Ejekiel 16 - Acoli Baibul

Jerucalem ma pe genne

¹ Rwot doki oloko kweda.

² Owacci, “Mi Jerucalem one gin me kwer ducu ma en otimo.

³ Tit ki Jerucalem gin ma Rwot Lubaŋa tye ka wacone bote: In yam ginywali i lobo pa jo Kanan; woru obedo jo Amor, ki meni obedo anyira Kit.

⁴ Doŋ kit macalo ginywali kwede, i nino ma ginywali iye kikome tol peni pe giŋolo, pe bene gilwoko komi ki pii wek komi obed maleŋ, pe giwiro kado i komi, pe bene giboyi woko ki boŋo.

⁵ Ŋat mo ma obedo ki kica muromo i komi pe me tiyo gin macalo magi ducu i komi. I kare ma ginywali gubedo ki mar manok twatwal i komi mumiyo guboli woko i dye bar ka maleŋ.

⁶ “I kare ma akato ki ka ŋeti, aneni ibedo ka kwitte i remo ma ginywali kwede, ci awacci ma it ye i remoni ni, ‘Bed kwo,

⁷ ci idoŋ giri malo calo ginapita ma i poto.’ Ci idoŋo woko mabor wa malo idoko nyako madit. Tunoni ocako poŋ maber, ki yer wii bene olot maboco, ento onoŋo it ye munero laboŋo boŋo mo i komi.

⁸ “Ka doki akato ki ka ŋeti ci aneni anoŋo ni mwakani doŋ oromo me mar; ci ayaro boŋo ma onoŋo atye kwede woko i komi, omiyo pe doŋ ibedo munero. Ada, aketo gicikke kwedi, ci in doŋ idoko mera. Acikke mada ni abimari.” Man Rwot Lubaŋa ma owaco.

⁹ “Akwanyo pii alwoko remo woko ki i komi, ka doŋ awiro komi woko ki moo.

¹⁰ Aruki woko bene ki boŋo mabor ma gidero maber, ka amini war ma delle ber makato ducu, ki boŋo camanini me boyo wii ki boŋo aridi me umi.

¹¹ Dok aruki ki ruk me deyo, ci arwako ogul i ciŋi, kun arwako nyor bene i ŋuti,

¹² Dok arwako agit um bene i umi, ka arwako agit it i iti ryoryo ducu, ka doŋ arwako lalukana maber mada i wii.

¹³ Onoŋo yam giruki ki ruk ma obedo jabu ki ryal, ginarukani onoŋo obedo boŋo camanini mabecone, ki boŋo aridi ki boŋo ma gidero maber. Ibedo ka camo kwon ma mokone pwot mada, ki moo kic kacel ki moo yaa. Idoŋo ma inen mwonya maber mada, ci idoko daker.

¹⁴ Berri oywek mada i rok ducu. Onoŋo ibedo mwonya maber mada pi deyo ma aketo i komi, pien aketi ma inen mwonya mada.” Man Rwot Lubaŋa maowaco.

¹⁵ “Ento in giri ibedo ka geno berri ki ywekani, ci ibedo ka timo abor ki jo ducu ma gikato ki ka ma in it ye iye.

¹⁶ Ikwanyo boŋŋini mogo ci iyubo odi jogi ci idero komgi woko maber, ka doŋ imiyo komi woko bot jo ducu i tim me abor calo malaya. Kit tim macalo man pud pe onen, dok bene pe doŋ binen matwal.

¹⁷ Dok bene ikwanyo jami me wel me jabu ki ryal ma yam amiyo boti, ci icako tiyo cal dano ka doŋ itimo abor kwedgi.

¹⁸ Ikwanyo boŋŋini ma gidero maber-ri iumo ki kom cal dano-gu, ci ityero moona woko ki odok ecetana botgi.

¹⁹ Yam amini cam, amiyo icamo kwon mamokone pwot adada, moo yaa kacel ki moo kic, ento in dok ityero woko bot cal jogi macalo gin ma ŋwece kur ma yomo cwinygi. Man Rwot Lubaŋa ma owaco.

²⁰ “Lacen dok ikwanyo awobeni ki anyirani ma yam inywalogi kweda, ci ityerogi woko bot cal jogi me bedo gitum awaŋa. In itamo ni tim me abor ma itimo obedo lok matidi mo ki tun bota

²¹ mumi yo ineko litinona ci ityerogi woko bot cal jogi-gu me bedo gitum awana-ni?

²² I kom tim me kwerri ducu ki tim aborri ducu ma itimo wii pe opo i kom kare me tinoni, en kare ma onoŋo it ye munero ma ginaruka mo pe i komi, ma onoŋo it ye ka kwitte i remo ma ginywali kwede-ni.”

Jerucalem obedo macalo malaya

²³ Rwot Lubaŋa owacci, “Can i wii! Can i wii! Lacen ma doŋ ityeko timo tim maraco,

²⁴ ci igero kicika piri keru, ka igero kabedo ma otinne malo me woro cal jogi i ŋet yo ducu.

