Ejekiel 23 - Acoli Baibul

Lumego aryo ma gin lubalo twatwal

¹ Rwot oloko kweda.

² Owacci, “Wod pa dano, yam tye mon aryo, ma gin anyira ma megigi acel.

³ I kare ma onoŋo gin pud litino anyira, ma gibedo i Ejipt, gubedo ka timo tim kwele kwele; dano gibedo ka kwako korgi kun gimako tunogi ma ogulo-gu,

⁴ Nyako maditte-ni onoŋo gilwoŋo nyiŋe ni Okola, ki laminne onoŋo nyiŋe gilwoŋo Okoliba. Anyomogi gudoko monna ici gunywalo litino co ki litino anyira. Okola aye Camaria, ki Okoliba aye Jerucalem.

⁵ Okola otimo tim kwele kwele ma kun an doŋ anyome woko, ci cwinye omaro jo Aciria twatwal,

⁶ ma lulweny ma guruko boŋo ma obedo lamar lamar, luloc me dul lobo ki ludito wi mony, gin ducu awobe mabeco ma ginen mwonya mada; gin wegi aguragura ma giriŋo ki aguragura.

⁷ En omine kene ka timo tim kwele kwele kwedgi, gin oyita lweny me Aciria ma giyerogi ayera. Ci obalo kome, woko kekene ki woro cal jogi pa jo ducu ma en omarogi-ni.

⁸ En yam pe oweko timo tim me malayane-ni ma en obedo ka timone ki i Ejipt i kare ma pud en nyako; co gubuto kwede gukwako kore gunyono tunone mugulo-ni, kun gutyeko mitigi woko i kome calo gubedo ki malaya,

⁹ Pi meno, amiye i ciŋ pacoge, i ciŋ jo Aciria ma en omarogi-ni.

¹⁰ Jo meno guweke odoŋ munero, gumako awobene ki’ anyirane; ento en guneke woko ki pala Lucwan. Ci odoko lok aboka i kin mon, i kare ma doŋ giŋolo kop woko i kome.

¹¹ “Laminne Okoliba oneno tim man, ento en dok onoŋo rac atika makato laminne Okola i marre ki i tim kwele kwelene, ma doŋ obedo rac ma okato pa laminne woko.

¹² En omaro jo Aciria luloc me dul lobo ki ludito wi mony, lulweny ma gurukke woko ki jami lweny ducu, wegi aguragura, ma giriŋo ki aguragura, gin ducu awobe mabeco ma ginen mwonya mada.

¹³ Ci aneno en doŋ oballe woko, gin anyira aryo ducu gubedo ka timo tim kwele acel-lu,

¹⁴ Ento en obedo ka medde ameda ki tim kwele kwelene-ni; ci oneno cal co ma gigoro i kom ot, ki cal lubaŋa pa jo Kaldaya ma gidero woko ki raŋi makwar,

¹⁵ ma gutweyo pyergi ki del, ma gin ducu guboyo wigi woko ki kitambara maboco me boyo wic; gin ducu ginen calo jo ma tye ki rwom me tic madito; meno obedo cal pa jo Babilon ma lobogi kikome aye Kaldaya.

¹⁶ Cutcut i kare ma en onenogi cwinye ocako pyette i komgi, ci ooro lukwena gucito hotgi i Kaldaya.

¹⁷ Ci jo Babilon gubino bote gubuto kwede i wi kitanda me mar, gubale woko ki tim me abor ma gutimo i kome, lacen ma doŋ gimiyo en onyobbe woko ki bal, ci en olokke woko ki botgi ma onoŋo cwinye ocido woko marac twatwal.

¹⁸ I kare ma en omedde ki tim kwele kwelene-ni kun timo atyer ka maleŋ ma bene onoŋo bedo munero, an bene alokke woko ki bote ma cwinya ocido woko, kit macalo alokke woko ki bot laminne-ni.

¹⁹ Ento en pud omedde ameda ki tim me malayane, kun po pi kare ma onoŋo en pud nyako, i kare ma en obedo ka timo tim malayane i lobo Ejipt-ni.

²⁰ Ci cwinye opyette i kom co ma gimaro tim kwele kwele, ma komgi me co obedo calo pa kana, ma pig komgi bene obedo calo pa aguragura.

²¹ Kit meno in Okoliba ibedo ka yenyo tim me tarwaŋ ma itimo ka tinoni, i kare ma jo Ejipt gukwako kori ci gunyoŋo tunoni ma onoŋo pud ogulo agula-ni.

Lubaŋa oŋolo kop i kom lumego aryo-ni

²² “Nen, mumiyo an Rwot Lubaŋa awaco boti in Okoliba, kuman ni, cwinyi doŋ ocido woko i kom pacogi ma yam imarogi-ni, abekelogi i komi, kun gia ki i kabedo ducu murumi:

²³ jo Babilon ki jo Kaldaya ducu, jo Pekod, jo Coa ki jo Koa, ki jo Aciria ducu kacel kwedgi. Gin ducu awobe mabeco ma ginen mwonya mada, luloc me dul lobo ki ludito wi mony, ludito ki lulweny, gin ducu onoŋo giriŋo ki aguragura.

²⁴ Ci gibibino i komi, ki yo tuŋ acam ki gadigadi lweny ki gadigadi ma otino vec, ki lwak mony. Gibirumi woko dyere ki kwot ocal ki kwot bani ki otaŋ nyonyo, doŋ abimiyogi twer me ŋolo kop i komi kit macalo ŋolo kopgi tye kwede.

