Ejekiel 2 - Acoli Baibul

Lubaŋa olwoŋo Ejekiel me bedo lanebi

¹ Ŋat ma onoŋo tye ka lok-ki owaco bota ni, “Wod pa dano, a icuŋ, ci abilok kwedi.”

² I kare ma tye ka lok kweda, Cwiny pa Lubaŋa odonyo i iya ci omiyo acuŋ; pud awinyo en omedde kun loko kweda ni,

³ “Wod pa dano, abecwali icit bot jo Icrael, ma gujemo ci gulokke ka lweny i koma-ni. Gin pud lujemo wa onyoo kit macalo yam kwarogi gujemo ci gutimo bal i koma-ni.

⁴ Gin aye io ma kitgi obedo acak dok ŋutgi bene nwaŋ pe giwora. Abecwali me tito botgi gin ma an Rwot Lubaŋa abewaco botgi.

⁵ Ka gibiwinyo lokki nyo gikwero winyone, (pien gin jo ma lujemo) ento gibiŋeyo ni lanebi yam obedo i kingi.

⁶ Doŋ in wod pa dano, pe myero ilworgi, pe bene ilwor lok ma gin waco. Gibirumi woko macalo okuto lano ma orumi, kun ibedo i wi oton mapol; pe ilwor lokgi, cwinyi bene pe myero oballe kadi gineni ki waŋ marac, pien gin jo ma lujemo.

⁷ Ibiloko lokka botgi, kadi ka giwinyo nyo gikwero winyone; pien gin jo ma lujemo,

⁸ “Ento in, wod pa dano, winy gin ma an awacci; pe ibed lajemo calo jo meno ma lujemo. Ŋam dogi ci icam gin ma abemiyo boti me acama.”

⁹ I kare ma aneno piny, ci aneno ciŋ mo ma giryeyo tuŋ bota; ci nen Onoŋo omako buk adola ma gicoyo iye coc.

¹⁰ Ci oyaro buk-ki i nyima; aneno gicoyo ryoryo ducu, iye ki yo tuŋ i ŋeye bene. Aneno lok ma gicoyo iye onoŋo obedo lok me koko me can, kumo ki can.