Ejekiel 14 - Acoli Baibul

Lanebi Ejekiel oŋolo kop i kom jo ma woro cal jogi

¹ Jo mogo i kin ludoŋo pa jo Icrael gubino bota ci gubedo piny i nyima.

² Cutcut Rwot oloko kweda.

³ Owacci, “Wod pa dano, jo magi doŋ gitye ki cwiny me woro cal jogi dok gimiyo cal jogi magi nakogi woko terogi ka timo bal. Tika gitamo ni abimiyogi lagam ma gitye ka mitoneni?

⁴ “Doŋ pi meno kombeddi lok kwedgi ci itit botgi gin ma an Rwot Lubaŋa atye ka wacone ni, ‘Laicrael mo ma tye ki cwiny me woro cal jogi dok ma bimiyo cal jogi magi nako en tere ka timo bal, ka obino bot lanebi ni okonye, ci an Rwot kikoma aye abimiye lagam. Lagam ma abimiyo bedo lagam ma okemo lwak cal jogine ma en otiyogu.

⁵ Cal jogi magi ducu doŋ oloko cwiny jo Icrael woko ki i koma, ento ageno ni ki lagam man ma abimiyo botgi abidwoko cwinygi celi i koma miyo doŋ giwora.’

⁶ “Kombeddi doŋ itit bot jo Icrael gin ma an Rwot Lubaŋa atye ka wacone ni, ‘Wuŋuti wudwog cen bota wuwek woro cal jogiwu-ni. Dok bene wulokke wuwek timo gin me kwer ducu ma yam wubedo ka timogi-ni.

⁷ “Ka inen dano mo ki i kin Luicrael nyo dano mo ki i kin lurok ma gibedo i kin jo Icrael ce olokke obwota woko kun doŋ tye ki cwiny me woro cal jogi, ka cal jogine oŋake otere ka timo bal, ka obino bot lanebi ni okonye, ci an Rwot kikoma aye abimiye lagam,

⁸ Abikwero kit timme-nu woko, abimiyo en doko lanyut ki lok aboka pa dano. Abikwanye woko ki i kin jona, man bimiyo wuŋeyo ni an aye a Rwot.

⁹ “Ka ce inen gibwolo lanebi mo ci en omiyo lagam gobagoba, meno noŋo an Rwot aye ma abwole. Ci abiryeyo ciŋa i kom lanebi meno, aneko woko ki i kin jona jo Icrael.

¹⁰ Doŋ lanebi kacel ki ŋat ma bino ka noŋo kony ki bote-ni ducu gibilimo lakit can acel.

¹¹ Abitimo man wek jo Icrael pe guŋak gubwota woko, wek bene pe gubal komgi ki balgi ducu ma gitimo. Ento amito ni gin gubed jona ki an bene abed Lubaŋagi.” Man Rwot Lubaŋa ma owaco.

Nua, Daniel ki Yubu

¹² Rwot oloko kweda.

¹³ Owacci, “Wod pa dano, ka ce inen lobo timo bal i koma kun turo cikka, abiryeyo ciŋa ci ajwiko cam woko ki iye. Abicwalo kec neko dano ma gibedo iye kacel wa ki lee ducu.

¹⁴ Kadi bed jo adek-ki, Nua, Daniel ki Yubu onoŋo gibedo kunnu, kitgi ma atir gire bilaro kwogi gin kengi,” man Rwot Lubaŋa ma owaco.

¹⁵ Ka acwalo lee me tim ka neko dano woko ducu ki i lobo meno, ci gibimiyo lobo doŋ balle woko doko marac ma ŋat mo doŋ pe twero ŋolo kato ki iye,

¹⁶ kadi bed nene jo adek-ki gubed kunnu, kit macalo an a Rwot Lubaŋa makwo-ni, onoŋo pe gitwero laro kadi wa litinogi kikomgi, Onoŋo gitwero laro kwogi gin kengi, ento onoŋo lobo ‘twero lokke doko tim ‘ata.

¹⁷ “Ka ce akelo lweny i kom lobo meno kun acwalo jami lweny maraco wek ginek ki dano kacel ki lee woko ducu,

¹⁸ kadi bed onoŋo jo adek-ki, Nua, Daniel ki Yubu gibedo kunnu, macalo an Rwot Lubaŋa makwo-ni, onoŋo pe gitwero laro kadi wa litinogi kikomgi. Onoŋo gitwero laro kwogi keken.

¹⁹ “Ka ce acwalo two gemo i lobo meno, ka aonyo akemona kun arwenyo kwo pa jo mapol, ma aneko dano kacel ki lee me tim,

²⁰ kadi bed onoŋo Nua, Daniel ki Yubu gibedo kunnu, kit macalo atye kwo-ni, man Rwot Lubaŋa ma owaco, onoŋo pe gitwero laro kadi wa litinogi. Onoŋo kitgi ma atir aye gire bilaro kwogi gin kengi.”

²¹ Man aye gin ma Rwot Lubaŋa tye ka wacone ni, “At ye ki can aŋwen ma abicwalo i kom Jerucalem, lweny, kec, lee tim-gu ki two gemo, wek onek dano woko ducu kacel ki lee ducu.

²² Ka ce inen ŋat mo obwot obedo kwo ce olaro litinone, ka gubino botwu myero wunengi. Ci wubineno kit ma kitgi ki gin ma gitimo ducu rac kwede, man miyo wubiye ni can ma abiketo i kom Jerucalem tye kakare.

²³ Wubiye ka wuneno kitgi ki gin ma gitiyo kit ma rac kwede; ci bimiyo wuŋeyo ni onoŋo tyen lok ma atir mumiyo atimo gin ma doŋ atyeko timone-ni, man Rwot Lubaŋa ma owaco.”