²⁵ Abimiyo kinigana kemi, wek gutwe-nyi malit. Gibiŋolo umi ki iti woko, ka doŋ i agikkine gibineki woko ki pala lucwan. Gibimako litino awobeni ki litino anyirani ci giwaŋogi woko makwo ki mac.

²⁶ Gibilunyo boŋo woko ki i komi ci gikwanyo jamini mabeco me wel-gu woko.

²⁷ Doŋ an abigiko tim kipyeda ki tim kwele kwele ma ikelo ki i Ejipt-ni woko. Pe ibineno jo Ejipt dok bene pe doŋ ibipo pigi matwal.”

²⁸ Rwot Lubaŋa owaco kuman ni, “Nen, abimiyi woko i ciŋ jo ma idaggi-ni, i ciŋ jo ma ilokke ki botgi ma cwinyi ocidc woko.

²⁹ Kit macalo gidagi-ni gibimayo jamini ma itiyo tic pire-gu woko ducu, ci gibiweki idoŋ munero, nono laboŋo gin mo; gibinyuti woko ka maleŋ i waŋ dano ma noŋo itye munero calo malaya, Tim kipyedani ki tim kwele kweleni

³⁰ aye ma okelo can man i komi, pien itimo abor ki lurok, ci inyebo komi woko ki cal jogigi.

³¹ In doŋ ilubo kit lameru, pi meno abiketo can acel-lu ma aketo i kemo-ni i komi.”

³² Rwot Lubaŋa owaco kuman ni, “Ibimato kikopo pa lameru kikopone lac dok iye tut. Dano binyeri kun gicayi acaya, pien kikoponi opoŋ woko ligwik.

³³ Ibimer woko ci ibedo ki cwercwiny, pien kikopo me lworo ki balle pa piny, en aye kikopo pa lameru Camaria.

³⁴ Ibimato gin ma i i kikopo ci icwiyo ducu, ibiputo yet wii, ka doŋ ibiŋolo tunoni ki ŋinyoŋinyo kikopo ma oto-ni. Pien an Rwot Lubaŋa doŋ atyeko loko.”

³⁵ Pi meno Rwot Lubaŋa owaco kuman ni, “Kit macalo wii doŋ owil woko i koma, dok bene doŋ ityeko bola woko yo ŋeyi, pi meno myero doŋ icir gin mua ki i tim kipyedani ki tim kwele kweleni.”

³⁶ Rwot owaco bota ni, “Wod pa dano, tika ibiŋolo kop i kom Okola ki Okoliba? Ci tuc botgi gin me kwer ducu ma gin gutimo.

³⁷ Gubedo ka timo abor dok bene guneko dano, gutimo abor ki cal jogigi-ni, dok bene litino awobegi ma gin kikomgi gunywalo kweda gutyero woko bot cal jogi me bedo camgi.

³⁸ Medo i kom meno gin dok gutimo gin magi: gubalo kabedona maleŋ i nino acel, dok bene gupyedo ceŋ cabitta.

³⁹ Ka doŋ guneko litinogi me gitum ci gutyero bot cal jogigi, en i nino acel-lu gua gubino kwede i kabedona maleŋ ci gupyedo woko. Doŋ inen, man aye gin ma gutimo i oda.

⁴⁰ “Gin bene gucwalo lukwena bot jo ma tye ka mabor ni gubin, ci nen, gubino. Ilwoko komi woko pigi, ka iwiro waŋi, dok bene idero komi woko ki ruk me deyo,

⁴¹ Ci ibedo i wi kitanda me deyo, kun meja bene doŋ giketo ka kenyo ma gipeto kitambara maber woko i wiye, ci iketo iye odok ecetana ki moona.

⁴² Woo pa lwak dano ma gutoyo tokgi ata onoŋo owinnye bote, io ma gubedo ka wo-ni onoŋo lumero me nino ducu-ni ma gikelogi ki i tim aroo. Guketo ogul i ŋut ciŋ mon, ki lalukana mabeco atika gurwako i wigi,

⁴³ Ka doŋ awacci, Co pe gitye ka timo abor ki dako ma doŋ oti oloc woko ma oŋiyo woko ki’ tim kwele kwele-ni?

⁴⁴ Pien gucito bote gubedo kwede, kit macalo co gicito bot dako ma malaya ci gibedo kwede-ni, Kit meno bene gucito bot Okola ki Okoliba ka timo tim kipyeda.

⁴⁵ Ento jo ma kitgi atir biŋolo kop i kom gin mon ma lutim abor ki mon ma lunek dano-gu, pien gutimo abor kun gineko dano bene.”

⁴⁶ Rwot Lubaŋa owaco kuman ni, “Kel mony obin olweny i komgi wek komgi omyel ki lworo madwoŋ dok giyakgi woko,

⁴⁷ Ci mony bicelogi ki gweŋ dok gibitonogi woko ki pala lucwan, gibineko awobegi ki anyiragi woko, kun bene giwaŋo odigi woko ki mac.

⁴⁸ Doŋ abityeko tim me tarwaŋ woko ki i lobo man, wek mon ducu guwiny cik ma acikowu kwede, pe gutim tim me tarwan kit macalo wun doŋ wutimoni.

⁴⁹ Abiketo can i komwu wun lumego aryo-ni pi timwu me tarwaŋ, dok bene wubilimo can malit pi balwu marac atika pi woro cal jogi, Ci doŋ wubineyo ni an aye a Rwot Lubaŋa.”