²⁵ I agikki yo ducu igero iye kabedo ma otiŋŋe malo ka doŋ icako nyuto berri kunnu calo malaya. Imiyo jo ducu ma gikato ki kenyo gibedo kwedi, ma imiyo tim me malayani onya omedde twatwal.

²⁶ Dok bene iweko luwoti ma gin lutarwaŋ ma gin jo Ejipt, gutimo abor kwedi, imiyo tim me aborri onya omedde, kun iŋeto ki cwinya ni wek kiniga omaka.

²⁷ “Nen, kombeddi doŋ aryeyo ciŋa woko me keto can i komi, ki dok me kwanyo dul me gum ma onoŋo yam apoko boti-ni woko. Doŋ atyeko miyi woko i ciŋ lukworri jo Piliciti, ma gidagi twatwal ma lewic omakogi mada pi tim me abor ma ibedo ka timone-ni.

²⁸ “Dok bene itimo abor ki jo Aciria, pien onoŋo abor ma itimo ki jo mukeneni pe orommi. Idoko malayagi, ento ducu mwa, gin ma gutimo i komi bene pud pe orommi.

²⁹ Imedde giri ki tim aborri ci itimo abor bene ki lucat-wil ma i lobo pa jo Kaldaya, ento kadi bed gubedo kwedi ci gin ma gutimo i komi bene pud pe orommi.”

³⁰ Man gin ma Rwot Lubaŋa tye ka wacone ni, “Cwinyi doŋ odoko goro woko ki mar, aneno itimo gin magi ducu calo malaya ma lewic pe mako.

³¹ Igero kicika i agikki yo ducu dok igero kabedo ma otiŋŋe malo i ŋet yo ducu. Ento in onoŋo pe ibedo calo malaya, pien onoŋo pe itimo abor pi noŋo limo

³² Ibedo calo dako ma timo abor ki lurok ma gin welo ma ka maro cware.

³³ Co aye ma gimiyo mot bot mon ma malaya, ento in aye doki imiyo mot bot co ma gimari-ni, kun iwilogi ki lim i muŋ ni gua ki i kabedo ducu gubin gubed kwedi.

³⁴ In dok ibedo malaya ma kite pat mada ki kit mon mukene ma gin malaya-gu. Ŋat mo ma onoŋo odiyo in me bedo malaya pe. Pe giculo gin mo boti, ento in aye dok iculo co ma onoŋo gimari-ni, Pi meno, in giri ki ti pat.

Kop ma Lubaŋa ogolo i kom Jerucalem

³⁵ “Pi meno doŋ, in malaya, winy lok ma Rwot tye ka wacone.

³⁶ Man gin ma Rwot Lubaŋa owaco ni, Ilunyo boŋŋini woko ki i komi ci imiyo co ma imarogi-ni gubedo kwedi, dok bene ineko litinoni ci ityero woko bot cal jogi me bedo gitum.

³⁷ Doŋ pi lok man omiyo abicoko jo ducu ma yam gimari, ma yam ibedo kwedgi ki yomcwiny, jo ducu ma onoŋo imarogi ki jo ducu ma onoŋo idaggi. Abicokogi ki i kabedo ducu ci amiyo gicuŋ girumi woko dyere, ka doŋ alunyo boŋo woko ki i komi idoŋ munero, wek guneni noŋo doŋ it ye munero.

³⁸ Abiŋolo kop i komi calo aŋolo kop i kom mon ma giketo nyom woko kun bene gineko dano. Ci abiŋolo kop i komi ki akemo ki nyeko madit miyo ito woko.

³⁹ Abimiyo ibedo i te twero pa co ma gimari, ci gibicoro kicikani gireto woko piny, dok bene gimuko kabedo ma otiŋŋe malo ma igero me woro cal jogi-ni woko. Gibilunyo boŋo woko ki komi ci gikwanyo jami me wel-gu woko ki boti, ka doŋ giweki idoŋ munero laboŋo boŋo mo i komi.

⁴⁰ “Gibikelo dul mony ka lweny i komi, gibiceli ki got ci giŋoli giŋidi woko matitino ki pala lucwangi.

⁴¹ Gibiwaŋo odini-gu woko ducu, dok bene gibicobo kop ma aŋolo i komi ki i nyim mon mapol. Abijuki woko doŋ pe ibedo malaya, dok abimiyo doŋ igiko miyo mot bot co ma gimari-ni woko matwal.

⁴² Abitoyo akemona woko i komi kit meno, ci nyeko ma onoŋo atye kwede bene doŋ bia woko ki i komi. Abibedo doŋ mamwol, kiniga bene pe doŋ bimaka i komi matwal.

