋ gurumo woko, ki jo Gamad guito malo i wi lubeleni ducu. Gunabo kwotgi i kom cel gurumo kwede woko. Gin aye ma gumiyo inen maber ma mwonya twatwal-li.

¹² “Ibedo ka cato wil i lobo Tarcic kun igamo ryal, nyonyo koc ki racac ma gimiyi pi wilo jamini mabeco madwoŋ ata.

¹³ Jo Javan, Tubal, ki Mecek gubedo ka cato wil ki joni kun gimiyo danogi ki jami mola-gu giloko ki jami ma joni gicato.

¹⁴ Joni gucato jamigi woko kun giloko ki aguragura me tiŋo yec, ki aguragura ma giŋweco kwedgi i lweny, ki kana-gu ma gikelogi ki i Bet-togarma.

¹⁵ Jo Rodec bene gubedo ka cato wil ki joni; lobo mapol me dog nam gudoko cukki, ka ma joni giwilo iye lak lyec mapol ki poi kun gi loko ki jamigi.

¹⁶ Jo Edom bene gubedo ka cato wil ki joni pi jamini madwoŋ-gu; gubedo ka lokogi ki emeradi ma en kidi me wel madwoŋ, boŋo ma lamar lamar, ki boŋŋi ma gidero komgi maber, boŋo camanini maberre, ki tiko makwar me wel.

¹⁷ Jo Juda ki jo ma i lobo Icrael gubedo ka cato wil ki joni; guloko jamigi ki nano, nyig jeituni, ki nyig oduro me wi mwaka, moo kic, moo mukene-gu ki yat ma ŋwece kur.

¹⁸ Jo Damaciko gubedo ka cato wil ki joni pi jamigi madwoŋ-gu, pi lwak lonyoni mapatpatti oweko gumini kono vino ma gikelo ki i Kelbon, ki yer romi matarre,

¹⁹ ki kono yino ma gikelo ki i Ujal, gukelo ki jamini mabeco-gu; nyonyo ma giteto, kacia ki lum ma ŋwece kur guloko woko ki jami acatani.

²⁰ Jo Dedan gubedo ka cato wil ki joni kun gimiyo bot joni boŋŋi ma gitweyo i ŋe kana me bedo pa dano.

²¹ Jo Arab ki rwodi ducu me Kedar yam gubedo jo ma yomo cwinyi mada pi cato boti litino romi ki nyogi romi ki dyegi-gu, i kare ma gubedo ka cato wil kwedi.

²² Lucat-wil me Ceba ki Raama bene uibedo ka cato wil kwedi; gumiyo boti cit aŋwece ducu mapatpat mabeco makato ducu, ki kidi me wel-gu ki jabu, kun giloko ki jamini.

²³ Jo Karan, Kane, Eden, Acur, ki Ki lmad bene gubedo ka cato wil kwedi.

²⁴ Jo magi gubedo ka cato wil kwedi pi boŋŋi mabeco adada, ki pi boŋŋi ma bulu ki ma gikwoyo ki ciŋ ma gidero komgi woko maber, ki kapet ma gidero ki raŋi mapatpat, ma gitweyo woko matek likiŋ ki tol; gubedo ka cato wil boti pi jami meno.

²⁵ Mel me Tarcic obedo ka wot kun tiŋo jami acatani. “Ilokke doŋ idoko calo mel ma tye i dye nam ma gicano jami mapek opoŋo woko ligwik.

²⁶ Ludwo melli guteri woko wa ka mabor i dye namo Doŋ yamo ma a yo tuŋ wokceŋ okodo omiyo melli otur woko wa i cwiny dye nam.

²⁷ Lonyoni ducu, jami acatani ducu, lutic i mel ki ludwo mel, lumwon waŋ bao ka ma bao okubbe iye ki wadi, ki lucat-willi ma pigi tego, askarini ducu ma gin lu lweny ma gitye i mel, gin ducu ki dul monnyi ma gitye i dye joni, gumwony woko libuc i cwiny dye nam i kare ma melli otur woko-ni.

²⁸ I kare ma koko pa ludwo mel owinnye, lobo ma cokcok kenyo ducu guyeŋŋe.

²⁹ Wegi pol yeya gukatti woko ki mel kun gumako pol me cero yeya ciŋgi. Lutic i mel ki ludwo mel ducu ma woto i nam gucuŋ i wi tura i dog nam.

³⁰ Gin gidaŋŋe ki koko matek piri, kun gikok ma cwinygi kec adada. Gionyo putu i wigi kun giŋenne bene i buru pi cwercwiny.

³¹ Gilyelo wigi doŋ maleŋ piri, dok giruko boŋo cola me kumo, gikok kwede piri ma cwinygi ton, kun bene gikumo ma cwinygi kec.

³² Ka gikok ci giwero wer lyel piri gikok piri kun giwacci, ‘Aŋa ma gitwero poro ki Turo, ma gijwero oliŋ woko i dye nammi?

³³ Ka yam ikelo jami acatani ki bot jo ma tye loka nam, noŋo ico bo miti pa jo me rok ducu. Luker ducu me lobo gudoko lulonyo ki lonyoni ki lwak jami acatani madwoŋ-gu,

³⁴ Kombeddi doŋ mel otur woko i dye nam, i dye pii ka matut atika; jami acatam ki jo ducu ma gitiyo i mel gumwony woko i nam libuc kacel kwedi,

³⁵ Dano ducu ma gibedo i lobo ma orumo dog nam gubedo ki ur madit mada pi can man ma opoto i komi-ni; lukergi doŋ gudoko lwor twatwal, wangi olwal woko pi lworo.

³⁶ Lucat-wil ma gitye i kin lwak gujwat piri mada; doŋ io i agikki ma kelo lworo adada, doŋ ibirwenyo woko matwal ma pe dok ibinen.’ ”