Ejekiel 25 - Acoli Baibul

Lok i kom: jo Ammon

¹ Rwot oloko kweda,

² Owacci, “Wod pa dano, nen piny yo tuŋ bot jo Ammon, ci it it lok i komgi.

³ Wac bot jo Ammon ni. Wuwiny lok pa Rwot Lubaŋa: Rwot Lubaŋa owaco kuman ni, Pien wun doŋ wuwacci, ‘Iyoya!’ i kom kabedona maleŋ i kare ma doŋ gipyedo woko, ki i kom lobo Icrael i kare ma doŋ gijwero woko odon obur, ki i kom jo Juda i kare ma giterogi woko i opii,

⁴ pi meno an doŋ abemiyowu woko bot jo ma gitye yo tuŋ wokceŋ me bedo ginaleyagi. Gibigero gonygi i kinwu, dok gibiyubo kabedogi i dyewu. Gibicamo camwu ci gibimato cakwu bene.

⁵ Abimiyo Raba bedo ka cam pa kinaga, ki gaŋi pa jo Ammon abiloko doko dwol ka ma romi ki dyegi gibibedo iye, Man bimiyo wuŋeyo ni an aye a Rwot.

⁶ Rwot Lubaŋa doŋ owaco kuman ni, Pien doŋ wudoŋo ciŋwu dok wubedo ka nyono tyenwu matek i ŋom kun cwinywu obedo yom ki tim maraco ducu ma tye i iwu i kom lobo Icrael,

⁷ pi meno, nen, abiryeyo ciŋa woko i komwu, ci abimiyowu woko bot lurok me bedo ginayaka botgi. Abityekowu woko liweŋ ki i kin jo ducu ma bedo i wi lobo, abimiyo wuto woko ki i wi lobo ducu; abinekowu woko. Man bimiyo wuŋeyo ni an aye a Rwot.”

Lok i kom jo Moab

⁸ Rwot Lubaŋa owaco kuman ni, “Jo Moab onoŋo yam guwacci, Nen, jo Juda doŋ gicalo jo me rok mukene-gu ducu.

⁹ Pi meno abimiyo lweny poto i gaŋi murumo Moab ma gikuro waŋ lobo pa jo Moab-ni, kadi wa ki deyo me lobo Moab ma en aye Bet-jecimot, Baal-meon, ki Kiriataim.

¹⁰ Abimiyo lobogi woko, kacel ki jo Ammon, bot jo ma tye wokceŋ me bedo megi, wek pe doŋ gipo i kome matwal i kin lurok.

¹¹ Dok bene abiŋolo kop i kom jo Moab. Man bimiyo giŋeyo ni an aye a Rwot.”

Lok i kom jo Edom

¹² Rwot Lubaŋa owaco kuman ni, “Kit macalo jo Edom gutimo tim me culo kwor i kom jo Juda mumiyo gutiŋo bal alii madit twatwal me culo kwor i komgi,

¹³ pi meno omiyo Rwot Lubaŋa owaco kuman ni, Abiryeyo ciŋa alwenyo i kom jo Edom, abineko dano ducu kacel ki lee ma gibedo i lobo Edom. Abimiyo lobogi doŋ doko obur; nia i Teman nio kwede wa i Dedan jone ducu gibinekogi ki pala lucwan.

¹⁴ Abimiyo jona jo Icrael culo kwor i kom jo Edom ma kakara, ci gibitiyo i Edom kit meno kun jo Edom giwinyo arem me kinigana ki akemona mager-ri. Ci jo Edom doŋ biŋeyo kwor ma aculo i komgi,” man Rwot Lubaŋa ma owaco.

Lok i kom jo Piliciti

¹⁵ Rwot Lubaŋa owaco kuman ni, “Kit macalo jo Piliciti gutimo tim me culo kwor dok bene guculo kwor ki raccwiny me neko nek ma kelo mone ma pe gik;

¹⁶ pi meno Rwot Lubaŋa owaco kuman ni, Nen, abiryeyo ciŋa alwenyo i kom jo Piliciti, abijwero jo Ceret ki lobo mukene ma tye i dog nam-gu woko.

¹⁷ Abiculo kwor madit i komgi kun apwodogi ki akemo madwoŋ twatwal Man bimiyo giŋeyo ni an aye a Rwot, ka doŋ aculo kworra i komgi.”