⁴³ Onoŋo wii owil woko pe ipo kit macalo abedo ka timi kwede i ‘kare ma onoŋo in pud itidi, doŋ imiyo kiniga omaka pi gin magi ducu ma itimo-ni. Pi meno, abiculo kwor i komi ki gin ma itimo. Piŋo itimo tim me tarwaŋ imedo ki tim me kwer-gu ducu?” Man Rwot Lubaŋa ma owaco.

Nyako cal ki miune

⁴⁴ “Nen, dano ducu ma loko carolok, gibiloko carolok i komi ni, ‘Nyako cal ki minne.’

⁴⁵ In giri i nya pa meni kikome. En okwero cware ki litinone woko. Inen calo lumegini ma gukwero coggi ki litinogi-ni. Meni yam Lakit ki woru mere onoŋo en Laamor.

⁴⁶ Lameru ma okwono nyimi en aye Camaria, ma tye yo tuŋ acam ki gaŋine, Lameru matidine ma tye ki gaŋine i ŋete yo tuŋ acuc, en aye Codom.

⁴⁷ In yam pe ibedo ka lubo kitgi keken, kadi ki timo kit gin me kwer gu macalo gin, ento pi kare manok mo keken kiti ocako balle woko marac makato kitgi i kit yo ducu.

⁴⁸ “Doŋ kit macalo an atye kwe-ni,” man Rwot Lubaŋa ma owaco, “lameru Codom ki gaŋi ma i ŋete pe gutimo kit gin ma in kacel ki gaŋini wutimo-ni.

⁴⁹ Nen, man aye obedo bal pa lameru Codom. En kacel ki anyirane gubedo luwakke mada, pien onoŋo gitye ki cam madwoŋ ma gicamo loyogi kun gibedo mot ki kuc, ento pe gumiyo kit kony mo bot lucan ki boŋo ma piny obwoyogi.

⁵⁰ Onoŋo gubedo jo ma Lyerre mukato kare, ci gutimo gin me kwer mapol i nyima; pi meno, i kare ma aneno gin ma gutimo, atyekogi woko.

⁵¹ “Camaria pe otimo bal ma romo nucu bal ma in itimo. Itimo gin me kwer mapol makato gin me kwer ma en otimo. Dok bene imiyo lumegini ginen calo jo ma kitgi atir ka giporogi kwedi, ki kit gin me kwer ducu ma doŋ ityeko timogi-ni.

⁵² Doŋ kombeddi, in myero icir lewic. Balli doŋ rac atikatika makato bal pa lumegini ducu ma miyo ginen calo jo ma gipe ki bal mo-ni. Gin lokgi tye atir ma okato lokki. Kit meno in bene myero lewic omaki, dok myero icir cac ma gicayi kwede pien imiyo lumegini ginen calo jo ma kitgi atir.”

Rwot bidwoko gum pa Codom ki Camaria

⁵³ Rwot owaco ki Jerucalem ni, “Abidwoko gumgi botgi, gum pa Codom ki gaŋi ma i ŋete, ki gum pa Camaria ki gaŋi ma i ŋete, Abidwoko gummi bene boti.

⁵⁴ Lewic bimaki i komi kekeni, dok bene cac ma gicayi kwede bikweyo cwiny lumegini.

⁵⁵ Gibibedo maber ki lonyo dok i, in bene kacel ki gaŋi ma i ŋeti ducu wubibedo maber kit ma yam con.

⁵⁶ I kare ma iwakke-ni onoŋo pe ibedo ka loko nyiŋ lameru Codom macalo lok aboka,

⁵⁷ i kare ma timmi maraco peya onen ka maleŋ-ŋi? Kombeddi doŋ ilokke idoko calo en, ginacaya pa jo Edom ki luwotgi ducu, ki pa jo Piliciti, jo ma gibedo cokcok ma gicayi-ni.

⁵⁸ Doŋ icir can malit pi bal me lewic ki gin me kwer mapol ma itimo.” Man Rwot ma owaco.

Gicikke ma bedo nakanaka

⁵⁹ Rwot Lubaŋa owacci, “Abitimi ma poro gin ma yam itimo, pien icayo kwoŋ meri dok bene ituro gicikke woko.

⁶⁰ Ento pud abipo i kom gicikkena ma aketo kwedi cakke i kare me tinoni. Doŋ abiketo gicikkena kwedi ma bedo nakanaka.

⁶¹ Ibipo kit macalo ibedo kwede ducu, ci lewic bimaki ka akwanyo lameru madit ki lameru matidi adwokogi cen boti. Abimiyo doŋ gibedo macalo anyirani, ento pe pi gicikke man ma aketo kwedi-ni.

⁶² Dok abimoko gicikkena kwedi, ci ibiŋeyo ni an aye a Rwot.

⁶³ I kare ma abiweko bal ducu ma yam itimo, ibipo i komgi ci lewic bimaki matek mada ma pe bene doŋ ibinamo dogi ka lok.” Man Rwot Lubaŋa ma owaco.