Ejekiel 11 - Acoli Baibul

Lubaŋa ojuko rwodi ma gin lutim maraco

¹ Cwiny pa Lubaŋa otiŋa malo, ci otera wa i doggola ma tye yo tuŋ wokceŋ me ot pa Rwot. Doŋ i kare ma atye kunnu ka ma cok ki doggola ci aneno jo pyeraryo wiye abic, ma onoŋo i kingi tye iye Jajania, wod pa Ajur, ki Pelatia wod pa Benaya, ma onoŋo gin rwodi ma giloyo lwak.

² Lubaŋa owacca ni, “Wod pa dano, magi gin aye lutim maraco ma gitye ka yubo lok me timo gin marac i gaŋ man.

³ Giwacci, ‘Kare ma wabigero iye odi doŋ cok. Gaŋ man obedo calo agulu me tedo, wan wabedo calo riŋo ma tye iye.’

⁴ Pi meno, wod pa dano, tit lok i komgi.”

⁵ Cwiny pa Rwot opoto i koma, ci Rwot owaco bota ni atit lok man bot lwak ni, “Wun jo Icrael, aŋeyo gin ma wutye ka wacone, ki gin ma wutye ka yubone ki i tamwu.

⁶ Wun doŋ wutyeko neko jo mapol i gaŋ kany mumiyo yo ma i gaŋ ducu opoŋ ki kom dano muto keken.

⁷ “Mumiyo man en aye gin ma awaco botwu. Gaŋ man bidoko agulu me tedo, ento kom jo muto ma wunekogi ka wupyelogi i dye gaŋ gin aye riŋo me ateda. Ento wun gibikwanyowu woko ki i dye gaŋ,

⁸ Yam wubedo ka lworo pala lucwan; ento abikelo dano ma gitye ki pala lucwan gilwenyo i komwu, man Rwot Lubaŋa ma owaco.

⁹ Abikwanyowu ki i dye gaŋ akelowu woko, ci amiyowu i ciŋ lurok. Doŋ atyeko ŋolo kop me to i wiwu;

¹⁰ gibinekowu woko i lweny ki pala lucwan i lobowu kikome. Man bimiyo wuŋeyo ni an aye a Rwot.

¹¹ Gaŋ man pe bibedo agulu me tedowu ki wun bene pe wubibedo calo riŋo ma tye i agulu. Abiketo can i komwu ki i kabedo ducu ma wubedo iye ki i lobo Icrael.

¹² Man bimiyo wuŋeyo ni an aye a Rwot, ki cik ma wuturo-ni meno cikka, ki gin ma giciko ni wuti-ni, ma pe wutiyo-ni, onoŋo an aye ma aciko, ento wubedo ka Lubo mewu cik pa lurok ma gurumowu.”

¹³ I kare-nu ma atye ka tito lok, cutcut Pelatiya wod pa Benaya opoto ci oto woko. Ci apoto piny aryeba ic kun akok ki dwan maloŋo ni, “Ai do, Rwot Lubaŋal Ibineko jo ma onoŋo gudoŋ i Icrael-li woko ducu?”

Lubaŋa ocikke pi miyo gicikke manyen bot jo ma onooo gitye i opii

¹⁴ Rwot oloko kweda kun wacci,

¹⁵ “Wod pa dano, jo ma gibedo i Jerucalem gitye ka lok piri kadi wa Luicrael wadiwu bene ma giterogi i opii. Giwacci, ‘Opii doŋ gitye ka mabor ma pe gitwero woro Rwot. En omiyowa lobo man ni wacam obed mewa.’

¹⁶ Kombeddi doŋ tit lok ma atye ka wacone-ni bot opii wadiwu. Acwalogi me cito ka bedo i lobo pa lurok ma tye ka mabor, ci akeyogi woko i lobo mukene ducu. Aye ni guwora i lobo ka ma gucito iye, ento pi kare me tutunu.

¹⁷ “Pi meno tit botgi gin ma an Rwot atye ka wacone. Abicokogi woko ki i lobo ka ma yam akeyogi gucito iye, ci abimiyogi lo bo Icrael adwoko cen botgi.

¹⁸ Ka gudok kunnu, gibijwero gin ducu ma obedo cilo, ki gin me kwergu ducu.

¹⁹ Abimiyogi cwiny acel dok abiketo cwiny manyen i igi; abikwanyo cwiny matek calo got-ti woko ki i komgi, ci amiyogi cwiny pa dano.

²⁰ Doŋ miyo gibigwoko cikka dok bene giwinyo lokka kun gin yo gin ma an aciko ducu. Gibibedo jona, ki an bene abibedo Lubaŋagi.

²¹ Ento abiketo can i kom jo ducu ma giworo gin ducu ma obedo cilo ki gin me kwer-gu. Abiculo kwor i komgi kun poro gin ducu ma yam gin gutimo, man Rwot Lubaŋa ma owaco.”

Deyo pa Lubaŋa oa woko ki i Jerucalem

²² Lukerubi gucako tuk me cito malo, ci lawala bene gucito kacel kwedgi. Deyo pa Lubaŋa pa Icrael onoŋo tye ka wigi.

²³ Ci deyo pa Lubaŋa oa woko ki i gaŋ ocito ocuŋ i wi got ma tye yo tuŋ wokceŋ me gaŋ.

²⁴ Cwiny pa Rwot otiŋa woko i ginanyuta, ci okela odwoka woko cen bot jo ma tye i opii i lobo Kaldaya. Lacen ginanyuta meno ma onoŋo aneno ocako rwenyo woko ki bota,

²⁵ ci atito gin ducu ma Rwot onyutta bot jo ma onoŋo gitye i opii.